Xariy fan bommél:bu xelq'araliq kishilik hoquq ehdinamisige xilap heriket boptu
2011.06.21

2011-Yili 20-iyun gollandiyining denhax shehirige jaylashqan parlamént binasida Uyghur, mongghul we xitay aktipliridin teshkillen'gen bir guruppa pa'aliyetchiler, gollandiye parlamént ezasi, sp partiyisining gholluq rehbiri we Uyghurlargha yardem bérish guruppisining qurghuchisi xariy fan bommél ependi bilen körüshüp, nöwettiki muhim mesililer heqqide doklat berdi.
Gollandiye Uyghur birliki teshkilati rehberliridin bextiyar nasir we gheyretjan rozi ependilerning teshkillishi bilen orunlashturulghan bu söhbetke, gérmaniyide turushluq mongghul xelq partiyisining bashliqi témtsiltu shobtsod ependi, démokratik pa'aliyetchisi wéy go'angjong ependi we uning xanimi, gollandiyide turushluq xitay démokratlashturush herikitining aktipliridin mona jimintang xanim qatarliqlar qatnashti.
Söhbet ershidin isra'il mesilisi arqiliq dunyaning herqaysi jaylirida yashawatqan Uyghur muhajirliri duch kéliwatqan tehditler, gollandiyidiki iltija ishliri hel bolmaywatqan panahlan'ghuchilar we bu qétim yéngi élan qilin'ghan “5-Iyul ürümchi qirghinchiliqi” gha a'it filimni merkez qilghan üch asasi nuqtigha merkezleshti.
Filim söhbet ishtirakchilirigha neq meydanda körsitilgendin kéyin, hemmeylen dégüdek qattiq ghezeplendi we ziyaritimizni qobul qilip bu heqte öz ipadisini bildürdi.
Xitay démokratlashturush herikitining aktipliridin mona jimintang xanim mezkur filim heqqidiki héssiyatini ipadilep: insanlargha qaritilghan bu xil haqaretni til bilen ipadilesh ajizliq qilidu, dédi.
Parlamént ezasi xariy fan bommél ependi filim heqqidiki inkasini ipadilep: bu xelq'araliq kishilik hoquq ehdinamisige xilap bir heriket boptu, dédi.