Pakistandiki xitay muhajirlar jem'iyitining re'isi riza xan, konsulxanidin alghan pulining hésabatini bérelmidi

Pakistandiki xitay konsulxanisi, 2007-yili pakistanning rawalpindi we gilgit shehiride xitay muhajirlar jem'iyitini tesis qilghan. Bu jem'iyetke xitay konsulxanisi bilen munasiwiti yéqin bir türküm kishiler eza bolghan we jem'iyetning mes'ulliri qilip békitilgen idi. Radi'omizgha kelgen inkaslardin melum bolushiche, xitay elchixanisi bu jem'iyetke bulturdin bashlap belgilik miqdarda pul bermekte؛ emma jem'iyet mes'ulliri bu pulni nege ishlitiwatqanliqi heqqide pakistandiki Uyghur jama'itige hazirghiche héchqandaq melumat bermigen. Bu munasiwet bilen muxbirimiz bügün mezkur jem'iyetning bashliqi riza xan we pakistandiki bir qisim Uyghurlardin melumat igilidi.

Inkaslardin melum bolushiche, pakistandiki xitay muhajirlar jem'iyiti, bir qanche yildin béri belgilik miqdarda pul almaqta. Bezilerning déyishiche bu pulning miqdari 50 ming bilen 100 ming dollar arisida, bezilerning déyishiche, 200 ming dollardin artuq. Emma bu pulning kim üchün we qandaq ishlitiwatqanliqi héchkimge melum emes. Pakistandiki Uyghurlarning köpinchisi bu pulning nege ishlitilishidin qet'iynezer, xitay elchixanisidin bérilgen pulning qobul qilinishigha narazi:

Gézit xewerliride bayan qilinishiche, pakistandiki xitay muhajirlar jem'iyitining mes'ulliri, xitay hökümitining teklipige bina'en yéqinqi yillardin béri Uyghur éli we xitay ölkilirini arqa-arqidin birqanche qétim ziyaret qilghan. Ular ziyarettin qaytip kelgendin kéyin, xitayning milletler siyasiti we iqtisadiy siyasetlirini maxtap, pakistan gézitliride maqalilerni yazghan. Jem'iyet re'isi rizaxanning bu türdiki maqaliliridin béri, pakistandiki “Iqtisadqa nezer” namliq zhurnalda élan qilin'ghan. Pakistandiki bezi Uyghurlar, mezkur jem'iyetke bérilgen pulning, ularning xitayning teshwiqatini qiliwatqanliqi üchün bérilgenlikini, shunga elchixaniningmu, bu pulning ishlitish ornini sorimaywatqanliqini otturigha qoymaqta.