Xitayning Uyghur yurtlirida uzitidighan olimpik mesh'ili dölet térrorluqi we milliy zulumning belgisi

 Aptonom rayonning mu'awin re'isi, mesh'el uzutush komitétining mu'awin bashliqi tiliwaldi abduréshitning éytishiche, xitay hökümiti bu qétim mesh'el uzatquchilarni tallashta, xitaylar bilen yerlik milletlerning nisbitini tengsheshke alahide ehmiyet bergen. 377 Neper mesh'el uzatquchining 165 ni 13 xil yerlik millettin talliwalghan.

Xitayning 'shinjang paytext géziti' de bayan qilinishiche, aptonom rayonluq qatnash nazariti özining jaylardiki tarmaqliridin olimpik mesh'ilini uzitidighan xadimlargha 'qolayliq yol' échip bérishni, qatnash tarmaqlirining asasliq mes'ulliri hemme ötkelde özi turup nazaretchilik qilishni telep qilghan.

Hazir gérmaniyide turuwatqan yazghuchi köresh ataxanning qarishiche, xitayning olimpik mesh'ilini Uyghur yurtlirida uzutush ishi tarixtin buyan dawam qilip kéliwatqan olimpik en'enisige qarshi heriket. U xelq'ara teshkilatlardin, xitay hökümitining bu herikitini waqtida tekshürüshni, bu heqte xitaygha bésim ishlitishni telep qildi.

B b s ning bayan qilishiche, xitay hökümitining hazir Uyghur aptonom rayonida olimpik mesh'ilini uzutush herikiti nahayiti sezgür mesile bolup qaldi. Xewerde bayan qilinishiche, Uyghur aptonom rayonida olimpik mesh'ilini uzutush herikiti élip baridighan üch kün ichide, bixeterlik mesilisige chétilidighan adem sani nahayiti köp bolghanliqtin, xitay hökümiti xelqtin sirtqa chiqmay öyde olturup téléwizor körüshni telep qilghan. Hökümet bu heqtiki teshwiqatlirida, buyil 'shinjangni baza qilghan térrorchilargha da'ir ikki déloni pash qilin'ghanliqi, bolupmu béyjinggha mangghan yoluchilar ayropilanida ot apiti peyda qilish suyiqesti yüz bergen weqeni alahide eskertken. Xitay hökümiti jakarlighan belgilimilerde yene, xelqtin bu töt sheherde olimpik mesh'ilini uzutush jeryanida téz ot tutushidighan nerse élip yürmeslikni, étildaq atmasliqni, yollarda, bolupmu köwrüklerning üstide turmasliqni, xitayning dölet obrazini chüshüridighan sho'arlarni towlimasliqni alahide telep qilghan.

Köresh ataxanning qarishiche, xitay hökümitining Uyghur yurtlirida uzutidighan bu olimpik mesh'ili hazir xitayning dölet térrorluqi we milliy zulum yürgüzüshning belgisi bolup qaldi. Xelqning raziliqsiz, rohi mayilliqisiz élip bérilghan her qandaq heriket shu jaydiki hakimiyetning abroyini tökidu. Shu jaydiki xelqning erkinlikke bolghan arzu - isteklirini téximu kücheytidu. Xitay hökümiti Uyghur yurtlirida bundaq mesh'elni uzutush herikiti élip barghan waqitta, sherqiy türkistan teshkilatliri weten ichide we sirtida öz qelbidiki erkinlik mesh'ilini tutashturidu.