Хитай һөкүмити уйғурларға қаратқан 'қош тил' маарипини күчәйтмәктә

Уйғур елиниң наһийә йеза - қишлақлириғичә қош тил маарипини күчәйтиш долқуни қанат яйдурулған болуп, ақсу вилайитигә тәвә тоқсу наһийисидила 16 "қош тил" йәслиси ечиш пилан қилинған.
Мухбиримиз әқидә
2010-10-05
Елхәт
Пикир
Share
Принт
Түркийидә 17 йилдин бери үзүлмәй нәшр қилиниватқан көкбайрақ жорнилиниң бу айлиқ сани хитайниң қош тиллиқ маарип сийаситигә атап нәшр қилинған болуп, сүрәт, жорналниң муқава көрүнүши.
Түркийидә 17 йилдин бери үзүлмәй нәшр қилиниватқан көкбайрақ жорнилиниң бу айлиқ сани хитайниң қош тиллиқ маарип сийаситигә атап нәшр қилинған болуп, сүрәт, жорналниң муқава көрүнүши.
RFA Photo / Erkin Tarim

"Қош тил" маарипи изчил түрдә уйғурлар тәрипидин тәнқид қилинип келиватқан пәйтләрдә, хитай һөкүмитиниң уйғурларға қаратқан "қош тил" маарип сияситини техиму кәскинләштүрүши, уйғур миллити үчүн қандақ ақивәтләрни мәйданға кәлтүриду? уйғур елидики оқутқучиларниң буниңға нисбәтән қандақ қарашта? төвәндә мухбиримиз әқидә һазирлиған мәлуматни аңлайсиләр.

Хитай һөкүмити бу йил 6 ‏- айниң 1 ‏- күни, йеңи "қош тил" маарип пиланини елан қилған болуп, пиланда 2012 ‏-йилиға қәдәр уйғурлар арисида барлиқ йәсли вә балилар бағчилирини қош тиллаштуруп болуш, 2015 ‏- йилғичә барлиқ оттура мәктәпләрни бу сәвийигә йәткүзүш, 2020 ‏- йили болса һәрқандақ мәктәптә қош тил раван сөзлинидиған қилиш бекитилгән.

Мәзкүр пиланға асасән, хитай даирилири уйғур елиниң наһийә, йеза - қишлақлириғичә "қош тил " маарипи сиясити изчил түрдә күчләндүрүлмәктә. Йеқинда тәңритағ уйғур торида елан қилинған хәвәргә көрә, бу йил ақсу вилайитигә тәвә тоқсу наһийисидә йеңидин 16 "қош тил" йәслиси селиш пилан қилинғанлиқи вә буниң ичидә сәккиз йәсли пүтүп ишқа кириштүрүлгәнлики мәлум болмақта.

Хәвәрдә йәнә, мәзкүр наһийидә илгири қурулған 14 йәслидә 3300 деһқан балисиниң тәрбийилиниватқанлиқи, наһийилик парткомниң, наһийигә қарашлиқ идарә вә оттура - башланғуч мәктәпләрдин 116 кишини, йәслиләргә берип дәрс өтүш үчүн икки йиллиқ ярдәмгә аҗратқанлиқи һәмдә буниңға селинған бир йиллиқ мәбләғниң 21 милйонға йетидиғанлиқи тәкитләнгән.

Хитай даирилириниң уйғур елиниң һәр бир наһийилири бойичә елип бериватқан "қош тил" маарипини күчәйтиш сияситигә қарита уйғур елидики уйғурлар билән чәтәлләрдики уйғурлар қандақ қарашта ? мәзкүр сиясәтниң нәтиҗиси уйғурларға қандақ ақивәтләрни елип келиду ?

Биз мунасивәт билән илгири оқутқучилиқ қилған һазир ақсу шәһәрлик маарип идарисида хизмәт қилидиған бир уйғур зиялини зиярәт қилдуқ. У, уйғур аптоном районлуқ һөкүмәтниң рәиси нур бәкриниң йолйоруқи вә орунлаштуруши бойичә елип бериливатқан ишларға нисбәтән өзиниң һечқандақ пикир баян қилалмайдиғанлиқини билдүрди.

Уйғур елида тиз сүрәттә әмәлийләштүрүлүватқан "қош тил" маарип сиясити, болупму уйғур пәрзәнтлирини йәслиләрдин башлапла "қош тил" маарипи бойичә тәрбийиләшниң уйғурларға елип келидиған ақивәтлири шуниңдәк яман ақивәтләрниң алдини елиш һәққидә пикир баян қилған америкидики уйғур зиялийси доктор қаһар барат әпәнди бу һәқтә зияримизни қобул қилди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт