Süriye bazarliri xitay malliridin zérikti

Süret, 2010 - yili 10 - aprél tartilghan bolup, pingxu shehiridiki bir kiyim - kéchek zawutida ishleydighan bir xitay ayal ishchining ish üstidiki körünüshi.

Ereb qoltuqigha jaylashqan döletlerge kélip - kétidighanlar we xéridarlar köp bolghanliqi, yene bir tereptin bu döletler köprek néfitke tayan'ghanliqtin, bu döletlerge kirgen chet'el malliri yerlik xelqning égilikige anche zor tesir qilip ketmigen bilen, misir we süriyige oxshash döletning bayliqi we xelqning kirimi yerlik fabrikilargha tayinidighan döletlerge chet'ellerdin kirgen erzan mallarning ziyini nahayiti köp bolmaqta. Hetta süriyide yerlik fabrikilardin yüzde 70 pirsenti ishtin toxtap qalghan.

"El jezire"ning xewiri

Qatarning"el jezire" téléwiziye qanilining 2010 - yili22 - april künidiki xewiride, süriye xelqining, xususen süriyidiki yerlik fabrikilarning xitaydin keltürülgen teyyar kiyim - kécheklerning köplikidin mölcherligüsiz zor iqtisadiy krizisqa yüz tutqanliqini, bu sewebtin süriyide dukandarlar we kiyim - kéchek fabrikiliridiki ishchilarning xitay mallirigha naraziliq bildürüp omumyüzlük ish tashlash herikiti élip barghanliqini xewer qildi.

Xewerde mundaq dé'iyilgen: "süriyige xitay mallirining köplep kirishi we yerlik mallarning ornini égilishi netijiside, süriyining yerlik fabrikiliridin yüzde 70 pirsenti ishtin toxtap qaldi. Xususen xitayning bahasi erzan, emma süpiti nachar teyyar kiyimlirining köpliki seweblik ziyan'gha uchrighan kiyim tikish fabrikilirining sani kündin ‏ - kün'ge köp bolmaqta. Ötken ikki yil mabeynide, süriyining demeshiq we heleb sheherliride, ming yillardin biri ishlep kelgen chong fabrikilardin 74si taqilip qalghan, nurghun ishchilar ishsiz qalghan. Bu sewebtin süriyining demeshiq we heleb sheherliride, ikki kündin biri minglarche ishchilar ish tashlighan."

Xitay malliri süriyige qanunsiz yollar bilen kiridu

"El jezire" téléwiziyiside élip bérilghan söhbetke ishtirak qilghan süriyilik bir iqtisad mutexessisi mundaq dédi: "süriye qanuni chet'ellerdin élip kelgen mallargha yüzde 50 pirsent etrapida baj élishni belgiligen bolsimu, müshküller sodigerlerning yolsizliqidin kélip chiqmaqta. Chünki, nurghun sodigerler xitayning teyyar kiyimlirini qanunsiz yollar bilen süriye bazarlirigha élip kirip, ulargha yerlik markilarni chaplap satidu. Bu sewebtin qanun ularni tutalmaydu we bajmu alalmaydu. Chet'el malliri süriye bazarlirigha mundaq toxtimastin kiriwéridighan bolsa, süriye yerlik mallirining kélichek teqdirini tesewwur qilip bolghili bolmaydu."

Yuqiridiki awaz ulinishidin, bu heqtiki melumatimizning tepsilatini anglaysiler.