Уйғур тамақлири қәйсәри шәһиридә өткүзүлгән тамақ байримиға қатнаштурулди

Йемәк - ичмәк бир милләтниң мәдәнийитини бәлгиләйдиған әң муһим амилларниң биридур. Уйғур тамақлири қәдимий тарихқа игә. Бурун уйғур тамақлири пәқәт хитай вә оттура асия түркий җумһурийәтлиридила яхши тонулған болса, һазир уйғур аммиви тәшкилатлириниң тиришчанлиқи билән пүтүн дуняда тонулушқа башлиди.
Мухбиримиз әркин тарим
2010-05-19
Share
Turkiyide-tamaq-bayrimi-Uyghur-tamiqi-Qeyseride-305.jpg Сүрәт, 2010 - йили 5 - айниң 21 - күнигичә давамлишидиған, түркийиниң қәйсәри шәһиридики әрҗийәс университетида өткүзүлүватқан тамақ байримида, уйғурларға вакалитән шәрқий түркистан мәдәнийәт вә һәмкарлиқ җәмийити айаллар комитетиниң башлиқи рабийә илктүрк ханим вә муавин башлиқи хәйригүл ханимлар башчилиқидики уйғур тамақлирини тонуштуруш "ресторани"дин бир көрүнүш.
RFA Photo / Erkin Tarim

Уйғур тамақлири үч күндин буян түркийиниң қәйсәри шәһиридики әрҗийәс университетида өткүзүлүватқан тамақ байримида көрситилмәктә. Мәзкур тамақ байримиға түркийиниң 81 вилайитидин кәлгән кишиләр қатнишиватқан болуп, уйғурларға вакалитән қәйсәридә паалийәт елип бериватқан шәрқий түркистан мәдәнийәт вә һәмкарлиқ җәмийити аяллар комитетиниң башлиқи рабийә илктүрк ханим вә муавин башлиқи хәйригүл ханимлар қатнашти.

5 - Айниң 21 - күнигичә давам қилидиған бу тамақ байримиға 31 миң әтрапида кишиниң қатнишидиғанлиқи пәрәз қилинмақта. Уйғурлар бу пурсәттин пайдилинип, уйғур тамақлирини тонуштурмақта. Улар, 3 күндин бери уйғурларниң полу, манта, һорнан, ләғмән, қорума чөп вә кавап қатарлиқ йемәклирини сатмақта. Улар йәнә, булардин башқа рәсим көргәзмиси ечип, 5 - июл үрүмчи вәқәсини чүшәндүрмәктә .
Turkiyide-tamaq-bayrimi-Uyghur-tamiqi-Qeyseride-1-305.jpg
Сүрәт, шәрқий түркистан мәдәнийәт вә һәмкарлиқ җәмийити айаллар комитетиниң башлиқи рабийә илктүрк ханим вә муавин башлиқи хәйригүл ханимлар башчилиқидики уйғур тамақлирини тонуштуруш "ресторани"дин бир көрүнүш.
RFA Photo / Erkin Tarim

Әрҗийәс университетида өткүзүлүватқан уйғур тамақлирини тонуштуруватқан уйғур аяллири, шәрқий түркистан мәдәнийәт вә һәмкарлиқ җәмийити мәсуллиридин абликим әпәнди һәм уйғур тамиқи йәватқан херидарлар мәзкур паалийәт вә уйғур тамақлири һәққидә тохталди.

Тамаққа еғиз тәккән херидарларниң һәммиси бирдәк һалда уйғур тамақлириниң бәкла тәмлик икәнликини билдүрүшти.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт