Коммунист хитайниң 90 йиллиқ байримиға қарита инкаслар

Хитай коммунист партийисиниң 90 йиллиқ байрам паалийәтлирини, дунядики көпинчә гезитләр хәвәр қилди.
Мухбиримиз вәли
2011-07-01
Share
xitay-kommunist-partiyisi-90-yilliqi-osmurler-305.jpg Хитайда өсмүрләр қоллирида гүл тутуп, коммунист хитайниң 90 йиллиқ байримини тәбриклиди. 2011-Йили 1-июл. Чоңчиң.
AFP

Шинхуа агентлиқи, коммунист партийиниң 90 йили коммунист партийә хитай хәлқини йетәкләп зәпәр қучуп алға илгирилигән, хитай дөлитиниң дүшмәнлиригә қарши күрәш қилип ғәлибә қилған 90 йил дәп мәдһилийиди. Хәлқ гезити, буниңдин кейинки 90 йилму коммунист партийә ғәлибә қазинидиған 90 йил болиду дәп җакарлиди.

Әмма, америка авази, хитай коммиунист партийисиниң рәиси ху җинтав партийиниң 90 йиллиқни тәбрикләш мурасимида қилған тәбрик сөзидә, һазир коммунист партийиниң тәқдиригә қарита қаттиқ ғәм-әндишә қиливатқанлиқини ипадилиди, дәп баян қилди.

Хәвәрдә ейтилишичә, ху җинтав, коммунист партийиниң һазир роһи хунүкләшкән хәвп ичидә, хәлқтин айрилип қелиш хәвпи ичидә, пассиплиқ-чериклик хәвпи ичидә қалғанлиқи мана көз алдимизда турупту, әмди коммунист партийини қаттиқ идарә қилиш керәк, дегән. Шуңлашқа һазир коммунист партийини “хәвп” ләрдин қутқузуш үчүн, коммунист партийиниң мирасхорлири хитайниң һәммә йеридә қизил нахша ейтиш һәрикити қозғиған.

Бирләшмә агентлиқиниң баян қилишичә, хитай коммунист партийиси 90 йиллиқини тәбрикләватқанда, хитайниң толуқ аптономийиси хоңкоңда 220 миң адәм кучиға чиқип, хитай һөкүмитиниң хәлқни кәмситидиған сиясәтлиригә вә өй баһаси өрләп кәткәнликигә наразилиқ ипадилигән. Улар намайишта юқири авазлиқ сигнал яңритиш, қаттиқ думбақ челиш, сақчиларниң каскилирини уруп тараңлитиш қатарлиқ васитиләрни қолланған. Йәр-земин хоҗайинлири йоқалсун дәп шоар товлиған. Бу, хоңкоң 1997‏-йили 7‏-айниң 1‏-күни хитайға тәвә болғандин кейин, хоңкоңда тунҗи қетимлиқ әң қаттиқ ғәзәп ипадиләп өткүзүлгән намайиш болуп һесаблиниду.

Чәтәлләрдики хитайпәрәс учур васитилиридин довей агентлиқиму бүгүн, хитай коммунист партийиси 90 йиллиқини тәбрикләватқанда, хитайниң шәндуң өлкисидики йәнтәй шәһиридә миңдин артуқ кәсип алмаштурған һәрбийләр кучиға чиқип, коммунист партийиниң өзи чиқарған сиясәтләргә әмәл қилмиғанлиқиға қарши намайиш қилған нәқ мәйдан көрүнүшини елан қилди. Буниңда йәнә, шәнши өлкисидиму буниңға охшаш намайиш болған нәқ мәйдан көрүнүшиму бар.

Хитай коммунист партийисиниң дости тәйвәндики гоминдаң бүгүн, бейҗиңдики коммунист партийә байримиға соғуқ муамилә қилди.
Гоминдаңчиларниң тор понкитлирида, коммунист партийә бу 90 йилиниң алдинқи 30 йилида гоминдаңни алдиди, иккинчи 30 йилида чоң қуруқлуқтики хәлқни азаблиди вә қирғин қилди, кейинки 30 йилда хәлқни булаң-талан қилди, буниңдин кейин йәнә һакимийәт тутимән десә, у бир шерин чүш дегән баһа тарқалди.

Асахи шинбон қатарлиқ японийә учур васитилири хитай коммунист партийисиниң 90 йиллиқида елан қилған обзорларда, хитай коммунист партийиси сотсиялизм қуримән дәп мәғлуп болған 90 йил, әмди йолини оңлап маңидиған болуши керәк, қошниларға зомигәрлик қилимән дәп ойлимаслиқи керәк дегән мәзмунлар ипадиләнди.

Һазир америкида туруватқан мустәқил тәтқиқатчи сав чаңчиң әпәнди, хитай коммунист партийисиниң 90 йилиға бәргән баһасида, хитай коммунист партийиси уйғурларға салған зулумларни тәсвирләп мундақ дәп язиду: ғулҗида 1961‏-йили хәлқ топлинип һөкүмәткә тәләп сунса, коммунист партийиниң шинҗаң һәрбий райони буйруқ чүшүрүп хәлқни оққа тутуп, уйғурларниң чәтәлләргә қечиш вәқәсини кәлтүрүп чиқарди. 1962‏-Йили бай наһийиисдила, коммунист партийиниң ашлиқ искилати алдида зарлинип туруп вә зарланғили келиветип йолда өлгән онмиңлиған уйғурниң җәсити қалди. 1997‏-Йили ғулҗида, коммунист партийигә наразилиқ билдүрүп намайиш қилған бирнәччә миң уйғурниң ичидики яшларни, қәһритан қишта муз тоңлатқан путбол мәйданиға солап азаблиди. Уларниң бир қисми тоңлап қетип қалди. 2009‏-Йили 7‏-айниң 5‏-күни үрүмчидә, коммунист партийиниң миллий кәмситиши сияситигә қарши намайиш қилип, хата сиясәтләрни түзитишни тәләп қилған уйғурларни қораллиқ бастурди вә хитай көчмәнлиригә урғузди. Бу вәқәдә бир нәччә йүз адәмни өлтүрди, бирнәччә миң адәмни тутқун қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт