Хитай һәрбий саһәсидә зор тәңшәш елип барди

Хитайниң шинхуа агентлиқиниң һәрбий ишлар хәвәрлири һәм хоңкоңда чиқидиған нур гезити, қуяш гезити қатарлиқ гезитләрниң хәвиридин мәлум болишичә, 2009 - йили чиқип кетишниң алдида, хәлқ азадлиқ армийиси қоманданлири ичидә, бир қетимлиқ зор көләмлик тәңшәш елип берилған.
Мухбиримиз миһрибан
2009-12-23
Share
Urumqi-xelq-meydanidiki-Xitay-armiyisi-305.jpg Сүрәт, 4 - сентәбир, үрүмчи хәлқ мәйданиға орунлаштурулған хитай армийисидин бир көрүнүш.
AFP Photo

Бу қетимлиқ тәңшәштә асасән 50 - йиллардин кейин туғулған яш һәрбий қоманданлар муһим орунларға қоюлған. Қуяш гезитиниң хәвиридин ашкарилинишичә, бу қетимлиқ тәңшәштә, бултурқи тибәт вәқәси һәм бу йилқи"5 - июл үрүмчи вәқәси"ни бастурушта хизмәт көрсәткән ғәрбий - шималдики ләнҗу, чеңду, шинҗаң һәрбий районлиридики генерал майорлар һәм хитай азадлиқ армийисиниң 1 - әвлад башлиқлириниң пәрзәнтлири муһим вәзипиләргә тәйинләнгән.

Бу йил 7 - айда "5 - июл үрүмчи вәқәси"ни бастурушта хизмәт көрситип, дәриҗиси көтүрүлгән чеңду һәрбий райониниң сиясий комиссари җаң хәйяң, истратегийилик ядро қораллари қисимлири 2 - зәмбирәкчиләр қошуниниң сиясий комиссарлиқиға тәйинләнгән. Шинҗаң һәрбий райониниң сиясий комиссари тиән шиуси чеңду һәрбий райониниң сиясий комиссарлиқиға тәйинләнгән, дөләт мудапиә университетиниң сиясий комиссари, деңиз армийә генерали тоң шипиң мәркизи сиясий қоманданлиқ штабиға йөткилип, әслидики 1 - муавин башлиқ лиу йоңҗиниң вәзиписини өткүзүвалған. Ундин башқа хоңкоңға қошна болған гуаңҗу һәрбий райониниң қоманданлиқ шитабидиму чоң тәңшәш елип берилған болуп, илгирики ләнҗу һәрбий районниң мәслиһәтчиләр кеңишиниң қомандани шү фенлин гуаңҗу һәрбий райониниң баш қоманданлиқиға тәйинләнгән; һазирқи 42 - қисимниң қомандани йов хәйтав гуаңҗу һәрбий райониниң мәслиһәтчиләр кеңиши қоманданлиқиға тәйинләнгән.

Нур гезитиниң хәвиридә көрситилишичә, бу қетим муһим вәзипиләргә қоюлған һәрбий қоманданларниң көпинчиси "5 - июл үрүмчи вәқәси"ни бастурушта төһпә көрсәткән генераллар болуп, уйғурлар вә тибәтләрниң кишилик һоқуқ әркинлики һәм баравәрлик тәләп қилип елип барған наразилиқ һәрикәтлирини, "қанунсиз топилаң" һәм "бөлгүнчилик һәрикити" дәп бастурушта ғәрбий шимал қисимлиридики һәрбий қоманданлар рол ойниған. Мәсилән, гуаңҗу һәрбий райониниң баш қоманданлиқиға тәйинләнгән шү фенлин, чеңду һәрбий райониниң комиссарлиқиға тәйинләнгән тиән шиуси, бейҗиң һәрбий райониниң қомандани фаң феңхуй, қораллиқ сақчи қошуниниң сиясий комиссари йү линшиаң қатарлиқларниң һәммиси, ғәрбий шимал районида уйғурларниң 91 - йилдики "барен вәқәси", 97 - йилдики "ғулҗа феврал вәқәси", 2009 - йили 7 - айдики" үрүмчи июл вәқәси", тибәтләрниң 2008 - йилидики "март вәқәси", қатарлиқларни бастурушта һәм 89 - йилдики "тиән әнмен оқуғучилар һәрикити" қатарлиқларни бастурушта хизмәт көрсәткән қоманданлар икән.

Нур гезитиниң хәвиридә йәнә, бу қетимлиқ тәңшәштә хитайниң әслидики һәрбий әмәлдарлириниң пәрзәнтлириниң муһим вәзипиләргә қоюлғанлиқи баян қилинған. Дөләт истратегийилик ядро қораллири қисимлири 2 - зәмбирәкчиләр қошуниниң сиясий комиссарлиқиға тәйинләнгән җаң хәйяң, мәркизи һәрбий ишлар комитетиниң муавин рәиси җаң шианиң оғли икән; гуаңҗу һәрбий райониниң мәслиһәтчиләр кеңишиниң қоманданлиқ вәзиписигә тәйинләнгән йов хәйтав болса гуаңҗу һәрбий райониниң илгирики қомандани йов тәйҗоңниң оғли икән. Бу қетимлиқ тәңшәштә йәнә илгирики хитай дөләт рәиси ли шиәнниәнниң күйоғли лиу яҗу һава армийә муавин сиясий комиссарлиқидин дөләт мудапиә университетиниң сиясий комиссарлиқиға өстүрүлгән.

Қуяш гезити бу қетимлиқ тәңшәшкә баһа берип, "хитай коммунист һөкүмити һәрбий күчни компартийиниң өз һәқ - һоқуқлири вә демократийини тәләп қилғучиларни бастуруп, өз һакимийитини мустәһкәмләштики таянч күч қилғандин сирт, илгирики коммунист әмәлдарлириниң пәрзәнтлирини һәрбий қошун ичидики муһим вәзипиләргә қоюп, 'пәрзәнтләр қошуни' ни күчәйтиш арқилиқ, компартийә һакимийитини мустәһкәмлимәкчи болса керәк. Мәйли, җиаң земин болсун, яки ху җинтав болсун вә яки кәлгүсидә дөләт рәиси болуш еһтимали юқири болған ши җинпиң болсун, уларниң мәйдани һечқачан өзгәрмәйду, улар һәр вақит компартийидин ибарәт бир партийә һөкүмранлиқи астидики қизил һакимийәтни қоғдайду. Буниңдин қариғанда хитайда һәқиқий демократик усулда сайлап чиқилған һакимийәт түзүми йолға қоюлушиға техи балдур, хәлқ демократийисиниң әмәлгә ешишиму һазирчә бир чүш," дәп көрсәткән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (1)

Барлиқ пикир - баянларни көрүш.

Anonymous says:
Dec 23, 2009 04:38 PM

Хитай хәлқи дөләтни демкуратйә билән башқуралйдиғанлиқиға ишәнмәйду. Көп партийә болса, демкуратик сайлам болса қалаймиқанчилиқ келип чиқиду, ﯪқивитини тәсәввур қилғили болмайду дәп қарайду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт