Уйғур қәләм мәркизи ослода паалийәт елип барди

Хәлқара қәләмкәшләр җәмийити уйғур мәркизи вәкиллири өткән һәптә норвигийә пайтәхти ослода өткүзүлгән хәлқаралиқ ипадә әркинлики йиғиниға қатнашти. Йиғин җәрянида улар, дуняниң һәр қайси җайлиридики мәшһур қәләмкәшләр, инсан һәқлири паалийәтчилири вә сиясәтчиләр билән тонушуш пурситигә еришти.
Мухбиримиз шөһрәт һошур
2009-06-09
Share
Yawa-kepter-girmanche-305.jpg Хитай тәрипидин 10 йиллиқ кесилгән йаш қәләмкәш нурмуһәммәт йасинниң "йава кәптәр" намлиқ бәдиий әсириниң түрк йазғучиси мәмәт айдәмир әпәнди нәшргә тәййарлиған немисчә нәшириниң муқависи.
www.amazon.de / Author Memet Aydemir

Бу пурсәттә улар, уйғур қәләмкәшлириниң нөвәттики вәзийити һәққидә мәлумат бәрди һәм уларни уйғур қәләмкәшлириниң әмәлий қийинчилиқлириға ярдәм беришкә чақирди.

Хәлқара қәләмкәшләр җәмийити уйғур қәләм мәркизиниң баш катипи қәйсәр абдурусулниң билдүришичә, бу қетимқи йиғин өткән һәптиниң дүшәнбә күнидин җүмә күнигичә 5 күн давам қилған; хәлқаралиқ ипадә әркинлики йиғини дәп аталған бу йиғинни хәлқара қәләмкәшләр мәркизи, (IFEX) хәлқара тор мәркизи, хәлқара инсан һәқлири тори қатарлиқ үч чоң тәшкилат бирликтә уюштурған. Йиғинға хәлқарадики 124 чоң - кичик тәшкилаттин 500 дин артуқ киши қетилған. Норвигийидики һәр қайси әлчиханиларниң алақидар мәсуллириму йиғинға иштирак қилған. Йиғинда асаслиқи ипадә әркинлики, җүмлидин нәшрият - ахбарат вә интернет әркинликиниң нөвәттә дуч келиватқан мәсилилири; һөкүмәт вә партийиләрниң тәшвиқатчилиқи билән әркин вә мустәқил пикир баян қилиш арисиидики тоқунушлар муһакимә қилинған.

Йиғинға қатнашқан уйғур паалийәтчиләр болса, уйғур торлириниң чәклимигә учраш әһвали, чәтәлдики битәрәп ахбарат хәвәрлириниң уйғур районида тарқитилишта чәклимигә учраватқанлиқи; уйғур қәләмкәшлири дуч келиватқан ашкара вә йошурун тәһдитләр һәққидә мәлумат бәргән. Уйғур қәләм мәркизи йиғинида, түрмидики мәһбуслардин нурмәмәт ясин, күрәш һөсәйин вә мәһбубә абләш мәсилисини қайта оттуриға қойған. Булар билән бирликтә йәнә, мустәқил тәтқиқатчи илһам тохтиниң уйғурбиз тор бетиниң тақилиши вә униң нәзәрбәнт астиға елинишиниму уйғурларниң ипадә әркинлики мәсилиси қатарида оттуриға қойған.

Қәйсәр абдурусулниң билдүрүшичә, хәлқара қәләмкәшләр җәмийитиниң әзалири рәсмий әзалар вә ғәйрий рәсмий әзалар болуп икки түрлүктур. Нөвәттә уйғулардин 4 киши хәлқара қәләмкәшләр җәмийиниң ғәйрий рәсмий әзаси; булардин нурмәмәт ясин нөвәттә 30 дин артуқ дөләттики қәләмкәшләр җәмийитиниң пәхрий әзаси; униң ява кәптәр намлиқ әсири һазирғичә ингилизчә вә түркчә тилға тәрҗимә қилинған. Һазир бу әсәр вингирчигә тәрҗимә қилинмақта.

Уйғур қәләм мәркизи нурмәмәт ясин мәсилисини хәлқара сәһнидә техиму юқири орунға елип чиқиш үчүн, хәлқара қәләмкәшләр җәмийитигә 2010 ‏ - йилни ява кәптәр йили қилип бекитиш һәққидә тәклип сунған.

Хәлқара қәләмкәшләр җәмийитиниң паалийәт программилиридин бири, қийинчилиқта қалған қәләмкәшләргә ярдәм бериштур. Уйғур қәләм мәркизи бир нәпәр уйғур язғучиниң панаһлиқ мәсилиси һәққидә хәлқара қәләмкәшләр җәмийитидин қайта ярдәм сориған.

Бу қетимқи йиғинға уйғур қәләм мәркизидин қәйсәр абдурусул вә абдурешит һаҗи керимидин башқа, дуня уйғур қурултийиниң баш катипи долқун әйсаму қатнашқан. Долқун әйса йиғин җәрянида, норвигийидики һәр қайси дөләт әлчиханилириниң мәсул хадимлири билән көрүшүш пурситигә еришкән. У канада әлчихана хадими билән көрүшкән чеғида, һүсәйин җелил мәсилисидики йеқинқи әһваллар һәққидә пикир алмаштурған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт