Дөләт бихәтәрлик сақчиси билән сөһбәт

Өткән айда ғулҗа шәһириниң ташкөврүк йезисида йүз бәргән, чай ойниған 30 нәпәр аялниң тутқун қилинғанлиқ вәқәси һәққидә; һөкүмәт тәрәп мәлумат беришни изчил рәт қилип кәлгән иди. Бүгүн мухбиримиз, ғулҗа шәһәрлик сақчи идариси дөләт бихәтәрлик әтритиниң башлиқи халмураттин бу һәқтә мәлумат сориди.
Мухбиримиз шөһрәт һошур
2009.06.10
XitaySaqchiliri-200.jpg Сүрәт, хитайниң мәлум сақчи қисимлиридин көрүнүш.
AFP

Халмурат мухбиримизниң телефониға җаваб бәргәндә вәқә һәққидә ениқ мәлумат бәрмигән болсиму, нөвәттики дөләт бихәтәрлик сақчилириниң хизмәт истили һәққидә бәлгилик йип училирини бәрди.

Биз ғулҗа шәһириниң ташкөврүк йезисида йүз бәргән чай ойниған 30 нәпәр аялниң тутқун қилинғанлиқ вәқәси һәққидә ғулҗа шәһәрлик аяллар бирләшмиси, вилайәтлик тәшвиқат идариси қатарлиқ орунларға телефон қилғинимизда, соаллиримиз җавабсиз қалди.

Биз бүгүн ғулҗа шәһәр ташкөврүк йезилиқ сақчи понкитиниң сиясий комиссари илзатқа телефон қилип мәлуматларға ериштуқ. Биз йәнә, ғулҗа шәһәрлик сақчи идариси дөләт бихәтәрлик әтритиниң башлиқи халмуратқа телефон қилдуқ.

Дөләт бихәтәрлик сақчиси халмурат алди билән ашкара һалда ялған сөзлиди, бизгә мәлумат бериш әмәс, биздин мәлумат елишқа, йәни адәм тутқун қилиш үчүн йәнә йип учи игиләшкә тиришти. У қайта көрүшүш вәдисидиму турмиди. Мана бу , нөвәттә уйғур районида адәм тутқун қиливатқан хитай дөләт бихәтәрлик хадимлириниң хизмәт истилидур.

Вәқә өткән һәптә радиомиз тәрипидин ингилизчә хәвәр қилинип, хәлқара җамаәткә йәткүзүлди. Хәлқара җамаәт вәқәдә җазаланғанларниң нөвәттики әһвалини диққәт билән көзәтмәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.