Хитай баш министири вен җябав рәсмий зиярәт үчүн түркийигә кәлмәкчи

Түркийә баш министирлиқидин игилигән мәлуматларға асасланғанда, түркийә баш министири рәҗәп таййип әрдоған хитай баш министири вән җябавни 10 - айниң 8 - күни әнқәрәдә рәсмий мурасим билән күтүвалидикән.
Мухбиримиз әркин тарим
2010-10-05
Share
Dr-Erkin-ekrem-we-Dr-Sinan-ogan-305 Сүрәттә, түркийә истратегийә тәтқиқат мәркизи мудири др. Синан оган вә түркийә истратегийилик чүшәнчә институти мутәхәссиси др. Әркин әкрәм әпәндиләр.
RFA Photo / Erkin Tarim

Кейин икки дөләт һәйәтлири оттурисида музакирә елип берилидикән, ахирида түркийә баш министири рәҗәп таййип әрдоған билән хитай баш министири вен җябав бирликтә мухбирларни күтүвелиш йиғини өткүзидикән.

Йәнә башқа ишәнчилик мәнбәләрдин игилигән мәлуматларға қариғанда, бу қетимқи учришишта түркийә билән хитай оттурисидики сода мунасивәтлиридин башқа йәнә түркийә билән хитайниң афғанистан, явро - асия вә оттура шәрқтики мәсилиләрни һәл қилиштики һәмкарлиқлири тоғрисидиму музакирә елип берилидикән.

2009 - Йили, 6 - айниң ахирида түркийә рәис җумһури абдуллаһ гүл хитайға рәсмий зиярәт елип барғанда, үрүмчигиму барған иди. Бу зиярәттин бир һәптә кейин 5 - июл үрүмчи вәқәси йүз бәрди.
 
Үрүмчи вәқәсидин кейин түркийә баш министири рәҗәп таййип әрдоған хитайни үрүмчидә "ирқий қирғинчилиқ елип барди" дәп әйиблигән, шуниң билән икки дөләт мунасивәтлиридә җиддийлишиш пәйда болған иди. Кейин узун өтмәй, түркийә малийә министири мәмәт шимшәк билән тиҗарәт министири зафәр чағлаян хитайни зиярәт қилған , арқидин хитай ташқи ишлар министири яң җийечи билән тиҗарәт министири чен демиң түркийини зиярәт қилған иди. Бу учришишларда сода тохтамнамилиригә қол қоюлуп, икки дөләт оттурисидики мунасивәтни күчәйтиш һәққидә вәдиләр берилгән иди.

5 - Июл үрүмчи вәқәсидин кейин хитай һөкүмити түркийә билән болған мунасивитини тәрәққи қилдуруш үчүн алаһидә әһмийәт бәргән болуп, түркийә билән хитай оттурисидики тиҗарий тәңпуңсизлиқта яхшилиниш пәйда болған. Түркийә сода вә санаәт министирликиниң баянатиға асасланғанда түркийиниң хитайға қилған експорти өткән йилдикигә қариғанда 9% көпәйгән.
     
Абу учришишлар нәтиҗисидә түркийә - хитай мунасивитидә немә өзгиришләр болди? 5 - июл үрүмчи вәқәсидә хитайни "ирқий қирғинчилиқ қилди" дәп әйиблигән рәҗәп таййип әрдоған бу қетимқи учришишта уйғур мәсилисини оттуриға қоярму? хитай баш министири вен җябавниң бу қетимқи зияритиниң уйғур мәсилисигә қандақ тәсири болар? түркийә тиҗарий мәнпәәт үчүн уйғур мәсилисини тилға алмай қоярму? дегәнгә охшаш соалларға җаваб тепиш үчүн түркийә истратегийә тәтқиқат мәркизи мудири др. Синан оган вә түркийә истратегийилик чүшәнчә институти мутәхәссиси др. Әркин әкрәм әпәндиләргә микрафонимизни узаттуқ.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт