Xitay dölet bixeterlik idarisining 2 bölümi Uyghurlar üstidin jasusluq qilidiken

Uningdin bashqa xitayning bir qisim aliy mektepliride mexsus jasusluq orgini üchün tesisi qilin'ghan kurslar bar iken.

Bu heqtiki melumatlar sherqiy türkistan ma'arip we hemkarliq jem'iyiti ‏6-ayning 17-küni istanbulda chaqirghan ayliq istratégiye léksiyide otturigha qoyuldi. Léksiyide yene xitay jasusluq apparati heqqide ilgiri déyilip baqmighan bezi yéngi melumatlar sözlendi.

Yighin'gha sherqiy türkistan ma'arip we hemkarliq jem'iyitining re'isi hidayetulla oghuzxan riyasetchilik qildi. Yighin qur'an kérimni qira'et qilish bilen bashlandi. Yighinda doktor erkin ekrem ependi léksiye bérip, xitay istixbarat teshkilati toghrisida toxtaldi we bu teshkilatning Uyghurlargha üstidin élip bériwatqan pa'aliyetliri, xitay ichi-sirtida yashawatqan Uyghurlargha qarita qandaq usulda jasusluq pa'aliyiti élip bériwatqanliqi toghrisida toxtaldi.

Doktor erkin ekrem sözide xitay istixbarat teshkilatining kélip chiqish tarixi we xizmet da'irisi toghrisida toxtaldi hemde xitay dölet bixeterlik ministirliqining xitay hakimiyitining eng chong we eng aktip istixbarat teshkilati ikenlikini we bu teshkilatning xitay ichi-sirtida pa'aliyet qilidighan 18 bölümi barliqini bildürdi.

Doktor erkin ekremning bildürüshiche yene, xitay istixbarat teshkilatigha qarashliq idare we organlar merkizi apparat dölet bixeterlik ministirliqi, siyasiy bölüm, ishchi-xizmetchiler bölümi, intizam tekshürüsh bölümi, türme, xitay kommunist partiye mektipi, telim-terbiye mektipi, nazaret bölümi, yardem bölümi, dem élishqa chiqqanlarni közitish bölümi qatarliq bölümlerni öz ichige alidiken.

Melum bolushiche, béyjing xelq'ara munasiwetler instituti, suju jiyangnen ijtima'iy penler instituti, junggo hazirqi zaman xelq'ara munasiwetler instituti, shangxey xelq'araliq tetqiqat instituti, junggo yashlar instituti, jiyangnen ijtima'iy uniwérsitéti qatarliq mektepler xitay istixbarat teshkilatigha qarashliq mektepler iken.

Doktor erkin ekrem sözide yene istixbarat we jasusluq uqumliri toghrisida her qaysi alimlar otturigha qoyghan chüshenchilerni sherhlep, istixbarat uqumining “Eqil”, “Zéreklik”, “Uchur”, “Melumat”, “Uchur igilesh” dégen menilerni ipadileydighanliqini bildürdi.

Yaponiyining chüshenchiside, istixbarat-munasiwetlik düshmen dölet heqqidiki pütkül melumatlar, dep qaralsa؛ xitayning chüshenchiside, istixbarat-düshmen terepning melumatlirini doklat qilish, dep qarilidiken.

Doktor erkin ekrem sözide yene xitay istixbarat teshkilatining Uyghurlarni közitish, nazaret qilish bölümliri toghrisida toxtilip, xitay istixbarat teshkilatining siyasiy we iqtisadi bölümi bolghan 3-bölümning Uyghurlargha qarita jasusluq qilidighanliqini bildürdi we bu bölümning yene chet'ellerning
Siyasiy, iqtisadiy we pen-téxnikilirigha alaqidar jasusluq heriketliri qilidighanliqini bildürdi.

Erkin ekremning bildürüshiche, xitay istixbarat teshkilatining yene 10-bölümmu Uyghurlargha qarita jasusluq pa'aliyiti élip baridiken. Bu bölüm asasliqi chet'ellerdiki teshkilat we oqughuchilarni közitish, jasusluq qilish, melumat toplash ishlirigha mes'ul bölüm iken.

Doktor erkin ekrem sözide yene jasusluq toghrisida toxtilip mundaq dédi: jasusluq dégen dölet menpe'itini qoghdash yaki üstünlükni qolgha keltürüsh üchün düshmen küchler heqqide toghra istixbaratni qolgha keltürüsh, chiqim we qiyinchiliqlardin qutulush üchün yol izdeshtin ibaret.

Doktor erkin ekrem sözide yene istixbarat teshkilati insanlarni özige xizmet qildurush üchün qandaq usullarni qollinidighanliqi toghrisida toxtaldi.

Bu qétimqi yighin 4-qétimliq léksiye bérish yighini bolup, buningdin ilgiri ötküzülgen léksiye bérish yighinlarda doktor erkin ekrem, “Istratégiye dégen néme? istratégiyining ehmiyiti, we istratégiyining siyaset belgileshtiki orni” “Istratégiye we istratégiye tetqiqati” dégen témilarda toxtalghan idi.

Yighin axirida sherqiy türkistan ma'arip we hemkarliq jem'iyitining re'isi hidayetulla oghuzxan söz qilip, özining pikir-qarashlirini bayan qildi.