Chet'eller oquwatqan xitay oqughuchilarning diplom sétiwélish setchiliki

Yéqindin buyan chet'ellerde oquwatqan xitay oqughuchilarning imtihanda saxtiliq ishletkenliki, oqush püttürüsh diplomini pulgha sétiwalghanliqi, hetta yalghan diplom yasashtek saxtiliqliri barghanche köpiyiwatqan bolup, xitay oqughuchilarning chet'ellerdiki inawiti qattiq chüshüp ketken.
Muxbirimiz mihriban
2009-04-27
Share

Yawropa we amérikidiki uniwérsitétlarda xitaydin qobul qilidighan oqughuchilargha nisbeten ular ewetken barliq matériyallarni qattiq tekshürüsh yolgha qoyulghan.

Ashkarilinishiche, xitay oqughuchilarning yawropa elliride oqush jeryanida saxtiliq qilish ehwali bir qeder éghir bolup , bir nechche yildin buyan en'gliye, fransiye qatarliq döletlerde xitaydin kelgen bir qisim oqughuchilargha mushu seweblik chare körülgen.

Mesilen, fransiyining tolun shehiridiki uniwérsitétta oqughuchilarning mexsus kesipke kirishtin ilgiri, aldin élinidighan fransuz tili imtihanigha 300 xitay oqughuchi qatniship hemmisi ötken. Bu ehwal bashqa dölet oqughuchilirini guman'gha qoyghan. Chünki qisqa waqit ichide fransuz tilida mukemmel bolush, hem imtihandin 100% ötüsh, bashqa dölettin kelgen oqughuchilar uchun mumkin emes iken. Xitay oqughuchilarning til sewiyisi chaghliq bolup, adette ularning fransuz tili sewiyisi her qandaq bir chet ellik oqughuchilardin töwen iken. Lékin xitay oqughuchilar, öz ornigha bashqilarni imtihan bergüzüsh, pul xejlep bashqilarni özi uchun imtihan bergüzüsh yoli bilen til ötkilidin ötüp ketken. Mesilining téximu éghir teripi shuki, kéyin bu xitay oqughuchilar resmiy kesip öginishke kirishken, hemde mektep püttürüsh diplomini 2700€ gha sétiwalghan.

Bu ish deslepki chaghlarda oqughuchilar arisida ashkarilan'ghan bolsimu, emma mektep da'iriliri bu ishni sezmigen. Peqetla, bu oqughuchilardin birsi doktorluqni oqumaqchi bolup proféssor bilen sözleshkende, proféssor bu oqughuchining fransuzche bilmeydighanliqini bayqighan hemde til bilmey turup, bu diplomni qandaq alghanliqidin heyran qalghan we gumanlan'ghan, hem bu ishni fransiye ma'arip ministirliqigha melum qilghan. Qattiq tekshürüsh netijiside, nechche yüzligen xitay oqughuchining diplomni pulgha sitiwalghanliqidek setchilik ashkarilan'ghan.

Oxshash ehwal en'gliye we kanadadimu bayqalghan bolup, kanadadiki ehwal téximu éghir bolghan. Kanadadiki xitay oqughuchilirining saxta diplom, saxta wiza, hetta saxta pasport yasash délosi, www.BackAlleyPress.com Tor bétining 2007 - yili 24 - may künidiki sanida pash qilin'ghan idi. Doki uniwérsitétining soda kespide oquydighan 9 neper xitay oqughuchi mekteptin qoghlan'ghan.

Xitay oqughuchilarning saxtiliq qilish ehwali sherqiy jenubiy asiya döletliride eng éghir bolup, ilgiri malayshiyada 3 yil oqush we tetqiqat élip barghan élshat ependi, malayshiyadiki ehwalni mundaq bayan qildi.

Amérika we yaponiye uniwérsitétlirida oqush tüzülmisi bir qeder mukemmel, tuzum qattiq bolghini uchun bu döletlerde, xitay oqughuchilirining imtihanda saxtiliq qilish ehwali birqeder az bolghan, xitay oqughuchilirining pulgha diplom sétiwélish qatarliq köz boyamchiliqlirini qilishigha yol qoyulmighan.

Ilgiri yaponiyidiki tokay uniwérsitétida 7 yil proféssor bolup ishligen muxter ependi yaponiye uniwérsitétlirida oqughuchilargha bolghan tekshürüsh nahayiti qattiq bolghini uchun, xitay oqughuchilarning saxtiliq qilish mumkinchilikining nahayiti azliqini bayan qilip ötti.

Emma amérikigha kelgen xitay oqughuchilarning xitayda teyyarlan'ghan matériyallirida saxtiliqlarning barliqi, ularning qolidiki xitaydiki proféssorlardin élip kelgen tonushturush xetlirining saxtiliqi ashkarilan'ghan bolup, bu heqte amérikidiki melum uniwérsitétta magistirliqta oquwatqan hem xitay oqughuchilarning matériyallirini tekshürüsh xizmiti bilen shughulliniwatqan bir Uyghur ziyaliysi özi igiligen bezi ehwallarni bayan qilip ötti.

Körünüp turuptiki, hemme nersining saxtisini ishlepchiqirilidighan xitayda hetta bilimgimu saxtiliq qilish ehwali omumyüzlük ewj alghan bolup, xitay oqughuchiliri bu nachar illiti bilen dunyadiki her qaysi eller uniwérsitétlirida eng qattiq tekshürüsh obyéktlirigha aylanmaqta.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet