Gérmaniyide xitay saxta pul sodigerliri sotqa tartildi

Gérmaniye edliye organliri qolgha chüshürgen töt neper saxta pul yasighan xitay sodigerliri 28 - noyabirdin bashlap frankfurt sot mehkimisi teripidin sotlinishqa bashlidi.
Ixtiyari muxbirimiz ekrem
2011-11-28
Élxet
Pikir
Share
Print

Gérmaniye edliye organlirining ashkarilishiche, yawrupa birlikining pulliridin bir yawro we ikki yawroluq tengge pullarning saxtisini xitayda yasap, gérmaniyige oghriliqche élip kirgen töt neper xitay sodigerliri ilgiri - kéyin 232 qétim jinayet sadir qilghan bolup, jinayet gumandarlirining yéshi 29 - 46 yashlar arisida iken. Bu saxta pul yötkesh ishlirigha hemkarlashqan xanza (hansa) awi'atsiye shirkitining üch neper xadimimu bu dilogha chétilip sotqa tartildi.

Gérmaniye dolqunliri radi'osining bu toghrisida 28 - noyabir élan qilghan xewiride körsitilishiche, xitay saxta pul sodigerliri yasighan tengge pullar eslide yawro bésish zawutliri teripidin yawrupa elliride ishlen'gen, emma süpitide mesile körülüp etkes qilin'ghan pullar bolup, xitay sodigerliri bu pullarni döletmu - dölet qatrap yürüp toplap, xitaygha apirip qaytidin qorashturup yasap, gérmaniye qatarliq döletlerge oghriliqche élip kirgen hemde qeghez pullargha aylandurmaqchi bolghan. Frankfurt teptish mehkimisi bashliqining bildürüshiche, bu pul hayankeshlirining bir uchi xitaygha baghlan'ghan. Ular xanza shérkiti xizmetchilirini sétiwélip, ayrodromda alahide ishikler arqiliq saxta tengge pullarni ongushluq halda gérmaniyige yötkep kirgen. Bu yilning béshida bir neper ayropilan xizmetchisining somkisi axturulup, uning ichidin 9 ming yawro tengge pul tépilghandin kéyin, bu saxta pul dilosi pash bolushqa bashlighan.

Teptish mehkimisi salahiyiti téxi ashkarilanmighan üch neper xanza awi'atsiye shirkiti xadimliri bilen töt neper xitay sodigerlirining pul etkeschiliki guruhini shekillendüridighanliqini békitken. Ayropilan xizmetchilirining xizmet qolayliqidin paydilinip, xitayning saxta pullirini tekshürüshtin ötküzmeyla ayropilan'gha élip chiqip, gérmaniyige yötkishige shérik bolghanliqini ilgiri sürgen. Xanza awi'atsiye shirkiti sözchisi gérmaniyide ghulghula peyda qilghan bu mesile toghrisida metbu'atqa bayanat bérip "Gérmaniye edliye tarmaqlirining tekshürüwatqini xanza awi'atsiye shérkiti emes, belki üch neper xizmetchi xadimdinla ibaret" dep körsetken. Gérmaniyidiki herqandaq saxta tawar, etkeschilik, köchürmichilik hadisilirining xitaylargha alaqiliq bolup chiqishi tüpeyli gérmaniye puqralirining xitaylargha bolghan köz qarishining barghanséri nacharlishiwatqanliqini tilgha alghan Uyghur ziyaliysi rahile xanim bu heqtiki pikrini otturigha qoyup ötti.

Fransiye axbarat agéntliqi bu yilning béshida élan qilghan uchurida, 2007 - yilidin 2010 - yilighiche xitaydin gérmaniyige yötkep kélin'gen saxta tengge pulning 29 tonna etrapida bolup, 6 milyon yawru qimmitide ikenlikini ashkarilighan. Biraq, gérmaniye axbarat agéntliqining sot mehkimisidin igiligen eng yéngi xewiride omumi pul sommisining 500 ming yawro ikenliki tilgha élin'ghan. Bu saxta pul dilosi pash bolghandin kéyin, yawrupa birliki bankisi pütün yawrupa birlikige eza döletlerge derhal jiddiy agahlandurush élan qilip, saxta tengge pullardin pexes bolushni uqturghan. Yawrupa birliki bankisining statistikisigha qarighanda, gérmaniyining 2010 - yili pash qilghan saxta pul dilosi aldinqi yiligha qarighanda 14% ashqan.

Toluq bet