Қәшқәрдә йәнә бир уйғур бир хитай көчмәнни боғузлап өлтүргән

Мушу айниң 18 ‏-күни қәшқәр шәһиридә бир нәпәр уйғур яш 6 нәпәр хитай көчмәнни пичақ тиқип яриландурған вә сақчилар қоршавға алғанда пичақ билән өзини өлтүрүвалған иди. Мухбиримиз мәзкур вәқәниң тәпсилати һәққидә қәшқәрдики қанун органлиридин мәлумат игиләш җәрянида, мәзкур вәқәдин 4 күн кейин йәнә бир уйғур яшниң охшаш җайда 40 яшлиқ бир хитай аялни боғузлап өлтүргәнлики ашкариланди.

Бултур йил ахирида қәшқәрдә арал вәқәси қатарлиқ хитай көчмәнлиригә зәрбә бериш вәқәлири йүз бәргән. Хитай һөкүмити бу түр һуҗумларниң тәкрар йүз беришиниң алдини елиш үчүн техи йеқиндила булардин 12 кишини өлүм җазасиға һөкүм қилған. Аридин анчә узун өтмәйла қәшқәр шәһиридә бир уйғур яш 6 хитай көчминини пичақ билән яриландуруп арқидин өзини өлтүрүвалған. Игилишимизчә, мана бу вәқәдин 4 күн кейин, қәшқәрниң қумдәрваза аһалиләр комитетида йәнә бир нәпәр уйғур яш, бир нәпәр хитай көчминини боғузлап өлтүргән.

Қәшқәр шәһириниң шамалбағ базарлиқ сақчихана башлиқиниң билдүрүшичә, мәзкур вәқә қәшқәрдики хитай көчмәнлири арисида еғир вәһимә пәйда қилған. Нөвәттә қәшқәрдики даириләр бир тәрәптин хитай көчмәнлирини хатирҗәм қилиш үчүн тәшвиқат паалийитини күчәйткән, хитай қораллиқ сақчи қисим вә аталмиш хәлқ әскәрлири қәшқәр шәһиридә җиддий тәкшүрүш, ахтуруш вә назарәт қилишни күчәйтмәктә.

Вәқә һәққидә бүгүн радиомизға баянат бәргән дуня уйғур қурултийиниң баянатчиси дилшат ришит, хитай һөкүмитиниң қәшқәрдики қаршилиқ һәрикәтлиридин савақ алмайватқанлиқини, қәшқәр хәлқиниң йүрәк садасиға қулақ селишниң орниға, хәлқни қорқутуш арқилиқ бесиқтурмақчи болуватқанлиқини, әмәлийәттә хитайниң бу тәһдитлириниң уйғурларниң қаршилиқ роһиға тәсир көрситәлмәйватқанлиқини билдүрди.