Хитай хаккерлириниң чәтәлләрдики демократик хитай тор бәтлиригә қаратқан һуҗуми күчәймәктә

Сүрәт, бошун тор бетиниң хаккәрләнгәнлики ейтилған үчүр болуп, үстигә үйғуйчә чүшәндүрүш берилгән көрүнүш.

Зияритимизни қобул қилған бошүн тор бетиниң башқурғучилиридин бири болған лю лу әпәнди бошүн тор бетиниң намәлум хаккерлар тәрипидин һуҗумға учрап туруватқанлиқиниң сәвәби һәққидә тохтилип мундақ деди: "бошүн тор бети, демократик идийини өзигә асасий мизан қилған, охшимиған көз қараштики әсәрләрни, әгәр бу әсәр мәлум бир кишигә төһмәт қилмиған, шәхсләрниң кишилик һәқ - һоқуқлириға таҗавуз қилмиған болсила елан қилидиған әркин мунбәр, тор бетимиз хәвәрлириниң тезлики, чинлиқи, учур мәнбәлириниң кәңлики билән, чәтәлләрдики хитай тилидики тор бәтлири ичидә бир қәдәр чоң болған тор бети. Хитайда йүз бәргән һәр қандақ вәқәләргә ниспәтән мәйли һөкүмәт тәрәпниң болсун яки охшимиған қараштики шәхсләрниң һәм тәшкилатларниң қарашлири болсун һәммиси бесилиду. Тор бетимиздә йәнә, хитай һөкүмити анчә қарши алмайдиған, уйғурлар һәм тибәтләргә даир хәвәр - мақалиләрму бесилиду. Бәлким мушу сәвәбтин болса керәк, тор бетимиз даим бир қисим өзини " вәтәнпәрвәр ләр" дәп ативалған хаккерларниң туюқсиз һуҗумлириға учрап туриду. Биз һазирчә тор бетимизгә һуҗум қилған бу хаккерларни хитай һөкүмитиниң буйруқи билән һуҗум қилған дийәлмисәкму, әмма уларниң бундақ қилишида хитай һөкүмитиниң уларға сиңдүргән "аталмиш вәтәнпәрвәрлик тәрбийиси" ниң тәсири бар дәп қарашқа болиду."

Лю лу әпәнди, бошүн тор бетиниң, чәтәлләрдики хитай тор бәтлири ичидә, хитай хаккерлириниң һуҗумлириға бир қәдәр көп учраватқан тор бети икәнлики һәққидә тохтилип йәнә мундақ деди: " тор бетимиз, чәтәлләрдики хитай тилидики тор бәтлири ичидә, хаккерларниң һуҗумлириға бир қәдәр көп учрап келиватиду. Болупму мушу икки йилдин буян көп қетим хаккерларниң һуҗумлириға учрап һәтта бәзидә, бир нәччә күнгичә тақилип қалидиған әһвалларму болди."
 
Лю лу әпәнди "бошүн тор бети хаккерларниң һуҗумиға учрап туруш сәвәбидин, өзиниң әслидики мәйданини вә қаришини өзгәртәмду?" дегән соалимизға мундақ җаваб бәрди: " хаккерларниң һуҗуми сәвәблик биз әслидики мәйданимиз вә қаришимизни өзгәртмәймиз. Чүнки биз һәқиқий чин хәвәрләрни беришкә тиришиватимиз. Бизгә қилинған һуҗум ахбарат әркинликигә қилинған һуҗум. Бизниң мизанимиз вә өлчимимиз хәвәрниң чинлиқи, тезлики һәм битәрәпликигә әмәл қилиш, шуңа бизниң мәйданимиз өзгәрмәйду."

Лю лу әпәнди бошүн тор бетидә, чәтәлләрдики уйғур язғучилириниң әсәрлири, болупму хитай һөкүмити қарши алмайдиған мақалиләрниң елан қилиниш мәсилисигә қарита қаришини мундақ баян қилди: " апторларниң әсәрлиридә оттуриға қоюлған мәзмун пәқәт униң өзигә тәвә. Бошүн әркин пикир мунбири, бу әсәрләрдә башқиларға төһмәт қилиш яки наһәқ қарилап, һуҗум қилиш болмисила, биз бу әсәрләрниң елан қилиниши үчүн мәйдан һазирлап беримиз. Биз һазирғичә хитай һөкүмәт тәрәпниң қариши ипадиләнгән әсәрләрни һәм униңға охшимайдиған қараштики әсәрләрниму елан қилип келиватимиз. Мәсилән, дуня уйғур қурултийидики елшат әпәндиниң язмилири әнә шундақ әсәрләр тәркипигә кириду. Уйғурларға, тибәтләргә даир хәвәр - мақалиләрниң һәммисини елан қилимиз, чүнки бу бир әркин мунбәр. Уларниң әсәрлири пәқәт уларниң өзлиригила вәкиллик қилиду, бошүнниң қаришиға вәкиллик қилмайду, биз пәқәт охшимиған көз қараш, пикирләр үчүн мәйдан һазирлап бәрдуқ халас."

Бошүн тор бетидә хитай тилида өз мақалилирини елан қилип туридиған елшат әпәнди, бошүн тор бетиниң хитай хаккерлириниң учришиниң сәвәби һәққидә истансимизниң зияритини қобол қилип, өз қарашлирини баян қилип өтти.

Хитай хаккерлириниң чәтәлләрдики тор бәтлиригә һуҗум қилиши пәқәт хитай тор бәтлири биләнла чәкләнмәйдиған болуп, уйғур вә тибәт тәшкилатлириниң һәм шәхсләрниң тор бәтлири, һәтта чәтәлләрдики һөкүмәт тор бәтлириму, хитай хаккерлириниң һуҗумиға учрап келиватқан болуп, дуня уйғур қурултийиниң тор бетини башқурғучилардин бири болған өмәрҗан әпәнди зияритимизни қобул қилип, хитай хаккерлириниң чәтәлләрдики уйғур тәшкилатлириниң тор бәтлиригә давамлиқ һуҗум қилидиғанлиқи һәққидә тохталди.

Хитай хәлқарада ахбарат әркинликини қаттиқ контрол қилидиған дөләтләрниң бири дәп әйиблиниватқан болуп, б б с агентлиқиниң 21 - өктәбирдики хәвиридә, хәлқара чегрисиз мухбирлар тәшкилатиниң 2009 - йиллиқ баһалаш нәтиҗиси елан қилинған болуп, бу йил хитайниң ахбарат әркинликидики рәт тәртипи 168 - орунда болуп, арқидин саниғанда 8 - орунда турған, бу йил бултурқидин йәнә бир дәриҗә арқиға сүрүлгән.