Xeymin baziridiki namayishta ottura mektep oqughuchilirimu tutqun qilindi

Radi'omiz igiligen uchurlardin melum bolushiche, gu'angdung xeymin baziridiki puqralardin nechche ming kishi, peyshenbe küni xeymin baziridiki yuqiri sür'etlik tashyolning yol heqqi élish éghizigha toplishiwélip, naraziliq namayishini dawamlashturghan. Saqchilar öymu-öy axturup namayish qatnashchilirini tutqun qiliwatqan bolup, xeymin baziri weziyiti peyshenbe küni téximu jiddiyleshken.

Yutup tor békitige qoyulghan xeymin puqralirining peyshenbe künidiki namayish heqqidiki neq meydan filimidiki körünüshlerde, qoralliq saqchilarning kochida qoghlap yürüp adem tutuwatqanliqi, tayaq yewatqan yash oqughuchilarning “Saqchilar bizni uruwatidu”, “Saqchilar adem tutuwatidu”, “Ademlerni qoyup béringlar” dégen awazliri bar bolup, qol téléfon arqiliq tartilghan bu körünüshlerde tayaq zerbisidin béshi yérilghan, qoli yarilan'ghan yash oqughuchilarni saqchilar bésip baghlawatqan körünüshler eks etken.

Xeymin baziridiki puqralarning radi'omiz muxbirigha bildürüshiche, peyshenbe küni etigen texminen 2000 din artuq kishi,xeymin baziridiki yuqiri sür'etlik tashyolning yol heqqi élish ponkitigha toplashqanda, namayishchilarni basturup, adem tutush üchün kelgen saqchilar bilen toqunush yüz bergen. Shu jaydiki puqralarning bildürüshiche, saqchilar toplishiwalghan namayishchilarni tarqitiwétish üchün közdin yash aqquzush bombisi atqan. Namayishchi amma tarqilishni ret qilghandin kéyin, saqchilar namayish meydanigha bösüp kirip, tok kaltekliri bilen namayishchilarni urup, adem tutushqa bashlighan.

Radi'omiz ziyaritini qobul qilghan sün ependining bildürüshiche, saqchilar tutqun qilghanlarning zor köpchiliki yash balilar bolup, ularning ichide 15 yashqa kirmigen ottura mektep oqughuchiliri xéli köp iken. Saqchilardin tayaq yep yarilan'ghanlar bolsa peyshenbe küni kechkiche 300din ashqan.

Sün ependi peyshenbe küni chüshtin kéyin, sa'et 5 ler etrapida öz közi bilen körgen menzirini teswirlep mundaq deydu.
“Bügün peyshenbe küni bazarda soda toxtidi. Hetta gaz qachilash ponkitlirimu échilmaptu. Bazarni pütünley qoralliq saqchilar qorshiwaptu. Saqchi aptomobilliri hem ot öchürüsh aptomobilliri bazarda chirqirap yüridu. Men aptomobil heydep kétip bérip, qoralliq eskerlerning yuqiri süretlik tashyolning pul élish ornini qorshiwalghanliqini kördüm. Chüshtin kéyin, saqchilar közdin yash aqquzush bombisi atqan chaghda men kochida aptomobil heydep kétip barattim. Men yene saqchilarning qéchip kétip barghan yash oqughuchilarni uruwatqan menzirini kördüm. Bashqilardin anglishimche, hazirmu saqchilar bazarni qamal qilip, adem tutushni dawamlashturuwétiptu. Tutqun qilin'ghanlarning ichide 15 yashqimu kirmigen ottura mektep oqughuchiliri bar iken.”

Radi'omiz muxbiri bazardiki ottura mekteplerdin ehwal igilesh üchün téléfon qilghinida, téléfonni alghan mektep da'iriliri özlirining aldirashliqini bahane qilip, muxbirning ziyaritini qobul qilishni ret qildi.

Xitaydiki beydu qatarliq ammiwi tor béketliridiki shexslerning blogidiki uchurlardin melum bolushiche, xeymin bazirida birnechche kündin buyan dawamlishiwatqan puqralarning qarshiliq körsitish herikitide az dégende 5-6 kishi saqchilar teripidin urup öltürülgen. Emma, radi'omiz téléfonini alghan xeymin baziridiki hökümet da'iriliri muxbirlarning ziyaritini qobul qilishni ret qilghini üchün, hazirghiche xelq'ara metbu'atlar xewerliride bu qétim gu'angdung xeyminde yüz bergen namayishta, adem ölüsh weqesining yüz bergenliki xitay hökümet da'iriliri teripidin étirap qilin'ghanliqi heqqide éniq melumat bérilmidi.