Wén jyabawning ziyaritidin kéyin ikki koriye otturisidiki jiddiylik peseydimu yaki ulghaydimu?

Xitay bash ministiri wén jyabaw 5 ‏ - ayning 28‏ - künidin 30‏ - künigiche jenubiy koriyini ziyaret qildi. 31‏ - Chésla yaponiyini ziyaret qildi. Bügün 6‏ - ayning 1‏ - küni tashqi mongghuliyige keldi.
Muxbirimiz weli
2010.06.01
Share on WhatsApp
Share on WhatsApp
Wen-Jyabaw-Koriye-Yapon-Xitay-yighinida-305.jpg Süret, xitay bash ministiri wén jyabaw 5 ‏ - ayning 28‏ - künidin 30‏ - künigiche jenubiy koriyini ziyaret qilghinida melum yighinda söz qiliwatqan körünüshi.
AFP Photo

Wén jyabaw shimaliy koriyini ochuq - ashkara ismini atap eyiblimidi

'Xelq'ara pul mu'amile géziti' de bayan qilinishiche, wén jyabaw jenubiy koriyni ziyaret qilish jeryanida, jenubiy koriyining 'chonen' belgilik herbiy paraxotini shimaliy koriyining, su minasi bilen partlitip chöküriwetkenliki heqqidiki pakitni körgendin kéyin, gerche 'weqe peyda qilghan terepke yan basmaymiz' dep jakarlighan bolsimu, emma weqe peyda qilghan shimaliy koriyini ochuq - ashkara ismini atap eyiblimidi. Emma 'ikki terep özünglarni bésiwélinglar', 'toqunush yüz bérishtin saqlinish kérek' dégenni aghzidin chüshürmidi. Belki bu arqiliq jiddiylikni peseytish xiyalida boldi.

Yaponiyige kelgende, yapon padishahigha xu jintawning salimini yetküzüp ziyaritini tügetti

Birleshme agéntliqining bayan qilishiche, xitay bash ministiri wén jyabaw yaponiyige kelgende, yaponiye bash ministiri yuki'o xatoyama, jenubiy koriyining paraxotini chöktürüwetken shimaliy koriyige qarita xelq'ara qanun buyiche jaza qollinish kéreklikini, b d t ning bixeterlik kéngishi jenubiy koriyining teleplirige bina'en qarar chiqirishi kéreklikini otturigha qoyghanda, b d t bixeterlik kéngishide shimaliy koriyini jazalash heqqide élin'ghan qararlargha bashtin -axir ret qilish hoquqini qollinip kéliwatqan xitay hökümitining bash ministiri wén jyabaw yene bu mesilidin özini qachurup, ikki koriye otturisida hazirqidek jiddiylik boluwatqan ehwal astida, xitay bilen yaponiye otturisida 'dexlisiz uchur liniyisi' qurushni, shundaqla hazirqi waqitta, xitay bilen yaponiye sériq déngizda hemkarliship néfit qézish heqqide sözlishishni otturigha qoyghan.

Héchqandaq pikir birliki hasil bolmighan bundaq söhbettin kéyin, wén jyabaw yaponiye padishahigha xu jintawning salimini yetküzüp we uningdin 'xitay bilen yaponiye otturisida tarixtin buyan üzlüksiz dawamlishiwatqan dostluqni qedirlesh'ni telep qilip ziyaritini ayaghlashturghan.

Pényongda uyushturulghan 10 ming kishilik yighilishta urush qilishqa irade bildürülgen

Xitay bash ministiri wén jyabaw jenubiy koriyini ziyaret qiliwatqan peytte, shimaliy koriyide chong yighilish uyushturulup, urush qilishqa irade bildürülgen. Xongkong yazghuchisi mey yentingning pényongdin bayan qilishiche, hazir xelq'arada jenubiy koriyining 'chonen' belgilik herbiy paraxotini chöktürüwetkenlik mesilisi üstide jiddiy muzakire boluwatqan ehwal astida, 5‏ - ayning 30 ‏ - küni shimaliy koriyining paytexti pényongdiki kém irson meydanida, kim yong'él özi qatnashmighan halda ötküzülgen chong yighilishqa 10 mingdin artuq adem qatnashqan. Bu yighilishta 'jenubiy koriyining herbiy paraxoti chökürülgenlikini bahane qilish --- koriye yérim arilida tinchliqni buzush üchün pilanlan'ghan süyiqest' dep jakarlighan. Shundaqla yene 'chawshen xelqi bu süyiqestke qarshi urush qilishtin yanmaydu' dep irade bildürülgen.

'Shimaliy koriyining ighwagerchiliki bir qétimdila toxtap qalidighan ighwagerchilik emes'

Amérikida chiqidighan 'bügün' gézitide bayan qilishiche, amérika herbiy qisimliri qomandanliq shitabining bashliqi adémiral maykol mullén ' tejribilerdin qarighanda, shimaliy koriyining ighwagerchiliki bir qétimdila toxtap qalidighan ighwagerchilik emes, u yene tekrarlinidu. Bolupmu shimaliy koriye hazirqidek jenubiy koriye bilen hemme alaqini üzgen ehwal astida, bu rayondiki jiddiylik asan peseymeydu' dédi.

'Amérika okinawagha f ‏ - 22 belgilik urushchi ayropilanlirini ewetti'

Shinxu'a agéntliqi bügün bayan qilishiche, shimaliy koriyining 'emgek xewerliri' géziti " amérika hazir jenubiy koriyining 'chonen' belgilik herbiy paraxoti chöktürülgen weqeni bahane qilip, yaponiyining okinawa arilidiki herbiy bazisigha f ‏ - 22 belgilik urushchi ayropilanlirini ewetti, shundaqla yene, jenubiy koriye bilen herbiy manéwér ötküzüshning teyyarliqini körüwatidu ؛ koriye yérim arilida yüz bériwatqan jiddiylikni amérika bilen jenubiy koriye birlikte peyda qildi, buningdin kélip chiqqan aqiwetke amérika bilen jenubiy koriye jawabkar " dep jakarlighan.

'Rusiye yapon déngizida herbiy meshiq ötküzüwatidu'

Shinxu'a agéntliqining moskwadin bayan qilishiche, ikki koriye otturisida jiddiylik yüz bériwatqan ehwal astida, rusiye ötken jüme künila yapon déngizida herbiy meshiq élip bérishqa bashlighan idi. Bu herbiy meshiq del koriye yérim arilida yüz bériwatqan jiddylikke qaritilghan. Jenubiy koriye prézidénti li myongbak bolsa öz xelqini shimaliy koriyining herbiy ighwagerchilikige taqabil turush üchün teyyarlinishqa chaqirghan.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.