ئۇنىڭ بىلدۈرۈشىچە، خىتايلارنىڭ مەجبۇرىي مائارىپ تۈزۈمى ئىلگىرى 9 يىلدىن 11 يىلغا ئۇزارتىلغان بولۇپ، ئۇيغۇر ئۆسمۈر بالىلىرىمۇ مەكتەپلەرگە مەكتەپكە كىرىش يېشىدىن بۇرۇن مەجبۇرىي يىغىۋېلىنىدىكەن.
ناھىيىلىك باشلانغۇچ مەكتەپتە 2 يىلدىن ئارتۇق ئوقۇتقۇچىلىق بىلەن شۇغۇللانغان سالامەت خانىم، بىر سائەتتىن ئارتۇق داۋام قىلغان سۆھبىتىمىزدە، بۈگۈنكى مەجبۇرىي مائارىپ سىستېمىسىدا سۇيىقەستلىك پىلانلارنىڭ بارلىقىنى بىلدۈردى.
ئۇ يەنە، خىتايلارنىڭ باشلانغۇچ ۋە ئوتتۇرا مەكتەپلەردىكى ئەقىللىق بالىلارنىڭ تاللىۋېلىپ، مەخسۇس مەكتەپلەرگە ئەۋەتىش ئارقىلىق ئاسسىمىلياتسىيە سىياسىتىنى تېزلىتىۋاتقانلىقى، ئائىلىدىن ئۇزاقلاشتۇرۇپ تەربىيىلەنگەن بالىلار بىلەن ئۆز خەلقى ۋە ئۇرۇق-تۇغقانلىرى ئارىسىدا ھاڭ پەيدا بولۇۋاتقانلىقى، ئۆرپ-ئادەتلىرىدىن ياتسىراشتەك ئالامەتلەرنىڭ بارغانسېرى كۆرۈنەرلىك بولۇۋاتقانلىقى، ئاتالمىش ئەلاچىلار سىنىپىغا كىرەلمىگەن بالىلارنىڭ پسىخىكىلىق زەربىلەرگە ئۇچراپ، ئوقۇشتا چېكىنىپ كېتىۋاتقانلىقى، ئاتا-ئانىلارنىڭ كەلگۈسى ئىستىقبالىنى كۆزلەپ خىتايچە مائارىپنىڭ جەزىبىلىرىگە ئالدىنىۋاتقانلىقىنى بىلدۈردى.