Qeshqerde yene bir Uyghur bir xitay köchmenni boghuzlap öltürgen

6 Neper xitay köchmenni pichaq tiqip yarilandurghan weqe yüz bérip 4 kündin kéyin, yene bir Uyghur yashning oxshash jayda 40 yashliq bir xitay ayalni boghuzlap öltürgenliki ashkarilandi.
Muxbirimiz shöhret hoshur
2011.04.29
Share on WhatsApp
Share on WhatsApp
qeshqer-saqchi-charlash-305 Radiomizgha iane qilinghan bu sürette, xitay qoralliq saqchilirigha qilinghan hujum yüzbergen qeshqer shehirining ali méhmanxanisining partilitiwétilgen aldi ishiki aldida charlash élip bériwatqan xitay saqchiliri we bir sayahetchining körünüshi.
RFA Photo

Mushu ayning 18 ‏-küni qeshqer shehiride bir neper Uyghur yash 6 neper xitay köchmenni pichaq tiqip yarilandurghan we saqchilar qorshawgha alghanda pichaq bilen özini öltürüwalghan idi. Muxbirimiz mezkur weqening tepsilati heqqide qeshqerdiki qanun organliridin melumat igilesh jeryanida, mezkur weqedin 4 kün kéyin yene bir Uyghur yashning oxshash jayda 40 yashliq bir xitay ayalni boghuzlap öltürgenliki ashkarilandi.

Bultur yil axirida qeshqerde aral weqesi qatarliq xitay köchmenlirige zerbe bérish weqeliri yüz bergen. Xitay hökümiti bu tür hujumlarning tekrar yüz bérishining aldini élish üchün téxi yéqindila bulardin 12 kishini ölüm jazasigha höküm qilghan. Aridin anche uzun ötmeyla qeshqer shehiride bir Uyghur yash 6 xitay köchminini pichaq bilen yarilandurup arqidin özini öltürüwalghan. Igilishimizche, mana bu weqedin 4 kün kéyin, qeshqerning qumderwaza ahaliler komitétida yene bir neper Uyghur yash, bir neper xitay köchminini boghuzlap öltürgen.

Qeshqer shehirining shamalbagh bazarliq saqchixana bashliqining bildürüshiche, mezkur weqe qeshqerdiki xitay köchmenliri arisida éghir wehime peyda qilghan. Nöwette qeshqerdiki da'iriler bir tereptin xitay köchmenlirini xatirjem qilish üchün teshwiqat pa'aliyitini kücheytken, xitay qoralliq saqchi qisim we atalmish xelq eskerliri qeshqer shehiride jiddiy tekshürüsh, axturush we nazaret qilishni kücheytmekte.

Weqe heqqide bügün radi'omizgha bayanat bergen dunya Uyghur qurultiyining bayanatchisi dilshat rishit, xitay hökümitining qeshqerdiki qarshiliq heriketliridin sawaq almaywatqanliqini, qeshqer xelqining yürek sadasigha qulaq sélishning ornigha, xelqni qorqutush arqiliq bésiqturmaqchi boluwatqanliqini, emeliyette xitayning bu tehditlirining Uyghurlarning qarshiliq rohigha tesir körsitelmeywatqanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.