Ихтисаслиқларни йиғишму, нопус йөткәшму?

Уйғур райониниң йеңи партком секретари җаң чүншән, районда һалқима тәрәққият вә узун мәзгиллик әминликни шәкилләндүрүш пилани бойичә, йәнә бир йеңи чақириқ оттуриға қойған. Чақириқ, "ихтисаслиқларни тәрбийиләш, ихтисаслиқларни җәлп қилиш, ихтисаслиқлардин пайдилиниш вә ихтисаслиқларни риғбәтләндүрүш"тин ибарәттур.
Мухбиримиз шоһрәт һошур
2010-06-17
Share
Xitay-aqqun-ishchilar-305 Хитайниң мәлум бир вогзалида пойиз күтүватқан аққун шчилиридин бир көрүнүш.
AFP Photo

Әмма ихтисаслиқлар дегән бу сөз уйғур җәмийитидә йәнә пәрқлиқ мәнағиму игә. Бултурдин бери уйғур җәмийитидә кәң тарқалған: "нур бәкригә хәт" намлиқ сатирик шеирдин арийәдур. Шеирда шикайәт қилинишичә, хитай һөкүмити, хитайниң намрат деһқанлирини, деһқанчилиқ маһирлири нами астида уйғур райониға йөткәп кәлмәктә. Хитай деһқанчилиқ маһирлириниң уйғур елиға еқип келиши, уйғур деһқанлириниң йәрдин айрилип қелишиға сәвәб болған. Шуңа уйғур көзәткүчиләр, җаң чүншйәнниң ихтисаслиқларни йиғиш дегән чақириқиға гуман вә әндишә билән қаримақта.

Җаң чүншән бу һәқтики сөзидә уйғур райониниң чегра район икәнликини, шараитиниң начар икәнликини, тәрәққиятта арқида қалғанлиқини, шуңа бу йәрдә ихтисаслиқларниң кәмчил икәнликини, ихтисаслиқларни көпәйтиш үчүн, сехилиқ билән пул хәҗләш вә етибар бериш сиясәтлирини қоллиниш керәкликини билдүргән. Бу сөзләрдин ихтисаслиқларниң йәнила хитай өлкилиридин дәвәт қилиниватқанлиқи мәлум. Мана бу әһвал һүсән әпәндиниң юқириқи пәрәзлириниң тоғрилиқини испатлимақта.

Җаң чүншән нутқида ихтисаслиқларни қачуруп қоймаслиқ, ихтисаслиқларни олтурақлишип қелишқа илһамландуруш тәшәббусини оттуриға қойған. Бу тәшәббуста, көчмәнликкә дәвәт қилиш тәләппузи ениқ, урғулуқ оттуриға қоюлған. У ихтисаслиқларни йиғиш һәққидики чақириқиниң һечбир йеридә ихтисас игилирини йәрликтин йетиштүрүш вә яки йәрлик ихтисас игилиридин пайдилиниш һәққидә еғиз ачмиған.

Вәтәндин йеңи чиққан бир уйғур яшниң билдүрүшичә, нөвәттә уйғур елида уйғур ихтисас игилириниң кәмчил икәнлики бир мәсилә, әмма мана мушу аз сандики ихтисас игилириниңму қәдирләнмәйватқанлиқи вә чәткә қеқиливатқанлиқи йәнә бир мәсилә; у бу әһвални, өзи билән алий мәктәптә оқуған савағдашлириниң әһвалини пакит көрситип чүшәндүриду.

Уйғур алий мәктәп оқуғучилири коча чарлаш ишиға өчирәттә туруватқан бу күнләрдә, җаң чүншән уйғур елиға хитайдин ихтисас игилирини дәвәт қилмақта. Бу чақириқ уйғур көзәткүчилири тәрипидин нопус йөткәш чақириқи дәп қаралмақта. Нопус мәсилиси уйғур елидики әң сәзгүр мәсилиләрдин биридур.

Бир қанчә йилниң алдида язғучи изчимәнниң "мустәқиллиқимизда үмид барму ?" намлиқ китабида райондики хитай нопуси, уйғур елиниң кәлгүси үчүн әң хәтәрлик тәһдит дәп көрситилгән вә бу тәһдитни азайтиш үчүн, паракәндичилик териш шәклидики қаршилиқ һәрикәтлирини тәшәббус қилған. Мәзкур китаб, 2003 ‏- йили хитай һөкүмити тәрипидин террорлуқни тәшвиқ қилиш билән әйибләнгән. Җаң чүншйәнниң бу қетим ихтисаслиқларни йиғиш чақириқи әнә шундақ бир сәзгүр мәсилигә четишлиқ болуп, бу чақириқниң уйғур елиниң муқимлиқи үчүн иҗабий тәсир көрситиши еһтималдин узақ көрүлмәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт