Xitayda 'erzan emgek küchi' dewri axirlashti

Süret, 2010 - yili 7 - iyun, xitayning jyangsu ölkisi künshandiki bir zawut ishchiliri ish tashlash jeryanida saqchilar bilen tirkishiwatqan körünüsh.

Bu, xitayda 'erzan emgek küchi' dewri axirlashqanliqidin dérek béridighan, xitay hökümitinimu, shirketlernimu we xelqnimu jiddiy oygha séliwatqan mesile.

Xitayda aylardin buyan ishchilar herikiti ewj éliwatidu. Xuddi xitayda chiqidighan 'shinjingbaw' gézitide bayan qilin'ghandek, chet'el meblighi bilen yürüshidighan chong shirketlerdin, shénjéndiki 'fokiskan' shirkitining ishchiliri, ish heqqi ölchimige narazi bolup qozghighan heriketler tereqqi qilip, 5‏ - ayning 26‏ - küni kechte 12 - qétim binadin sekresh weqesi yüz berdi.

Shuningdin kéyin, shénjénda 430 ming adem, binadin sekrep özini öltürüwélish shekli bilen ipadilen'gen ish heqqi ölchimige bolghan naraziliqni qollap namayish qildi. Fokiskan shirkiti ishchilar herikitining türtkiside, ishchilarning eng töwen ayliq ish heqqi ölchimini 2 ming yüen qilip békitishke qoshuldi.

Ish heqqi ölchimige naraziliq ipadileydighan ishchilar herikiti bashqa jaylargha kéngeydi

Démek, ishchilar özliri élip barghan qarshiliq heriketlerdin menpe'et aldi. Bu ghelibining ilhami bilen, ish heqqi ölchimige naraziliqini ipadileydighan ishchilar herikiti xitayning hemme jaylirigha kéngiyishke bashlidi.

Fokiskan shirkitide yüz bergen ishchilar herikitidin kéyin, 'xonda' aptomobil zawutida ishchilar herikiti partlidi. Bu shirketning gu'angdung fosendiki shöbe zawutida bir nechche kün ish toxtap qaldi. Bezi shöbe zawutlar taqilip qaldi.

Xuddi xitayda chiqidighan 'shinju tor géziti' de bayan qilin'ghinidek, ishchilar herikiti chet'el shirketliridin xitayning dölet igilikidiki shirketlerge kéngeydi. Xénenning pingdingsen shehiridiki paxta toqumichiliq zawutida 5‏ - ayning 10 ‏ - küni bashlan'ghan ayal ishchilarning ish heqqi, pénsiye, dawalinishigha kapaletlik qilishni telep qilghan ishchilar herikiti hazirgha qeder üzlüksiz dawam qilmaqta.

 Fokiskan ishchiliri binadin sekresh weqesini, xuddi gérmaniye awazi bayan qilghandek, deslepte xitay hökümitimu, shirketlermu, ishchilarning xizmet muhitigha köngül bölüsh yaki bölmeslik mesilisi dep qarap bir terep qilmaqchi bolghan idi, emma ishchilar mesilining eng muhim nuqtisini ishchilar herikiti arqiliq tekrar - tekrar ipadiligendin kéyin, zawut ishchilarning qarshiliq körsitishidiki muwapiq seweblerni chüshen'gendin kéyin, ishchilarning ish heqqi ölchimini östürdi. Toghrisini éytqanda, östürüshke mejbur boldi.

Ishchilar herikitining deslepki ghelibisidin kéyin xitayda 'erzan emgek küchi' dewri axirlashti

Xuddi nyuyork taymis géziti bayan qilghandek, xitayda ishchilar herikitining deslepki ghelibisi bilen 'erzan emgek küchi' dewri axirlashqan bir yéngi dewr bashlandi. Emdi bu dewrde, téximu murekkep yéngi mesililer kélip chiqmaqta.

 Xuddi 'amérika awazi' bayan qilghandek, zawutlarda ishchilarning ish heqqi ölchimining östürülüshi, mehsulatlarning tennerqige, bazarlarda mal bahasigha, yighip éytqanda, xelqning turmushidiki hemme qatlamlargha tesir körsetmey qalmaydu.

Ishlemchiler özliri élip barghan qarshiliq heriketliridin menpe'et élishqa bashlighandin kéyin, xitayda 'erzan emgek küchi' dewri axirlishishqa we 'erzan emgek küchi' ge tayinip payda qaziniwatqan shirketler gumranliqqa yüzlendi. Ish heqqi ölchimini östürüshni asasi mezmun qilghan ishchilar herikiti hazir xitayda kündin - kün'ge ewj éliwatidu. Buning netijiside, 'erzan mal' bilen xelq'ara bazarlarda riqabetke qatnishalighan xitay shirketliri tenglikte qaldi.

Ishchilar herikiti hazir hökümetnimu, shirketlernimu, baylarnimu, xelqnimu jiddiy oygha salmaqta

Aylardin buyan xitayda yüz bériwatqan ishchilar herikiti, bu heriketler peyda qilghan we peyda bolghusi dawalghush, yeni muqimsizliq hazir, xitay hökümitinimu, shirketlernimu, xitaydiki bayliq menbelirining 41% ni igiliwalghan aran 1% imtiyaz igilirinimu, her qandaq iqtisadiy özgirish özlirining janijan menpe'etige munasiwetlik bolghan xelqnimu jiddiy oygha séliwatidu.

Yuqiridiki awaz ulinishidin, bu heqtiki melumatimizning tepsilatini anglaysiler.