Хитайниң 'аптоном районлар'да елип бериватқан тәшвиқати аптономийә сияситиниң ақмиғанлиқиниң ипадиси

Сүрәт, ху җинтавниң үрүмчидики хитай қораллиқ күчлирини көздин көчүргәндә сөз қиливатқан көрүнүши.

Хитайниң дөләт комиссари люйәндоңму үрүмчигә берип, бүгүн йәнә хуҗинтавниң йолюруқини өгиниш лазимлиқини тәкитлиди.

Хуҗинтавниң үрүмчидә қилған сөзидә чоңқур өгәнгидәк берәр йеңи нәзәрийә йоқ

Дуня уйғур қурултийиниң баянатчиси дилшат ришитниң қаришичә, хуҗинтавниң үрүмчидә қилған сөзидә чоңқур өгәнгидәк берәр йеңи нәзәрийә йоқ.

Униң ейтишичә, хуҗинтавниң дегәнлириниң һәммиси йәнила 60 йилдин буян дейиливатқан "милләтләр иттипақи" дегәндәк әмәлийәттә ақмиған кона гәпләр. 60 Йилдин буян ақмиған бундақ кона гәпләрни йәнила һәр қайси аптоном районларда кәң көләмдә өгинишни тәкитләшниң өзи, хитайниң аптономийә сияситиниң әмәлгә ашмиғанлиқи вә хәлқ уни қобул қимиғанлиқиниң ипадиси.

Хуҗинтав үрүмчигә мәсилини һәл қилғили әмәс, бәлки уйғурларни бастурғанларға илһам бәргили барди

Дилшат ришитниң қаришичә, хуҗинтав үрүмчигә мәхпий берип кәлди, у үрүмчигә мәсилини һәл қилғили бармиди , бәлки уйғурларни бастурғанларға илһам бәргили барди.

Әмма хитай һөкүмити һазир дөләт қурғанлиқиниң 60 йиллиқини тәбрикләш алдида туриватқан мушундақ пәйттә , башқа аптоном районлардиму 5‏- июл үрүмчи вәқәсидәк вәқә чиқип қалмаслиқиниң алдини елиш мәқситидә бундақ бир тәшвиқатни елип бериватиду.

Хитай һөкүмити һазир "хуҗинтавниң муһим йолюруқи" дәп дағдуғилиқ тәшвиқ қилишиниң йәнә бир тәрипи бар

Дилшат ришитниң қаришичә, һазир хитай һөкүмити 60 йиллиқини тәбрикләш алдида туруватқанда , хитай һөкүмитиниң өзидә һазир ишәнчә қалмиди, өзидә ишәнчә болса һечқачан тәбрикләшни мәшқ қилиш үчүнму һәрбий һаләт йүргүзүп турмайтти. У һазир пәқәт бастурушқила тайинидиған һалға чүшүп қалди.

Хитай әзәлдин өз ичидә мәсилә чиққанда, башқа милләтләр районида мәсилә пәйда қилип, бу арқилиқ өз ичидики мәсилиниң йөнилишини башқа яққа бурап келиватиду. Хитай һөкүмити һазир "ху җинтавниң муһим йолюруқи" дәп дағдуғилиқ тәшвиқ қилишиниң йәнә бир тәрипи бар , у болсиму, хитайниң өз ичидики қаршилиқларниң алдини елиш.