Әзһәр билимгаһи хитайда бесилған қуран нусхилирини мисир базарлиридин чәклиди

Қуран кәрим бесиш интайин назук вә еһтиятчан болған бир түрлүк катта иш болуп, зәрричә хаталиқ көрүлүшкә болмайду, қәдимдин буян әзһәр вә униң алимлири аңлиқ йосунда қуран кәрим басмисиниң коррикторлуқ вә тәкшүрүп селиштуруш хизмитини өз зиммисигә елип кәлмәктә.
Ихтиярий мухбиримиз өмәрҗан
2012-12-04
Елхәт
Пикир
Share
Принт
Хитайда бесилған қуран нусхиси. 2011-Йили өктәбир.
Хитайда бесилған қуран нусхиси. 2011-Йили өктәбир.
RFA/Omerjan

Әзһәр тәтқиқат институти хитайда бесилған қуран кәрим нусхилириниң мисир базарлирида сетилишини чәклиди. Мундин илгириму 2011-йили 10-айниң 11-күни тарқитилған «оттура шәрқ гезити» әзһәр китабчилиқ вә тәрҗимә ишханисиниң мудири, қошумчә қуран кәрим басмиси иҗазәтнамисини тарқитиш ишлириниң мәсули дияридин муһәммәдниң сөзини нәқил кәлтүрүп әзһәр ислам тәтқиқат институти қарар мақуллап хитайда бесилған қуран кәримләрниң мисирда сетилишини чәклигәнликини хәвәр қилған иди.

«Мәрипәт» тор бекитиниң йеңи хәвиридә, әзһәр тәтқиқат институти хитайда бесилған қуран кәрим нусхилириниң мисир базарлирида сетилишини чәклигәнлики һәққидә бир хәвәр елан қилинған болуп, униңда мундақ дәп йезилған: «пүткүл ислам дунясида әзһәр коррикторлуқ қилған вә тәкшүрүп бекиткән қуран кәрим мусулман аммиси тәрипидин ишәнчлик болған һәқиқий нәшрдики қуран кәрим дәп қарилип кәлмәктә.

Һалбуки, мәнпәәтни һәммидин әла билгән, әң чоң дәриҗидики пайда мәнпәәтни көзлигән әрәб әллиридики бир қисим қара нийәт содигәрләр әхлақ-әһкамларни бир чәткә қайрип қоюп, йирақтики хитайдин ибарәт «дуняниң завути»дин баһаси әрзан болған қуран кәримләрни импорт қилған шундақла хитайдики «мәнпәәт» нила көзләйдиған содигәрләр билән нийити асанла бир йәрдин чиқип қалған. Шу сәвәблик бу «қуран кәрим»ләрниң коррикторлуқ вә тәкшүрүп селиштуруш хизмитини есигә елишмиған. Ақивәттә, хитайда бесилған қуран кәримләр гәрчә нәпис, әрзан болғини билән мәзмунида нурғун йәрлиридә еғир хаталиқларға йол қойған. Әлвәттә мадә ин чина болуп қилиш хаталиқ әмәс, қара нийәтлик содигәрләрла бу ишниң баш әйибкари. Бирақ диний, муқәддәс китабларни бесишта әң әқәллий болған һөрмәт вә еһтиятчанлиқниң ипадилиниши иман игилириниң бир ипадиси иди.

Йеқинда, әзһәр ислам тәтқиқат институти уқтуруш чиқирип бир түрлүк хитайчә нәшрдики қуран кәримләрниң мисир базарлирида сетилишини мәни қилған. Сәвәби бу қуран кәримләр бесилиштин аввал әзһәрниң тәкшүрүп селиштурушидин өтмигәчкә нурғун айәтләрдә еғир басма хаталиқиға йол қойғаникән.

Бу қуран кәрим нусхилири хитайда бесилған болуп, қәғәзлири нәпис, бесиш техникиси юқири икән. Әмма бир қисим қара нийәтлик содигәрләр буни хитайдин киргүзүп базарда әрзан баһада сатқан. Бизниң байқишимизчә, бу хил нәшрдики қуран кәримидә нурғун қобул қилғили болмайдиған басма хаталиқлири бар икән. Бу қуранға ишләнгән җинайәттур.»

Қуранни бесиш тиҗарәт иши әмәс

Мақалидә йәнә мундақ дейилгән: бу мәсул хадимниң ейтишичә, бу қуран кәримләр ноқул сода еһтияҗи түпәйли хитайда бесилған болуп, шуңа мунасивәтлик һәрқандақ диний әһкамларға бойсунуп кәтмигәникән. Әзһәр тәтқиқат институтидикиләр хитай нәшридики қуран кәримидики хаталиқ вә кәмчиликләр тоғрисидики доклатни аңлиғандин кейин, бу нәшрдики қуран кәриминиң мисир базарлирида сетилишини чәкләш қарарини алған.

Бу қуран кәримләр чоң-кичик почта йолланмилири вә хилму-хил орап-қачилиниш билән мисир базарлириға киргүзүлгән. Хәлқарадики қуран кәрим бесиш тоғрисидики конкрет бәлгилимиләргә қарита бу мәсул киши йәнә мундақ дәйду «һәрқандақ бир дөләт қуран кәримини басса болувериду, лекин алдинқи шәрти тоғра бесилиши, қилчә хаталиқ көрүлмәслики керәк.»

Пикирләр (0)
Share
Толуқ бәт