Türkiye xalisane birleshme fondining yighinida Uyghur mesilisi otturigha qoyuldi

2011‏-Yili 4-ayning 18-küni merkizi istanbulgha jaylashqan türkiye xalisane birleshme fondining kelgüside élip bérilmaqchi bolghan ish-pilanliri heqqide muzakire yighin ötküzüldi.
Ixtiyariy muxbirimiz arslan
2011.04.25
turkiye-halisana-birleshme-fondi-305.jpg 2011‏-Yili 4-ayning 18-küni merkizi istanbulgha jaylashqan türkiye xalisane birleshme fondining kelgüside élip bérilmaqchi bolghan ish-pilanliri heqqide muzakire yighin ötküzüldi.
RFA/Arslan

Merkizi istanbulgha jaylashqan türkiye xalisane birleshme fondining uyushturushi bilen tetqiqat we medeniyet fondining yighin zalida ötküzülgen bu, yighinda yene Uyghur mesilisimu otturigha qoyuldi we Uyghur mesilisi toghrisida uyushturulghan yighin-murasim we pa'aliyetlerni qollap quwwetlesh tekitlendi.

Yighin'gha tetqiqat we medeniyet fondining re'isi shemsidin özdémir ependi sahibxaniliq qildi. Türkiye xalisane birleshme fondining re'isi proféssor doktor nijati jeylanning bashchiliqida échilghan bu yighin'gha i ha ha insaniy yardem fondining mu'awin re'isi hüseyin uruch, insan fondining bash katipi ayxan ogan, sherqiy türkistan ma'arip we hemkarliq jem'iyitining re'isi hidayetullah oghuzxan we bash katip doktor alimjan atawullah, doxturlar birliki fondidin hesen awshar, ensar fondining wekili yashar shad'oghlu, xeyrat fondidin métin uchar, hayat fondidin doktor hesen selchuq, musteqil sana'et we karxanichilar jem'iyitidin eyup akbal qatarliq rehberler qatnashti.

Yighinda türkiye xalisane birleshme fondining buningdin kéyin élip barmaqchi bolghan xizmet ish-pilanliri toghrisida muzakire élip bérildi. Yighinda sherqiy türkistan ma'arip we hemkarliq jem'iyitining bash katipi doktor alimjan atawullah söz qilip, Uyghurlarning yéqinqi weziyiti toghrisida melumat berdi we sherqiy türkistan ma'arip we hemkarliq jem'iyitining uyushturushi bilen bu yil 6-ayning 19-künidin 27-künigiche istanbulda 3-nöwetlik dunya sherqiy türkistanliqlar qérindashliq yighini dégen nam astida ötküzülmekchi bolghan xelq'araliq yighinning muweppeqiyetlik bolushi üchün türkiye xalisane birleshme fondining pikir-teklip bérishni we qollap quwwetlishi shundaqla bu fondigha eza 120 jem'iyet we teshkilatlarning qollap-quwetlep, yighin'gha aktip qatnishishini teklip qildi.

Türkiye xalisane birleshme fondi türkiyidiki oxshimighan jem'iyet we teshkilatlarning birliki bolup bu fond 1991‏-yili istanbulda qurulghan, bu fondigha hazirghiche türkiyide pa'aliyet qiliwatqan ijtima'iy teshkilatlardin 120 ammiwi teshkilat we jem'iyetler eza bolghan. Sherqiy türkistan ma'arip we hemkarliq jem'iyiti bu fondqa 2008-yili eza bolghan bolup, xizmet-pa'aliyetlerde bu fond bilen yéqindin hemkarliship kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.