“Wall stritni ishghal qilish” herikiti pütün dunyagha kéngeydi

Xongkongda chiqidighan “Maliye xewerliri” gézitide mundaq dep teswirlinidu: buningdin bir ay burun, 17‏-séntebir küni nyu-york shehiride, bir qanche adem teshebbus qilip bashlan'ghan “Wall stritni ishghal qilish” herikitining, hazirqidek pütün dunyagha kéngiyip dunyawi heriketke aylinip kétishini héchkim tesewwur qilmighan idi. Mana hazir, 16‏-öktebir küni “Wall stritni ishghal qilish” herikiti alliqachan töt qit'ege hem okyaniyige kéngiyip boldi. En'gliye, gérmaniye, fransiye qatarliq tereqqiy qilghan döletlerdimu “Yawropache wall stritni ishghal qilish” ewj aldi.

Muqim dahiysi bolmighan tarqaq halettiki kishiler birxil qizghinliq we arzu-hewes bilen qozghighan bu ammiwi heriket, pütünley intérnéttiki faysbuk, tiwitér dep atilidighan tor ponkitliri arqiliq özining qollighuchiliri bilen alaqe qilip qanat yaydurulup, pütün yer sharidiki xelq ammisini iqtisadiy jehette tengsizlik peyda qilghan nuqtilargha naraziliq ipadilesh nishanigha yetküzdi.

B b s ning bayan qilishiche, ötken shenbe küni nyu-york shehirining pay baziridiki namayish sheherning téximu awat, téximu sezgür yéridiki “Dewr meydani” gha köchürüp kélin'gen. Los anjilis shehiridiki 5 ming ademlik kocha namayishimu sheherlik hökümetning aldigha yötkep kélin'gen. Pitsburg shehiridiki 2 ming kishilik namayishmu kocha marshigha aylandurulghan. Bu namayishlarning hemmiside, baylar bilen namratlar otturisida peyda qilin'ghan perqlerge qarshi turidighan sho'arlar towlan'ghan.

Ötken shenbe küni yene, pütün dunya miqyasida 900 din artuq sheherning iqtisad-pul mu'amile merkezliride, nyuyorktikige oxshash daghdughiliq namayish bolghan. Ispaniyining madérit shehiri, portigaliyining lisbén shehiri, grétsiyining afina shehiridiki namayishqa qatnashqan adem sanimu bir nechche mingdin ashqan. Peqet italiyining rim shehiride ötküzülgen 500 kishilik namayishlar, hökümetsizlikni teshebbus qilghuchi guruhlar arilishiwalghanliqtin zorawanliq heriketke aylinip qalghan.

Roytérs agéntliqining bayan qilishiche, ötken shenbe küni kanadaning toronto shehiridiki pul -mu'amile merkizide yüz bergen namayishta “Torantoni qayturuwalayli” dégen sho'ar otturigha qoyulghan. Kanadadiki “Abbustér” dep atilidighan eng chong élan-sen'et gézitining sahibi kall lason, “Wall stritni ishghal qilish” namayishini 10‏-ayning 29 ‏-küni pütün dunyada bir künde, bir waqitta élip bérish, 11‏-ayda fransiyide échilidighan 20 chong sana'etleshken dölet bashliqliri yighinida dawamlashturush, uningda birdekla baylar bilen namratlar otturisida peyda qilin'ghan perqlerge qarshi turidighan sho'arlarni towlash teshebbusini otturigha qoyghan.

Washin'gton post gézitide bayan qilinishiche, b d t bash katipi bankimun 17‏-öktebir küni “Wall stritni ishghal qilish” herikiti heqqide qilghan sözide, “Wall stritni ishghal qilish” herikitige qatnashqan xelq ammisi, özlirining dunya xaraktérlik iqtisadiy kirzisning zerbisige uchrighandin kéyinki naraziliq keypiyatini ipadilidi, her qaysi dölet rehberliri choqum milyonlighan xelqning derdige yétishi kérek, dep körsetken.