Xitay kompartiye ömiki qazaqistanda ziyarette

Xitay kommunistik partiyisining resmiy wekilliri qazaqistanda ziyarette boldi. Qazaqistan jumhuriyiti "nur otan" xelq - démokratik partiyisining teklipi bilen qazaqistan'gha kelgen xitay kommunistik partiyisining merkiziy komitéti siyasiy byurosining ezasi, xitay kommunistik partiyisi merkiziy komitétining katipi, teshwiqat ministiri lyu yünshen "nur otan" partiyisi re'isining birinchi orunbasari nurlan nighmatulin bilen uchrashti.
Muxbirimiz oyghan
2010-09-07
Share
Qazaqistan-Xitay-nefit-gaz-turubisi-305.jpg Süret, qazaqistan - xitay néfit turubisi pütüp ishqa chüshkendiki körünüsh.
AFP Photo

Uchrishish dawamida ikki partiye otturisidiki hemkarliq mesililiri qaraldi. Yerlik axbarat wasitilirining melumatlirigha qarighanda, qazaqistan we xitay otturisidiki munasiwetlerge, shu jümlidin partiye derijisidiki hemkarliqqa qazaqistan hökümet da'iriliri yuqiri baha bermekte.

Nurlan nighmatulin ikki dölet otturisidiki mundaq alaqilerning bu ikki memliketning lidérliri nursultan nazarbayéf we xu jintawning dostluq munasiwetliri arqisida yüz bériwatqanliqini tekitligen. U shundaqla lyu yünshenni "nur otan" partiyisining qazaqistanning ijtima'iy - iqtisadiy hayatida élip bériwatqan siyasiti bilen tonushturup, uni partiyining kelgüsidiki 13 - qurultiyigha qatnishishqa chaqirghan.

Öz nöwitide lyu yünshen qazaqistan prézidéntining xitayda chong hörmetke ige ikenlikini hem shundaqla uning dunyadiki eng ataqliq lidérlarning biri ikenlikini ilgiri sürdi. Xitay teshwiqat ministiri qazaqistanning xelq'aradiki rolini we dunyawi maliye krizisi dewridiki utuqlirini alahide tekitlidi. Uchrishish dawamida kélechekte kespiy partiye kadirlirini teyyarlashta öz ‏ - ara tejribe almashturush tekliplirimu otturigha qoyulghan idi.

Lyu yünshen qazaqistan hökümiti bash ministiri kerim mesimof bilen körüshken hem bu jeryanda ular ikki dölet otturisidiki soda we iqtisadiy alaqilerni muhakime qilghan. Ular n. Nazarbayéf we xu jintaw otturisidiki muzakire dawamida qolgha keltürülgen kélishimlerning hemde qazaqistan - xitay istratégiyilik hemkarliqining muweppeqiyetlik emelge ashidighanliqini ümid qilidighanliqini bildürgen.

Astanada xitay partiye ömiki yene, qazaqistan jumhuriyitining alaqe we axbarat ministiri asqar jumaghaliyéf bilen uchrashti. Söhbet jeryanida ular ikki elning alaqe we axbarat saheliridiki mesililerni muhakime qildi hem qazaqistan téléwiziye kanallirini xitay jumhuriyitide anglitish mumkinchiliklirini qarashturdi.

Igilishimizche, xitay partiye ömiki 3 - séntebir küni almatada bolup, yerlik hökümet, bilim we axbarat wekilliri bilen uchrashqan. Lyu yünshen shundaqla, almata shehiri hakimi, "nur otan" partiyisining almatadiki bölümining re'isi exmetjan ésimof bilen körüshti. E. Ésimof almataning 70 yil mabeynidiki utuqlirini tekitlep, qazaqistan boyiche aliy mektep oqughuchilirining 30 pirsentining, bank ish - heriketlirining 55 pirsentining, axirqi sekkiz ay ichidila dölet meblighi hésabigha chüshüwatqan omumiy séliqlarning 29 pirsentining almata shehirige toghra kélidighanliqini atap körsetken. U shundaqla sheherde köpligen xitay shirketlirining ish élip bériwatqanliqini, shuning bilen bir waqitta qazaqistan soda shirketlirining ürümchide pa'aliyet körsitiwatqanliqini otturigha qoyghan.

Xitay partiye ömiki shundaqla el - farabi namidiki qazaq milliy uniwérsitétida bolghan. Mezkur uniwérsitétning bashliqi bexitjan jumaqulof uniwérsitét terkibidiki kungzi institutining pa'aliyiti heqqide alahide melumat bergen. Lyu yünshen uniwérsitét ishigha yuqiri baha bérip, bu yerde mingdin oshuq xitay oqughuchilirining bilim élishi qazaqistan - xitay dostluqining yarqin delili ikenlikini tekitligen.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet