Xitaydiki bay - kembeghellik perqige a'it sanliq melumatlar munazire peyda qildi

Emma bu reqemning emeliyetke qanchilik uyghunliqi, buning puqralar turmushini qanchilik derijide eks ettürüp béreleydighanliqi bolsa metbu'atlarda talash - tartish qilinmaqta. Ular asasliq xitaydiki bay - kembeghellik perqi mesilisige merkezleshken bolup, tenqidchiler birdek, xitay hökümitining bay - kembeghellik perqige a'it sanliq melumatlarni qesten yoshuruwatqanliqini ilgiri sürmekte.

Hörmetlik radi'o anglighuchilar, xitayning 2012 - yilliq omumiy ishlepchiqirish qimmitining örlesh nisbiti eslide nishan qilin'ghan 5. 7 Pirsenttin ashurup orunlinip 8. 7 Pirsentke yetküzülgen bolsimu, emma bu reqemlerning hemme kishini memnun qilmighanliqi körülmekte. Chünki közetküchilerning qarishiche, xitaydiki bu iqtisadi zoriyishtin nep éliwatqan kishiler chembiriki intayin kichik bolup, mutleq zor köpchilik yenila chembirekning sirtida. Xitaydiki bay - kembeghellik perqining zoriyish mesilisi hazir xitay rehberler uchrawatqan eng muhim bir riqabet. Xitayda bay - kembeghellik perqige a'it témilar siyasiy sezgürlükke ige bolghanliqtin hökümet bu heqtiki sanliq melumatlarnimu nahayiti éhtiyatchanliq bilen tilgha alidu. Eng axirqi qétim xitay hökümiti bay - kembeghellik perqini ipadilep béridighan xelq'ara birlik jini nomurini 2000 - yili ilan qilghandin béri bu heqtiki yéngi nomurlarni élan qilip baqmidi.

Jini nomuri - xelq'arada bir tutash birlikke kelgen bir birlik. U adette 0 bilen 1 arisida bolidu. Bir döletning nomuri nölge qanche yéqinlashsa, u shu dölette kirimning herqaysi qatlamlardiki tarqilishining shunche tengpungluqini ipadilep béridu. Eksiche bir nomurgha yéqinlashqanséri u kirim tengpungsizliqining shunche éghirliqini körsitip béridu. Adette bir döletning jini nomuri 3.0 Etrapida bolsa normal hésablinidu. Emma 4.0 Din éship 5. 0 Ge yéqinlashqan teqdirde bu perqning zorliqidin bisharet béridu. Xitay hökümiti 2000 - yili élan qilghan reqimide xitayning jini nomurini 0.474 Dep élan qilghan idi.

Xitaydiki iqtisadshunaslar aridin ötken 10 yildin artuq waqit ichide xitaydiki bay - kembeghellik perqide zor özgirish bolghanliqi, yeni bu ikki qatlam arisidiki hangning téximu chongqurliship ketkenlikige ishinidu. Emma bügün shinxu'a agéntliqining xitayning 2012 - yilidiki jini nomurining 2008 - yilidiki 0.491 Din töwenlep 0.474 Ke chüshkenlikini, yeni kirim perqining kichikligenlikini ilgiri sürüshi keng munazire qozghidi.

Xitayda bashqa axbaratlargha qarighanda bir qeder musteqil, dep tonulidighan jenubiy junggo seher géziti bu heqtiki xewiride özlirining tonulghan xitay iqtisad proféssori shü shyawshenni ziyaret qilmaqchi bolghanda, shü shawshüenning muxbirgha “Men bundaq yalghan reqemlerge qarap turup sözliyelmeymen” dégenlikini yazghan. Xewerde éytilishiche, xitaydiki wéybo tor bétide bu reqem heqqide keng inkaslar qozghilip ketken bolup, ularning hemmisi dégüdek shinxu'a agéntliqi élan qilghan jini reqimining rastliqidin guman qilghan. Bezi xitay tordashlar bu reqemni zangliq qilip “Chöcheklerdimu bunchilik mubalighe ishlitilmeydu” dése, yene beziler “Hökümet qachan bizge rast gep qilip baqqan, biz ezeldinla hikaye - chöchek ichide yashimaywatimizmu” déyishken.

Xitay hökümiti resmiy jini reqemliri heqqide statéstika élan qilmasliqigha xitaydiki yuqiri kirimlik kishilerge a'it uchurlarning téxi toluq yighilip bolalmighanliqini seweb qilip körsetmekte. Emma iqtisadshunas shü shawshüen hökümetning bahane körsitiwatqanliqini, jini reqimining da'irilerning qolida bolghan melumatlargha qarap turupmu hési'ablap chiqqili bolidighanliqini bildürgen.

Roytérs agéntliqining xewer qilishiche, xitayda 7. 2 Milyon neper dollar milyoniri we 251 neper milyardér bar bolsimu, emma xitay puqrasining 13 pirsenti künde 1 yérim dollarghimu yetmeydighan pul bilen turmush kechüridiken. Xitaydiki yéza ahalisining omumiy yilliq kirimi 3800 dollar etrapida iken. Ötken yil 12 - ayda chéngdudiki gherbiy jenub uniwérsititi iqtisad bölümi bir reqem élan qilip, xitayning jini reqimini 61. 0 Dep körsetken idi. Emma közetküchiler, meyli heqiqet shundaq bolsun - bolmisun, shinxu'a özi élan qilghan reqemlermu ehwalning xeterlik ikenlikini körsitip bérishke yétidu, dégen we bu weziyetni ongshash üchün derhal tedbir élinishi kéreklikini bildürgen.

Dunyada bay - kembeghellik perqi eng az döletler shwétsiye, daniye we gérmaniye bolup, ularning jini nomuri 2.0 Din 3. 0 Etrapida iken.

Uyghur közetküchiler bolsa, Uyghur élining xitaydiki namrat rayon hésablinidighanliqini, Uyghurlarning türlük jehetlerdin kemsitilishke uchrap yashawatqanliqini nezerde tutqanda, Uyghurlar bilen xitaylar arisidiki kirim tengpungliqining téximu zor ikenlikini bildürmekte.