Сахта йемәк ишләштә һазирқи заман пән - техникилиридин пайдилиниш әң хәтәрлик

Хитайниң хәлқ қурултейи бүгүндин башлап йемәк бихәтәрлики тоғрисида оттуриға қоюлған тәклип қанун лайиһилирини көздин кәчүрүватиду. Хитайниң һазир йемәклик бихәтәрлики тоғрисида қанун түзүш үчүн қәдәм басқанлиқи бирләшкән дөләтләр тәшкилатниң һәр қайси дөләтләргә аммивий бихәтәрлик һәққидә оттуриға қойған җиддий тәклипигә асасән болуватиду.
Мухбиримиз вәли
2008-10-23
Share
wandashan-305.jpg Wandashan Маркилиқ зәһәрләнгән себирийә адәм гийаси. Сүрәт, Wandashan дора ширкитиниң тор бетидин елинди.
Photo: Wandashan Pharmaceutical

'Роейтерс агентлиқи'ниң баян қилишичә, хитайда һазир музакирә қилиниватқан йемәклик бихәтәрлики қанунида, дөләтниң йемәк қануниға хилаплиқ қилғучиларға иқтисадий җәһәттә җәриманә қоюшниң өлчәмлири ениқ бәлгилинидикән.

Хитайниң хәлқ қурултейи бүгүн йемәк бихәтәрлики тоғрисида чиқиридиған қанун лайиһилирини музакирә қиливатқанда, америкида чиқидиған 'көзитиш журнили'да 'хитайда иҗад қилинған сахта мал ишләш техникиси' мавзулуқ бир обзор елан қилинди. Бу обзорниң мәзмунлири хитайда йемәк бихәтәрликиниң интайин зөрүр икәнликини чүшиниш вә хитайда һазир ямрап кәткән зәһәрлик йемәкләр үчүн әһмийәтлик болуши мумкин.

Сахта мал ишләш хитайда қәдимдин тартип бар

'Хитайда сахта мал ишләш қәдимдин тартип бар, ‏ - ‏ дәп баянини башлайду 'хитайларниң сахта мал ишләш техникиси' дегән обзорниң аптори җаң миң әпәнди. Аптор бу обзорида,‏‏ - сахта мал ишләйдиған сахтипәзләр икки хил. Униң бирхили пән ‏ - техникидин савади йоқлар. Улар сахта мал ишләштә пән - техникидин пайдилиналмайду. Әмма уларниң ишләпчиққан сахта мәһсулатлири наһайити көп. Мәсилән: ашлиққа қум арилаштуруп миқдарини ашуруп сетиш. Бәзиләр һәтта чайғиму қум яки башқа әхләтләрни арилаштуриду. Сахта мал ишләйдиған сахтипәзләрниң йәнә бир хили юқири пән - техникидин хәвири бар бәднийәтләр. Улар ишлигән сахта малға арилаштурулған нәрсиниң миқдари аз, лекин бәкла ғәлитә. Улар пүтүнләй пән - техникидин пайдиланған. Әмма улар өзлириниң мәнпәәт һәвисидин һәргиз ваз кәчмәйду. Ишлигән мәһсулатқа сахта нәрсини арилаштурмиса көңли тиним тапмайду.

Хитайда йәнә бир мунчә сахтипәз асарә әтиқишунаслар бар, улар өзиниң қолидики рас асарә әтиқини әмәс, бәлки униң сахтисини ясап сатиду. Тәйвәндики гугуң сарийида сақлиниватқан шаң сулалиси дәвридики мис қачиларниң бир мунчиси шундақ сахта асарә - әтиқә. Бундақ сахта асарә - әтиқини әйни вақитта һәтта алий мутәхәссисләрму пәрқ етәлмигән. Бәзи сахтипәзләр өзи сақлаватқан қәдимқи рәсим - безәкләрни парчилап, уни тәқлит қилип сизған рәсим яки безәкләрниң арисиға чаплап, уни әслигә кәлтүрүп сизилған қәдимқи рәсим яки безәкләр дәп атап баһасини өрлитип сатиду'дәп баян қилиду.

Хитайниң шинҗаң музийидиму ли фамилилик бир археолог пәқәт хитайларни әзәлдин уйғурларниң устази иди дәп тәшвиқ қилиш үчүнла, опал йезисидин тепилған бир парчә чағитайчә қолязминиң кәйнигә таң сулалиси дәвридики нәзмиләрни көчүрүп йезип сахта асарә - әтиқә ясиған, буни һәтта археологларниң пишиваси гоморому пәрқ етәлмигән.

Бәзи бәднийәтләр ақ һараққа 'дидиви' қошса тәми мавтәй һариқиға охшайдиғанлиқини, уни ичкән адәм дәрһал өлмәйдиғанлиқини билгән

Мәзкур обзорда баян қилинишичә, қәдимқи дәврдә хитайда сахта мал ишлигүчиләр пәқәт ишлигән мални техиму көркәм қилишни вә бу арқилиқ техиму көп пул тепишни ойлатти. Әмма заманимиздики сахтипәзләр ундақ әмәс, улар бәднийәтликтә чекидин ашти. Һәтта һазирқи заман пән - техникилирини қоллинип сахта мал ишләйдиған болди. Йемәкләрдики ақсил тәркивини ашуруш үчүн меламин қошуш алий мәктәпләрниң хемийә - санаити дәрисликлиридә йоқ, әмма бундақ қилишни бәднийәтләр органик хемийә буйичә өзи халиғанчә һәр хил синақ елип бериш арқилиқ тапқан.

Бәзи бәднийәтләр адәттики ақ һараққа азрақ 'дидиви' қошқанда, униң тәми мавтәй һариқиға охшап қалидиғанлиқини, буни ичкән адәм дәрһал өлмәйдиғанлиқини биливалған. Җин шеңтән дегән киши қерип өлүм гирдабиға йәткәндә 'тузланған пурчаққа қарамучни қошуп йесә, униң тәми яңақ меғизиға охшайду' дегән техникисини балилириға ейтип берип андин җан үзгән. Бундақ синақ нәтиҗилири яки сирлар нәшрият һоқуқи оғриланған сахта китабларда учрайду.

Бәзи сахтипәзләр деңиз һайванлирини тез бодаш үчүн туғут чәкләш дорисини қолланған

Мәзкур обзорда баян қилинишичә, сахта йемәк ишләйдиған бәднийәтләр һәтта деңиз һайванлирини тез бодаш үчүн туғут чәкләш дорисини, бәзидә сихуәнсу таблитлирини қолланған. Өдәкләргә 'судәнхоң' дегән хитайчә тибабәт дориси йегүзүп, тухуминиң сериқини қизартип 'алаһидә мәһсулат' дәп сатқан. Бундақ өдәкләрни болса 'деңиз раки йегүзүп бодалған өдәк' дәп сатқан. Хитайда бәднийәтләр пәқәт өзлири көп мәнпәәт қазиниш үчүнла, униң инсанийәткә зиянлиқ яки зиянлиқ әмәсликини ойлимайду. Бундақ сахтипәзләр ахир 'җуңгода ишләнди' дейилгән 'сәнлу' маркилиқ йемәкләр пүтүн дуняниң нәпритини қозғиғанда андин мат болди. Әгәр уларниң нийити тоғра болса, мушундақ тиним тапмай синақ қилиш җәрянида хитайдин нәччилигән едсон чиқмасмиди?

Сахтипәзлик юқири қатламлардиму бир хил сиясий мәдәнийәткә айлинип болған

Мәзкур обзорда баян қилинишичә, очуқ - йоруқ болуп инсанийәткә пайдилиқ нәрсә иҗад қилишни ойлимаслиқ хитайларда бир хил адәткә айлинип қалған. Бундақ сахтипәзлик билән һөкүмәтниң кари йоқ. Хәлқ зәһәр сатқан сахтипәзни сақчиға тутуп бәрсә, сақчи уни арқа ишиктин қоюп бериду. Чүнки сахтипәзлик юқири қатламлардиму бир хил сиясий мәдәнийәткә айлинип болған. Һазир хитайда мәзмуни хәлққә яқидиған китаб чиқсила, униң нәшрият һоқуқини оғрилап униң сахтисини нәшр қилип, әслидики китабниң базирини касат қилиду.

Апторниң қаришичә, әгәр хитайда адил қанун болса, һөкүмәт қанун буйичә иш қилса, хитай җәмийитидики әнәнивий сахтипәзлик хәтәрлик әмәс, әң хәтәрлики һазирқи заман пән - техникисидин пайдилинип сахта мал ишләш.



Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт