Хитай армийиси интернетни порох һеди йоқ җәң мәйданиға айландурмақчи

Америка мутәхәссислири муһим интернет матори болған гугул ториға вә ғәрб ширкәтлиригә һуҗум қозғиған хаккерларниң аптори хитай һөкүмити қоллаватқан кишиләр икәнликини ениқлап чиқип, буниң җәрянини бүгүн тәпсилий баян қилған иди.
Мухбиримиз вәли
2010.02.22
Share on WhatsApp
Share on WhatsApp

Хитай армийисиниң бир генерали дәрһал оттуриға чиқип, һөкүмәтни очуқ - ашкара һалда интернетни контрол қилидиған бир йеңи орган қурушқа чақирди.

Ройтрс агентлиқиниң бейҗиңдин баян қилишичә, хитай азадлиқ армийисиниң генерал майори хуаң юңйин бүгүн баянат елан қилип, хитай һөкүмитини дәрһал бир йеңи орган қуруп, интернетни контрол қилип, учурларни сүзүш - тәкшүрүш вә торларға хаккер билән һуҗум қозғап турушқа чақирған.

Хитай генерали хуаң бу чақириқини, нюйоркта чиқидиған 'малийә вақит гезити' бүгүн, гугул ториға һуҗум қозғиған хаккерлар һәққидики тәкшүрүш нәтиҗисини елан қилғандин кейинла оттуриға қойған. У һөкүмәтни очуқ - ашкара һалда интернетни контрол қилидиған бир йеңи орган қурушқа чақирған сөзидә, хитай мәркизи партийә мәктипиниң кадирлар муназирә мунбиридә оттуриға қоюлған 'интернет әмди порох һеди йоқ җәң мәйданиға айлиниду' дегән сөзни бивастә қолланған.

Хаккерлар шаңхәй қатнаш университети билән сәндуң алий пән - техника мәктипидики компютерлардин чиққанлиқи ениқланди

Бүгүн 'малийә вақит гезити' дә елан қилинған доклатта, америка мутәхәссислири муһим интернет матори болған гугул ториға вә ғәрб ширкәтлиригә һуҗум қозғиған хаккерларниң аптори хитай һөкүмитиниң қоллиши астидики кишиләр икәнликини ениқлап чиққан вә буниң җәрянини тәпсилий баян қилған иди.

Гугул ториға һуҗум қозғиған хаккерлар хитайниң дөләт бихәтәрлик мәслиһәтчиси, өзиниң қиливатқан ишини 'әркин кәсип' дәп ативалған 30 нәччә яшлиқ мәлум бир киши тәрипидин лайиһилигәнликини ениқлап чиққан америка интернет бихәтәрлики мутәхәссиси майкел кевенниң ейтишичә, хитайда лайиһилигән бу хил хаккерлар, тор әһлиниң компютерида интернет паалийитини йүрүштүрүп беридиған 'интернет кәзгүчи' Internet Explorer юмшақ деталиға чаплишивелип, интернеткә киргән башқа көп шәхсиниң паалийитини өзиниң ғәрәзлик һуҗуми үчүн хизмәт қилдуридикән.

Хәвәрдә ейтилишичә, америка мутәхәссислири пүтүн дуняда 'пиләк бойлап хәмәк изләш' усулини қоллинип, лайиһиләнгән бу хаккерларниң шаңхәй қатнаш университети билән сәндуң алий пән - техника мәктипидики компютерлардин чиққанлиқини ениқлап чиққан.

Хитай генерали җинайәтни иқрар қилип сәтләшкәндин көрә, ашкара һалда интернетни контрол қилидиған бир йеңи орган қурмақчи болуватиду

Шаңхәйдики мәлум бир алий мәктәптә компютер илми буйичә доктор кандидати болуп оқуватқан җаң фамилилик әпәндиниң радиомиз арқилиқ елан қилған мулаһизисидә баян қилинишичә, шаңхәй қатнаш университети билән сәндуң алий пән - техника мәктипи компютер техникисини тәрәққи қилдурушта дөләт мудапиә қисимлири вә қораллиқ сақчи қисимлар билән зич мунасивәт бағлап келиватқан мәктәп. Бу мәктәпләрдин оқуш пүттүргәнләр адәттә бивастә һәрбий қисимларға тәқсим қилиниду. 'Малийә вақит гезити' дә елан қилинған доклатта, хаккерларниң һуҗуми мушу мәктәпләрниң компютерлиридин башланған дегини ишәнчилик.

Бу әпәндиниң қаришичә, һазир хитай һөкүмити өзиниң интернеткә хаккер билән һуҗум қилған җинайитини дуня җамаәтчилики алдида етирап қилмай мумкин әмәс. Бу җинайәтниң хитай азадлиқ армийиси билән бивастә мунасивити бар. Шуңлашқа бүгүн бу мәсилә дуняға елан қилинған һаман, хитай армийисиниң генерали дәрһал оттуриға чиқип, хитай һөкүмитини җинайәтни иқрар қилип сәтләшкәндин көрә, бирақла очуқ - ашкара һалда учурларни тәкшүрүш вә хаккер билән һуҗум қозғап туруш арқилиқ интернетни контрол қилидиған бир йеңи орган қуруп чиқишқа чақирди.

Бу, хитайниң буниңдин кейин йәнә давамлиқ һалда, интернеттики учурларни сүзүш - тәкшүрүш вә дуняниң интернет системисиға хаккер билән һуҗум арқилиқ интернетни контрол қиливалмақчи болуватқанлиқидин, интернетни әмди порох һеди йоқ җәң мәйданиға айландуридиғанлиқидин дерәк берипла қалмастин, бәлки хитайда һазир иҗтимаий әхлақ, партийә, һөкүмәттин тартип, һәрбий қисимларғичә пүтүнләй бузулуп әсәбиләшкәнликини көрситиду.
 
Юқиридики аваз улинишидин, бу һәқтики мәлуматимизниң тәпсилатини аңлайсиләр.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт