Xeymin baziridiki namayish jiddiy inkas qozghidi

Seyshenbe küni xeymin bazirida nechche minglighan sheher ahalisi hem yéridin ayrilghan 500 din artuq déhqan bazarliq hökümet binasi aldigha toplinip, shu jayda qurulmaqchi bolghan éléktr istansisi qurulushigha naraziliqini bildürgende namayishchi amma saqchilarning tutqun qilishigha uchrap, 100 nechche ademning yarilan'ghanliqi melum boldi.

Gu'angdung ölkisi xeymin baziridin charshenbe küni radi'omiz ziyaritini qobul qilghan puqralarning bildürüshiche, bazarliq hökümet da'iriliri puqralarning naraziliq namayishining kéngiyip kétishining aldini élish üchün, zor türkümde saqchilarni yötkep kélip, namayish bashlamchilirini tutqun qilghini üchün, namayishning dawami ghezeplen'gen amma bilen saqchilar otturisidiki toqunushqa aylinip nurghun adem yarilan'ghan.

Xeymin baziridin radi'omiz ziyaritini qobul qilghan sün xanimning bildürüshiche, saqchilar seyshenbe küni kechqurun namayish bashlamchilirini tutqun qilghinida, puqralarning qarshiliqigha duch kelgen.

Xeymin baziridiki chén ependi bolsa bu qétimqi namayishta tutqun qilin'ghan yash oqughuchilarning birqeder köplükini, tutqun qilin'ghanlar arisida ayallarmu barliqini bildürdi.

Xitayning ammiwi tor béketliride élan qilin'ghan bashqa uchurlardin melum bolushiche, xeymin baziridiki naraziliq namayishi, charshenbe künimu dawamlashqan. Charshenbe küni bazarliq hökümet binasi namayishchilar teripidin qorshiwélinip, bazarliq hökümet derwazisi aldidiki taxtay éliwétilgen. Xeymin baziridin shénjin shehirige tutushidighan yuqiri sür'etlik tashyol namayishchi amma teripidin tosuwélinip, bu yolda qatnash toxtighan. Seyshenbe küni kéchidin bashlap, bazarliq hökümettiki saqchi da'iriliri öymu-öy axturup adem tutushni dawamlashturuwatqan bolup, saqchilar adem tutush jeryanida omumyüzlük halda bazardiki puqralarning qarshiliqigha uchrighan. Wezipe ijra qiliwatqan saqchilar qarshiliq körsetken puqralarni tok kaltiki qatarliqlar bilen urup yarilandurghan bolup, hazirghiche saqchilar teripidin yarilandurulghanlar 100 nechche kishige yetken. Bazarda puqralar arisida tarqalghan xewerlerdin melum bolushiche, saqchilarning adem tutushi jeryanida 3 kishi ölgen.

Xitayning shinxu'a agéntliqi qatarliq hökümet metbu'atliri xeymin baziridiki namayish heqqide bügün etigen xewer bergen bolsimu, emma namayish jeryanida tutqun qilin'ghanlar hem yarilan'ghanlar heqqide héchqandaq xewer bérilmidi. Radi'omiz xeymin baziridiki saqchi idarisidin ehwal igileshke tirishqan bolsimu, emma téléfonni alghan saqchi xadimi namayish heqqide melumat bérishni ret qildi.

Chet'ellerdiki siyasiy analizchilardin xu ping ependi radi'omiz ziyaritini qobul qilip, xeymin bazirida dawamlishiwatqan namayish hem ötken hepte gu'angdungning wuken kentide yüz bergen kent ahalisining hökümet kadirlirini qoghlap chiqirish weqesi heqqide öz qarashlirini otturigha qoydi.

Xu ping ependining bildürüshiche, gu'angdung ölkiside yüz bergen bu xil qarshiliq namayishlirini, puqralarning xitay hökümitining mustebit siyasiti, emeldarlarning chiriklishishi, rayon muhitining bulghinishi qatarliq mesililerge naraziliq bildürüsh yüzisidin qozghalghan naraziliq heriketlirining örniki déyishke bolidiken.

Xu ping ependi öz bayanida yene, xitayning nöwettiki bir partiyilik mustebit hökümranliq tüzümige özgertish kirgüzülmeydiken, xitayda iqtisad tereqqiy qilip, puqralar turmushida yaxshilinish bolghan teqdirdimu, xitayda bundin kéyin bu xil ammiwi naraziliq namayishlirining yenila dawamlishidighanliqini, belki barghanche köpiyishi mumkinlikini tekitlidi.

Xitay tor béketliridiki munazirilerde xitayda nöwette barghanche köpiyiwatqan her xil naraziliq namayishlirining sewebi heqqide inkaslar otturigha qoyuldi. Bu inkaslarning köpinchiside, nöwette xitayda barghanche nacharlishiwatqan kishilik hoquq xatirisi, hökümet da'irilirining peqet iqtisadiy ünümnila qoghliship, puqralarning hayati bixeterliki hem mal-mülki qatarliq biwasite iqtisadiy menpe'iti bilen kari bolmasliqi , puqralarning yashash muhitining barghanche bulghinishi qatarliq seweblerning bu xil naraziliq namayishlirining yüz bérishige seweb bolghanliqi otturigha qoyulup,aldi bilen xitay hökümitining jawabkar bolushi kérekliki ilgiri sürülgen.

Bu xil inkaslarda yene, xitay hökümiti agahlandurulup, hökümet da'irilirining peqet hazirqidek basturush, tutqun qilish arqiliqla mesilini hel qilalmaydighanliqi, peqet xitayda heqiqiy démokratik tüzüm ornitilghandila andin bu xil naraziliq heriketliri aziyidighanliqi tekitlendi.