Xitay shirketliri ghulja nahiye tewesidiki sularni öz rayonlirigha bashlimaqta

Bulturdin bashlap xitay shirketliri ghulja nahiye tewesige yerlishishke bashlighandin buyan, nahiyidiki asasliq su menbelirini mexsus östeng chépip, xitay shirketliri ghulja nahiye tewesidin sétiwalghan kan rayonliri hem yéngidin bina qiliniwatqan baghwenchilik rayonlirigha bashlighan. Jirghilang hem dambuni asas qilghan su menbelirining xitay shirketliri igiligen rayonlargha bashlinishi hem xitay shirketliri rayonda qurghan baghwenchilik meydanlirigha qarita déhqanlarning inkasi qandaq?
Muxbirimiz mihriban
2010-07-20
Élxet
Pikir
Share
Print

Ghulja nahiyilik hökümet tor béti xewerliri hem déhqanlarning inkasliridin melum bolushiche, xitay ölkiliridin ghulja tewesige yerlishishke bashlighan xitay shirketliri, nöwette ghulja nahiyisi hem ghulja shehirige qarashliq yézilarni su bilen teminleydighan jirghilang, dambu qatarliq éqin menbelirini, nahiye teweside yéngidin berpa qiliniwatqan "aylanma iqtisadiy sana'et rayoni" dep atalghan xitay shirketliri igidarchiliqidiki rayonlargha bashlighan.

Ghulja nahiyilik hökümet tor bétidiki xewerlerde, xitay shirketliri meblegh sélip élip bériwatqan bu su qurulushliri," ghuljigha yardem bérish üchün kelgen qérindash ölkilerdiki shirketler, ghulja nahiyisi hem ghulja sheher etrapidiki yézilarning, térilghu yerlirige yaxshi sughurush muhiti yaritish üchün nahiye tewesidiki östenglerni rémont qilip, qaqasliqlarni kökertish üchün yéngidin östeng qurulushi élip bériwatidu " dep izahlan'ghan. Emma rayondiki yerlik xelqning xitay shirketliri rayonda élip bériwatqan su qurulushlirining meqsiti heqqidiki inkasi bashqiche bolmaqta.

Ghulja nahiyisidin ziyaritimizni qobul qilghan bir déhqanning bildürüshiche, xitay shirketliri ghulja nahiyisidin éqip ötidighan jirghilang éqinining süyini noghaytu yézisining yuqiriqi qismidiki ilgiri déhqanlar bughday tériydighan, lékin hazir déhqanlarning ishlitilishi cheklen'gen binem yerlerge bashlighan.

Igilishimizche, hazir ghulja nahiyisidiki tagh baghrigha tarqalghan déhqanlarning binem yerliri xitay shirketlirige sétip bérilgen bolup, xitay shirketliri bu yerlerde 10 ming moluq zor kölemlik üzümzarliq, almizarliq qatarliq baghwenchilik meydanlirini berpa qilmaqta iken.

Ziyaritimizni qobul qilghan bireylen, jirghilang hem dambu éqinlirining, östeng arqiliq binem yerlerge bashlinishining, emeliyette xitay shirketliri teripidin bu yerlerde yéngidin bina qiliwatqan üzümzarliqlar hem üzüm hariqi zawutlirining sugha bolghan éhtiyajini qandurush üchün ikenlikini ilgiri sürdi.

Bu kishi bizge, déhqanlarning térilghu yerlirini sughurushta asasliq éqin menbeliri bolghan jirghilang hem dambuning sulirining xitay shirketliri igidarchiliqidiki baghwenchilik meydanlirigha bashlinishi élip kélidighan aqiwetler heqqide toxtilip, eger ghulja teweside qurghaqchiliq yüz bérip qalsa, bu yerlerde su qisliqi yüz bérip, yerlik déhqanlarning naraziliqi qozghilishi mumkinlikini otturigha qoydi.

Yéqindin buyan, ghulja nahiyilik hökümet tor bétining xewerliride, "ghulja nahiyisi yéngiche sana'etlishish tereqqiyat qedimini tézletmekte" dégendek xewerler köpiyip, xitay shirketlirining ghulja nahiyisige yerlishishi heqqidiki medhiye xewerliri köpeygen. Emma yerlik Uyghurlarning xitay shirketlirining ghulja tewesige yerlishishige nisbeten qarishi bashqiche bolup. Bu shirketlerning nahiye teweside yerlishishi yerlik xelqni endishige salghan. Ziyaritimizni qobul qilghan bu kishi bizge hökümet da'irilirining rayonda yürgüzüwatqan siyasiti hem yerlik xelqning hökümetke bolghan qarshi pikrini ipadileshke amalsiz ikenlikini bildürüp mundaq dédi.

Nöwette, xitay hökümiti Uyghur aptonom rayonining her qaysi jaylirida " shinjanggha yardem" nami astida, rayondiki bayliqlarni keng kölemde échish qedimini tézlitiwatqan bolup, xitay shirketlirining Uyghur élide yerlishish weziyiti Uyghur élining jenub, shimalidiki hemme wilayet, nahiyiliridiki omumi ehwalgha aylanmaqta.

Yuqiridiki ulinishtin bu progirammining tepsilatini anglighaysiler.
Toluq bet