'Хитайниң мюнхендики консулханиси ишпийонлуқ вәзиписини иҗра қилиду'

24 - Ноябир сәйшәнбә күни, германийә сақчилири германийиниң мюнхен шәһиридә яшайдиған 4 хитайниң туралғусиға бастуруп кирип, уларни мәзкур шәһәрдә яшаватқан уйғур җамаитиниң устидин ишпийонлуқ қилди дегән гуман билән ахтурди. Бүгүнки мәлуматларға қариғанда, буларниң икки нәпири германийә пуқраси икән.
Мухбиримиз җүмә
2009.11.25
Share on WhatsApp
Share on WhatsApp
Girmaniye-Munixtiki-Xitay-konsulxanisi-305.jpg Сүрәт, германийиниң мйунхен шәһиридики хитай консуханисиниң ташқи көрүнүши.
www.spiegel.de Дин елинди.

Уйғурлар үстидин җасуслуқ қиливатқан гумандарларниң арқа - арқидин ашкарилиниши һәққидә тохталған д у қ хадимлири, буниң чәтәлләрдики уйғур дәвасиниң сағламлиқи үчүн яхши башлиниш икәнликини билдүрди.

Германийә сақчилириниң мюнхендики 4 нәпәр хитайниң өйигә җасуслуқ гумани билән бастуруп киргәнлики һәққидә хәвәр германийидин чиқидиған спейгел хәвәрләр торида берилди.

Хәвәрдә көрситилишичә, сәйшәнбә күни әтигәндә германийә федератсийә җинайи ишлар сақчилири билән баварийә сақчи идариси хадимлири, юқириқи 4 нәпәр хитайниң мюнхендики туралғусиға бастуруп кирип ахтурған вә сораққа тартқан.

Бу һәқтә радиойимизниң зияритини қобул қилған германийә ташиқи ишлар министирлиқи баянатчиси һатзелман әпәнди бу һәқтики хәвәрләрни дәлиллиди. У мундақ деди: "мениң билишимчә улар қолға елинмиди пәқәт сораққа тартилди."

Спейгел хәвәрләр торида көрситишичә, хитайниң баварийә өлкиси мюнхен шәһиридики консулханиси сода, саяһәт визиси дегәндәк вәзипиләрни орундаватқандәк қилсиму, әмәлийәттә хитайниң мәзкур консулханисида хитайниң җасуслуқ органлири бу райондики ишпийонлуқ торини һәрикәткә селиш вәзиписини иҗра қилидикән.

Германийиниң мюнхен шәһири, чәтәлләрдики уйғур җамаити бир қәдәр көп олтурақлашқан шәһәрләрниң бири. Дуня уйғур қурултийиниң баш штабиму мюнхен шәһиригә җайлашқан.

Хәвәрдә көрситишичә, бейҗиң даирилири чәтәлләрдики уйғур җамаитиниң немиләрни ойлайдиғанлиқи, немиләр һәққидә пикирлишидиғанлиқи вә яки пиланлири һәққидики учурларға бәк қизиқидикән. Шуңлашқа хитай җасуслуқ органлири мюнхенда яшаватқан уйғур җамаити үстидин җасуслуқ қилиш үчүн, ишпийон яки гәп тошуйдиған алақичиларни көп санда тәрбийилигән.

Бу һәқтә тохталған дуня уйғур қурултийи ички ишлар министири елшат әпәндиниң билдүрүшичә, чәтәлләрдики уйғур дәвасиниң күнсайин улғийишиға әгишип, хитай җасуслуқ органлири уйғур тәшкилатлириниң паалийәтлиригә ишпийонлуқ һәрикәтлири билән бузғунчилиқ қилиш суйиқәстини барғанчә күчәйткән. Хитай һөкүмити уйғур тәшкилатлири үстидин көзитиш вә бузғунчилиқ һәрикәтлирини рабийә қадир ханим америкида паалийитини башлиғандин кейин техиму әвҗигә чиқарған.

Мәлум болушичә, хитай даирилири өз ишпийонлирини уйғурлар яшаватқан дөләтләрниң һәммисигә дегүдәк сиңдүрүп паалийәт елип бармақта. Дуня уйғур қурултийиму хитай ишпийонлириниң бузғунчилиқ һәрикәтлиригә қарита, өзлири турушлуқ дөләтләрниң қанун иҗра қилиши органлири билән һәмкарлишиш қатарлиқ тәдбирләрни алған.

Бу йил язда җасус гумандари бабур мәхсутниң тутулуши, чәтәлләрдики уйғур җамаити арисида ғулғула қозғиған темиларниң биригә айланған иди. Елшат әпәндиниң билдүрүшичә, бу нөвәт германийидә сораққа тартилған 4 нәпәр хитай җасус гумандариниң ашкарилинишини бабур мәхсутниң делоси билән мунасивәтлик дәп қарашқиму болидикән.

Бүгүнки хәвәрләргә қариғанда, сәйшәнбә күни германийә сақчи даирилири ахтуруп сораққа тартқан хитай җасуслуқ гумандарлириниң иккиси германийә пуқраси болуп, улар 42 яштин 63 яшқичә болған хитай әрләр икән. Буларниң һәммиси хитайниң мюнхендики консулханиси тәрипидин контрол қилинидикән. Германийә җасуслуққа қарши туруш органлири бу хитайларниң башқа җасус гумандарлири билән мәхпий учрушуш қатарлиқ һәрикәтләр елип бериватқанлиқини байқиған.

Мәлум болушичә, бу хитай гумандарлар "чәтәл һөкүмәтлири үчүн ишпийонлуқ қилиш" җинайити билән тәкшүрүлмәктә икән. Вол стрит журнили гезитидә нәқил қилинишичә, германийиниң карлсруһә шәһиригә җайлашқан әдлийә даирилири, мәзкур җасус гумандарлири делосини тәкшүрүшниң йәнә бир нәччә ай давам қилиши мумкинликини илгири сүргән.

Ахирида, дуня уйғур қурултийиниң мәхпийәтликни қоғдаш оргини - ички ишлар министирлиқиниң башлиқи елшат әпәнди, нөвәттә уйғур тәшкилатлири дуч келиватқан ишпийонларниң бузғунчилиқи вә ишпийонларниң һәрикәт алаһидилики һәққидә тохталди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.