Хитай маллири мисирни қаплап кәтти

Сүрийидә йәрлик һүнәрвәнләр, тоқумичилар вә тикишчиләр сүрийә базарлирини толдурувәткән хитай маллириға наразилиқ билдүрүп иш ташлиғандин кейин, бу әһвал мисир хәлқигиму тәсир қилған. Чүнки мисир базарлиридики хитай маллири сүрийә базарлиридикидин қелишмайду.
Мухбиримиз өмәрҗан тохти
2010-05-03
Share

Мисирниң "әл муһит" тор бекитидә "хитай маллириниң айиғи қачан үзүлиду?" дегән темида бир мақалә елан қилинған болуп, униңда мундақ дәп йезилған:" һөкүмәт барлиқ тәшвиқат вастилирини ишқа селип, мисирлиқ иш адәмлирини йәрлик ишләпчиқиришни илгири сүрүшкә тәшәббус қиливатқан мушу күнләрдә, базарлиримиз хитай дөлитидин келидиған, нәрқи әзан әмма чидимайдиған сахта маллар билән толуп ташмақта. яз пәсли келиши билән мисирниң шубра, умранийә, фәйсәл, һулван вә башқиму районлиридики базарларда хитайниң йәрмәнкилири ечилғандин ташқири, мисирниң һәр қайси коча - базарлирида хитай магизинлири һәдәп ечилмақта. Бу магизинларни хитайлар биваситә өзлири идарә қилмақта. Мундин башқа хитайниң яш қиз - оғуллири мисирниң һәр қайси шәһәрлиригә толуп ташмақта. Гаһида тосаттин бири ишикиңизни қақиду, ишикни ачқиниңизда, хитай маллири билән сомкилирини толдурувалған бир яки икки хитай қизи мисир шивисини бузуп сөзлигән һалда, елип кәлгән нәрсә ‏- керәклирини тонуштурушқа башлайду. Улар мисир базарлирини қолиға алғанниң сиртида, сомка көтүрүш тиҗарити биләнму һәр қайси мәһәллиләрниң сода ишлирини қолиға еливалмақта".

""Хитай маллири мисирниң йәрлик ишләпчиқиришиға зиян салмақта

Мақалидә йәнә мундақ дейилгән: "хитай маллириниң йоллуқ вә йолсиз һалда мисир базарлириға һәдәп кирип, йәрлик малларниң базирини касат қилиши нәтиҗисидә келип чиққан зиян, ширкәтләр, содигәрләр вә шәхсләрни еғир дәриҗидә зиянға учратмақта. Тор бекитимизниң мухбирлири мисирлиқ пуқраларниң мисир базарлирида йейилип ятқан хитай маллири һәққидики инкаслирини аңлап беқиш үчүн улар билән сөһбәтләрни өткүзгән. Қаһирә шәһириниң шубра районида олтурушлуқ өй аяли әдлийә сәфвәт мундақ дәйду: " өйимизниң ишики тола қеқилиду. Һәр қетимда ишикни ачқинимда, бир хитай қизи йоған сомкини көтүрүвалған һалда, ишик алдида қарап туриду. Көтүрүвалған сомкиси йиңнә, йип, қол чириқи, қача, пичақ вә башқа хитайниң өй әшялири билән лиқ толған. Мән һәр қетимда, бу әшяларниң әрзанлиқиға алдинип көп сетивалимән. Кейинки һәптиси йәнә шу нәрсиләрни қайта сетивалимән. Чүнки уларниң ишләпчиқарған нәрсилири аран бир һәптә әсқатидикән. Шундақ қилип өй әшялиримизниң көп қисми хитай маллириға айлинип болди. Бу малларниң нәрқи әрзанлиқи бизни қизиқтуридикән, әмма узун чидимайдикән. Өзимизниң дөлитидә ишләпчиқирилған йәрлик маллиримиз гәрчә бир аз қиммәтрәк болсиму, узун раваҗ қилидикән. Шуңа һәммидин өзимизниң йәрлик маллиримизниң яхши икәнликини чүшинип йәттим."

"Херидарлиримизму өйлиригә тәйяр әкилип берилгән хитайниң сахта маллириға алдинип қалди"

Мухбирлиримиз мисирлиқ дукандарлар биләнму сөһбәт елип барған. Қаһирә шәһиридики кичик бир тәйяр кийим магизининиң игиси муһәммәд әтийә наһайити ғәзәпләнгән һалда мундақ деди:" хитай маллири өйлиримизни харап қилғанни аз дәп, әмди дуканлиримизға зиян салмақта. Мән бурун һәр күни аз дегәндә 10 миң җүнәйлик мал сататтим. Әмма һазир әтигәндин кәчкичә сатқан мелим 5 миң җүнәйгә йәтмәйду. Бу хитай маллириниң базарлиримизниң һәр қайси дуканлирида толуп ташқанлиқи, уларниң өйләрниң ишиклирини қеқип йүрүп мал сетишлири сәвәбидин болмақта. Буниң билән һәр пәсилдә нәрсә ‏- керәклирини биздин сетивалидиған узун йиллиқ херидарлиримизму биздин йүз өрүп кәтти. Улар өйлиригә тәйяр әкилип берилгән хитайниң сахта маллириға алдинип қалди. Биз болсақ зиян тартидиған болуп қалдуқ. Бу ишниң алдини алмиғанда бизниң ишимиз техиму қийинлишиду."

Юқиридики аваз улинишидин, бу һәқтики мәлуматимизниң тәпсилатини аңлайсиләр.
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт