Хитай дуняда иҗабий образ тикләш үчүн 45 милярд йүән мәбләғ салған

'Җәнубий хитай сәһәр гезити' ниң баян қилишичә, хитай һөкүмити хәлқарада өзиниң образини яхшилаш үчүн, 45 милярд йүән мәбләғ аҗратқан. Бу пулни хитай коммунист партийисиниң мәркизи TV истансиси, шинхуа агентлиқи, хәлқ гезитидин ибарәт үч чоң учур вастиси өзиниң тәшвиқат торлирини пүтүн дуняға кеңәйтиш үчүн 15 милярд йүәндин айришивалған. Хитайниң бу тәшвиқат вастилири буниңдин кейин қанал, сәһипилринила әмәс, тил түрлириниму һәссиләп көпәйтидикән.
Мухбиримиз вәли
2009.02.04
Dollar-Sale-305 Хитайниң мәлум пул муамилә дукинидики көргәзмигә тизилип қойулған америка доллири.
AFP Photo

Ли чаңчүн: бу заманда кимниң тәшвиқат қорали илғар болса, дуняда шуниң тәсири күчлүк болиду

Радиомиз мухбирлириниң баян қилишичә, хитай коммунист партийә мәркизи комитети сиясий бюросиниң даимий әзаси ли чаңчүн йеқинда қилған сөзидә 'бу заманда кимниң тәшвиқат қорали илғар, иқтидари юқири болса, дуняда шуниң тәсири күчлүк болиду' дегән.

Хитай хәлқ университети учур - вастә тәтқиқат орниниң муавин башлиқи ху бәйҗиң хитай әмәлдарлириниң сөзини шәрһиләп ' америка 1945‏ - йилидила дөләт мунасивәтлири истратегийисини түзүп чиқип, әркинлик десә һәммә киши америкини көз алдиға кәлтүридиған, америкиниң қиммәт қариши десә, һәммә киши тәң - баравәрлик, демократийә, әркинликни көз алдиға кәлтүридиған қилиш үчүн өзиниң учур вастилирини қуруп чиққан иди. Биз техи учур вастилирини истратегийә пәллисигә йәткүзәлмидуқ. Бизниң бу аҗизлиқимиз 2008‏ - йилида толуқ ашкариланди' дегән.

Ху бәйҗиң: чәтәл мухбирлирини қоғлап чиқарған идуқ, җедәл җимиқти

Хитайниң учур - вастә тәтқиқат орниниң башлиқи ху бәйҗиң баянида 'он төтинчи март тибәт вәқәси' йүз бәргәндин кейин, дунядики учур васитилирида далай лама гуруһи йетәкчи орунға өтүп қалди. Тибәт милләтчилики җуңгониң тәшвиқатини гумран қилди.
Әмма, биз чәтәл мухбирлирини қоғлап чиқирип, учур вастилирини контрол қиливалғандин кейин, гәрчә бу, бурунқи заманлардики йепиқ җәмийәт вә мустәбитлик шәкил болсиму, әмма бу чарә йәнила җедәлни җимиқтурди' дегән.

Униң қаришичә, 2008‏ - йил 4 ‏ - айниң 1 ‏ - күнидин кейин, бейҗиң олимпик мәшили пүтүн йәр шарида айландурулғанда, лондон, париж, сан франсесколарда тосалғуға учриған иди, һөкүмитимиз буниңға амал қилалмиди. Мана бу бизниң дөләт мунасивәтлири истратегийимиз тиклинип, буниңға мунасип һалда учур - вастилири қурулмиғанлиқтин болған.

Хитайниң образини қилған гепиниң рас яки ялғанлиқи бәлгиләйду

Америка авазиниң баян қилишичә, америкидики майами университетиниң хитай мәсилилири тәтқиқатчиси деллер юқиридики көз қарашни рәт қилиду. Униң баян қилишичә, хитай коммунист һөкүмити 1949‏ - йилидин кейинла, өзиниң коммунизм тәшвиқатини пүтүн дуняға йүзләндүрүшкә башлиған иди. Һәр хил тилда нәшр қилған китаблирида һәдәп 'хәлқниң бәхтлик турмушқа еришкәнлики'ни тәсвирлигән иди. Дуняда коммунизм системиси гумран болғандин кейин болса, хитай өзиниң куңзи тәлимати буйичә иш қилип келиватқанлиқини тәсвирлиди. Әмма бу тәшвиқатларниң һечқайсисиниң үнүми көрүлмиди, буниңға хитай қилған гәпниң рас яки ялғанлиқи сәвәбчи болди.

Хитай дуняда иҗабий образ тиклимәкчи болса, буниңға дәлил көрситиши керәк

Америкидики вашингтон университетиниң америка - хитай мунасивәтлири профессори җозип әпәндиниң баян қилишичә, һечким өзиниң иҗабий образини ойдурмичилиқ яки ялған тәшвиқат билән тиклийәлмәйду. Хитай һөкүмити дуняда өзиниң иҗабий образини тиклимәкчи болса, буниң үчүн чоқум дәлил - пакит көрситиши керәк. Кишилик һоқуққа һөрмәт қилиши, башқиларниң әқлий мүлүк һоқуқини етирап қилиши, сахта мал, сахта дора ишләпчиқармаслиқи керәк.

Лондондики кәш вәқәсидин кейин хитайниң милләтчилик образи йәнә пәйда болди

Бирләшмә агентлиқиниң баян қилишичә, лондондики камбриҗ университетиниң оқуғучилири венҗабавға 'бу мустәбит бизниң мәктәптә өзини сатамдикән' дәп варқирап кәш атқандин кейин, нәқ мәйдандин елинған учурларни хоңкоң TV лири көрсәтсә, хитай һөкүмити уни кесивәткән иди. Әмма түнүгүн хитайниң мәркизи TV истансиси һәммә көрүнүшни өзи толуқ көрсәтти.

Буниңдин кейинла, хитай милләтчилики қозғилип, вен җябавға кәш етип 'җуңгониң образи'ға чеқилған чәтәлликләргә өчмәнлик ипадиләп әсәбийлишишкә башлиди. Хитайда 258 милйон адәмниң интернет торлиридики паалийитини көзитиватқан тор сақчилири дәрһал һәрикәткә келип, чәтәлләрдики демократийини мәдһийилигән обзорларни кесишкә, хитайдики мустәбитликни паш қилған кишиләрни из қоғлап сүрүштүрүшкә башлиди.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.