Хитай ширкәтлири ғулҗа наһийә тәвәсидики суларни өз районлириға башлимақта

Бултурдин башлап хитай ширкәтлири ғулҗа наһийә тәвәсигә йәрлишишкә башлиғандин буян, наһийидики асаслиқ су мәнбәлирини мәхсус өстәң чепип, хитай ширкәтлири ғулҗа наһийә тәвәсидин сетивалған кан районлири һәм йеңидин бина қилиниватқан бағвәнчилик районлириға башлиған. Җирғилаң һәм дамбуни асас қилған су мәнбәлириниң хитай ширкәтлири игилигән районларға башлиниши һәм хитай ширкәтлири районда қурған бағвәнчилик мәйданлириға қарита деһқанларниң инкаси қандақ?
Мухбиримиз миһрибан
2010-07-20
Елхәт
Пикир
Share
Принт

Ғулҗа наһийилик һөкүмәт тор бети хәвәрлири һәм деһқанларниң инкаслиридин мәлум болушичә, хитай өлкилиридин ғулҗа тәвәсигә йәрлишишкә башлиған хитай ширкәтлири, нөвәттә ғулҗа наһийиси һәм ғулҗа шәһиригә қарашлиқ йезиларни су билән тәминләйдиған җирғилаң, дамбу қатарлиқ еқин мәнбәлирини, наһийә тәвәсидә йеңидин бәрпа қилиниватқан "айланма иқтисадий санаәт райони" дәп аталған хитай ширкәтлири игидарчилиқидики районларға башлиған.

Ғулҗа наһийилик һөкүмәт тор бетидики хәвәрләрдә, хитай ширкәтлири мәбләғ селип елип бериватқан бу су қурулушлири," ғулҗиға ярдәм бериш үчүн кәлгән қериндаш өлкиләрдики ширкәтләр, ғулҗа наһийиси һәм ғулҗа шәһәр әтрапидики йезиларниң, терилғу йәрлиригә яхши суғуруш муһити яритиш үчүн наһийә тәвәсидики өстәңләрни ремонт қилип, қақаслиқларни көкәртиш үчүн йеңидин өстәң қурулуши елип бериватиду " дәп изаһланған. Әмма райондики йәрлик хәлқниң хитай ширкәтлири районда елип бериватқан су қурулушлириниң мәқсити һәққидики инкаси башқичә болмақта.

Ғулҗа наһийисидин зияритимизни қобул қилған бир деһқанниң билдүрүшичә, хитай ширкәтлири ғулҗа наһийисидин еқип өтидиған җирғилаң еқининиң сүйини ноғайту йезисиниң юқириқи қисмидики илгири деһқанлар буғдай терийдиған, лекин һазир деһқанларниң ишлитилиши чәкләнгән бинәм йәрләргә башлиған.

Игилишимизчә, һазир ғулҗа наһийисидики тағ бағриға тарқалған деһқанларниң бинәм йәрлири хитай ширкәтлиригә сетип берилгән болуп, хитай ширкәтлири бу йәрләрдә 10 миң молуқ зор көләмлик үзүмзарлиқ, алмизарлиқ қатарлиқ бағвәнчилик мәйданлирини бәрпа қилмақта икән.

Зияритимизни қобул қилған бирәйлән, җирғилаң һәм дамбу еқинлириниң, өстәң арқилиқ бинәм йәрләргә башлинишиниң, әмәлийәттә хитай ширкәтлири тәрипидин бу йәрләрдә йеңидин бина қиливатқан үзүмзарлиқлар һәм үзүм һариқи завутлириниң суға болған еһтияҗини қандуруш үчүн икәнликини илгири сүрди.

Бу киши бизгә, деһқанларниң терилғу йәрлирини суғурушта асаслиқ еқин мәнбәлири болған җирғилаң һәм дамбуниң сулириниң хитай ширкәтлири игидарчилиқидики бағвәнчилик мәйданлириға башлиниши елип келидиған ақивәтләр һәққидә тохтилип, әгәр ғулҗа тәвәсидә қурғақчилиқ йүз берип қалса, бу йәрләрдә су қислиқи йүз берип, йәрлик деһқанларниң наразилиқи қозғилиши мумкинликини оттуриға қойди.

Йеқиндин буян, ғулҗа наһийилик һөкүмәт тор бетиниң хәвәрлиридә, "ғулҗа наһийиси йеңичә санаәтлишиш тәрәққият қәдимини тезләтмәктә" дегәндәк хәвәрләр көпийип, хитай ширкәтлириниң ғулҗа наһийисигә йәрлишиши һәққидики мәдһийә хәвәрлири көпәйгән. Әмма йәрлик уйғурларниң хитай ширкәтлириниң ғулҗа тәвәсигә йәрлишишигә нисбәтән қариши башқичә болуп. Бу ширкәтләрниң наһийә тәвәсидә йәрлишиши йәрлик хәлқни әндишигә салған. Зияритимизни қобул қилған бу киши бизгә һөкүмәт даирилириниң районда йүргүзүватқан сиясити һәм йәрлик хәлқниң һөкүмәткә болған қарши пикрини ипадиләшкә амалсиз икәнликини билдүрүп мундақ деди.

Нөвәттә, хитай һөкүмити уйғур аптоном райониниң һәр қайси җайлирида " шинҗаңға ярдәм" нами астида, райондики байлиқларни кәң көләмдә ечиш қәдимини тезлитиватқан болуп, хитай ширкәтлириниң уйғур елидә йәрлишиш вәзийити уйғур елиниң җәнуб, шималидики һәммә вилайәт, наһийилиридики омуми әһвалға айланмақта.

юқиридики улиништин бу прогирамминиң тәпсилатини аңлиғайсиләр.
Пикирләр (0)
Share
Толуқ бәт