Qeshqerde xetme qur'an pa'aliyiti amanliq xadimlirining nazariti astida ötküzülmekte

Qeshqerde ahaliler xetme qur'an ötküzüshte, alaqidar komitétlardin ruxsetname élishtin bashqa yene, xetme qur'anning bashlinishi üchün shu jaydiki bir amanliq xadimining sorunda hazir bolushi shert qilinmaqta.

Uyghur élide diniy étiqad erkinlikining éghir derijide cheklimige uchrawatqanliqini xelq'ara insan heqliri teshkilatliri we Uyghur pa'aliyetchiliri yillardin béri tekitlep kelmekte. Xitay hökümiti bolsa xitayda puqralarning diniy erkinlikining toluq kapaletke ige ikenlikini, Uyghurlarningmu bu hoquqtin yéterlik derijide behrimen boluwatqanliqini izchil halda tekrarlimaqta. Emma, ashkarilinip qéliwatqan bezi ehwallar, xitayning Uyghur élide diniy sorunlarni bashqurushta bezi diniy qa'ide we ehkamlarni éghir derijide depsende qiliwatqanliqini ispatlimaqta.

Biz ahalilerning bu inkasining toghriliq derijisini éniqlap béqish üchün؛ qeshqerdiki héytgah meschitige téléfon qilduq. Meschit hey'etliridin biri yuqiriqi inkasning toghriliqini ispatlidi.

Diniy erkinlik, tereqqiy qilghan bir dölet we medeniyetlik bir jem'iyet üchün bügün aldinqi qatardiki ölchemlerdin biri süpitide qobul qilinmaqta.

Xelq'ara qanunlarda diniy erkinlik yalghuz ibadet sorunlirigha ige bolush emes, belki diniy pa'aliyetlirini herqandaq bir tehdit, herqandaq mejburlashlardin xaliy halda erkin we azade élip bérish dep körsitilmekte, emma xitay hökümiti bolsa, islam dinini sotsiyalizm üchün xizmet qildurush, döletning pütünlüki we jem'iyetning muqimliqi üchün xizmet qildurush sho'arini ikkilenmestin ashkara halda teshwiq qilmaqta. Uyghur diniy zatlar bu ehwalni islam dini we uninggha étiqad qilghuchilargha qilin'ghan haqaret dep qarashmaqta.