Xitay, asiya tereqqiyat bankisining arunachalgha qerz bergenlikige qattiq naraziliq bildürdi

Hinidstan bu yil 3 ‏ - ayda asiya tereqqiyat bankisining meblegh igiliri komitétigha ikki milyard 900 milyon amérika dolliri qerz bérish heqqide iltimas sun'ghan idi. Asiya tereqqiyat bankisi 6 ‏ - ayning 15 ‏ - küni hindistanning bu iltimasini testiqlap qarar maqullidi.
Muxbirimiz weli
2009.06.19

Asiya tereqqiyat bankisi hindistan'gha béridighan qerz pulning 60 milyon amérika dolliri xitay - hindistan otturisida zémin talash - tartishi boluwatqan arunachal shitatigha bérilidighan qerz idi.

Chin gang: asiya tereqqiyat bankisi axirqi hésabta közligen meqsitige yételmeydu

B b s ning bayan qilishiche, xitay tashqi ishlar ministirliqining bayanatchisi chin gang bügün asiya tereqqiyat bankisining bu qararigha qattiq naraziliq bildürdi we asiya tereqqiyat bankisini 'gerche qalaq rayonlargha yardem bermekchi bolghan bolsimu, emma axirqi hésabta közligen meqsitige yételmeydu' dep jakarlidi.

Shundaqla yene, asiya bankisining qerz mu'amile ishlirigha munasiwetsiz mesilini sözlep 'junggo bashtin - axir hinidistan bilen chégra mesilisini söhbet arqiliq tinchliq bilen hel qilishni teshebbus qilip kéliwatidu' dep tekitlidi.

Asiya tereqqiyat bankisi: banka kespi xitay - hinidistan zémin jidili bilen munasiwetsiz

Asiya tereqqiyat bankisi: bügün b b s ning su'aligha jawab bérip 'banka kespi xitay - hinidistan zémin jidili bilen munasiwetsiz, bankining nizamnamisi buyiche, xizmetchimiz héchqanda q siyasi ishlargha arilashmaydu, bizning qerz bérish qararimiz iqtisadiy amillargha asasen chiqirilghan ' dep inkas qayturdi.

Xitay bilen hinidstan otturisidiki chégra söhbi'itining téxiche netijisi körülmidi

Xewer arxiplirigha qarighanda, xitay bilen hinidstan otturisida, 1962 ‏ - yilidiki chégra urushidin qalghan mesililerni hel qilish üchün, 2006‏ - yilidin bashlap söhbet ötküzülüshke bashlighan idi.

Emma ta hazirghiche téxi birer muresse yaki kélishim hasil qilinmidi. Xitay 2008‏ - yilidin bashlap yene, hindi okyan we molokka aralliridiki xelq'ara qatnash yollirini qoghdash üchün, bir nechche herbiy baza qurushqa bashlidi.

Réng ying: xitay bilen hinidistan otturi'isida chégra mesiliside hélimu qarshilishish mewjut

Bügün xitay bilen asiya tereqqiyat bankisining hinidstanning arunachal shitatigha qerz bérish mesiliside qarshiliq peyda bolghandin kéyin, xitayning xelq'ara munasiwetler tetqiqat ornining jenubiy asiya tetqiqat bölümi bashliqi réng ying xitay bilen hindistan otturisidiki hazirqi küch sélishturmisi toghrisida mulahize élan qildi. Uning qarishiche, xitay bilen hinidistan otturisida chégra mesiliside hélimu qarshilishish mewjut.

Uning bayan qilishiche, xitayning istératégiye jehette taqabil turush nishani amérika, rusiye we yaponiye. Hinidistanning taqabil turush nishani birla xitay. Xelq'araliq déngiz yolliri xitayning iqtisadiy tereqqiyati üchün intayin muhim. Xitayning tawar ikisporti we importi asasen déngiz yolliri arqiliq orunlinidu. Bultur ottura sherqtin, afriqidin import qilghan 200 milyon tonna néfitning hemmisi xitaygha hindi okyandin ötüp molokka aralliri arqiliq toshuldi. Shundaq bolghanliqi üchün, xitay 1990 ‏ - yillardin bashlapla hindi okyanda özining herbiy küchini östürüshke tiriship kelmekte. Emma xitay hazir peqet pakistanning we bérmining déngiz portliridin paydilinip hindi okyan'gha küch körsiteleydu. Emma hinidstanning déngiz qisimliri xitaydin küchlük.

Uning qarishiche, dunyada hazir hinidstan bilen qarshilishiwatqan aran birla herbiy küch bar, u bolsimu, pakistan. Shunglashqa xitayning hindistan'gha taqabil turidighan birla tedbiri pakistanni qollash. Pakistan qoldin ketse, hinidistan'gha tehdit bolidighan küch qalmaydu, belki hinidstan biwaste xitaygha tehdit bolalaydu. Shunglashqa xitay pakistanni qollashni hergiz ajizlashturmaydu. Uningdin bashqa, xitay hazir tibet arqiliqmu hindistan'gha tehdit bolalaydu. Emma tibette qatnash qolaysiz, joghrapiye shara'iti jehettin bu rayonda yenila hinidstan üstünlükke ige. Hindi okyanmu hazir yenila amérikidin qalsa hinidistanning okyani.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.