Saxta yémek ishleshte hazirqi zaman pen - téxnikiliridin paydilinish eng xeterlik

Xitayning xelq qurultéyi bügündin bashlap yémek bixeterliki toghrisida otturigha qoyulghan teklip qanun layihilirini közdin kechürüwatidu. Xitayning hazir yémeklik bixeterliki toghrisida qanun tüzüsh üchün qedem basqanliqi birleshken döletler teshkilatning her qaysi döletlerge ammiwiy bixeterlik heqqide otturigha qoyghan jiddiy teklipige asasen boluwatidu.
Muxbirimiz weli
2008.10.23
wandashan-305.jpg Wandashan Markiliq zeherlengen sébiriye adem giyasi. Süret, Wandashan dora shirkitining tor bétidin élindi.
Photo: Wandashan Pharmaceutical

'Roéytérs agéntliqi'ning bayan qilishiche, xitayda hazir muzakire qiliniwatqan yémeklik bixeterliki qanunida, döletning yémek qanunigha xilapliq qilghuchilargha iqtisadiy jehette jerimane qoyushning ölchemliri éniq belgilinidiken.

Xitayning xelq qurultéyi bügün yémek bixeterliki toghrisida chiqiridighan qanun layihilirini muzakire qiliwatqanda, amérikida chiqidighan 'közitish zhurnili'da 'xitayda ijad qilin'ghan saxta mal ishlesh téxnikisi' mawzuluq bir obzor élan qilindi. Bu obzorning mezmunliri xitayda yémek bixeterlikining intayin zörür ikenlikini chüshinish we xitayda hazir yamrap ketken zeherlik yémekler üchün ehmiyetlik bolushi mumkin.

Saxta mal ishlesh xitayda qedimdin tartip bar

'Xitayda saxta mal ishlesh qedimdin tartip bar, ‏ - ‏ dep bayanini bashlaydu 'xitaylarning saxta mal ishlesh téxnikisi' dégen obzorning aptori jang ming ependi. Aptor bu obzorida,‏‏ - saxta mal ishleydighan saxtipezler ikki xil. Uning birxili pen ‏ - téxnikidin sawadi yoqlar. Ular saxta mal ishleshte pen - téxnikidin paydilinalmaydu. Emma ularning ishlepchiqqan saxta mehsulatliri nahayiti köp. Mesilen: ashliqqa qum arilashturup miqdarini ashurup sétish. Beziler hetta chayghimu qum yaki bashqa exletlerni arilashturidu. Saxta mal ishleydighan saxtipezlerning yene bir xili yuqiri pen - téxnikidin xewiri bar bedniyetler. Ular ishligen saxta malgha arilashturulghan nersining miqdari az, lékin bekla ghelite. Ular pütünley pen - téxnikidin paydilan'ghan. Emma ular özlirining menpe'et hewisidin hergiz waz kechmeydu. Ishligen mehsulatqa saxta nersini arilashturmisa köngli tinim tapmaydu.

Xitayda yene bir munche saxtipez asare etiqishunaslar bar, ular özining qolidiki ras asare etiqini emes, belki uning saxtisini yasap satidu. Teywendiki gugung sariyida saqliniwatqan shang sulalisi dewridiki mis qachilarning bir munchisi shundaq saxta asare - etiqe. Bundaq saxta asare - etiqini eyni waqitta hetta aliy mutexessislermu perq ételmigen. Bezi saxtipezler özi saqlawatqan qedimqi resim - bézeklerni parchilap, uni teqlit qilip sizghan resim yaki bézeklerning arisigha chaplap, uni eslige keltürüp sizilghan qedimqi resim yaki bézekler dep atap bahasini örlitip satidu'dep bayan qilidu.

Xitayning shinjang muziyidimu li famililik bir arxé'olog peqet xitaylarni ezeldin Uyghurlarning ustazi idi dep teshwiq qilish üchünla, opal yézisidin tépilghan bir parche chaghitayche qolyazmining keynige tang sulalisi dewridiki nezmilerni köchürüp yézip saxta asare - etiqe yasighan, buni hetta arxé'ologlarning pishiwasi gomoromu perq ételmigen.

Bezi bedniyetler aq haraqqa 'didiwi' qoshsa temi mawtey hariqigha oxshaydighanliqini, uni ichken adem derhal ölmeydighanliqini bilgen

Mezkur obzorda bayan qilinishiche, qedimqi dewrde xitayda saxta mal ishligüchiler peqet ishligen malni téximu körkem qilishni we bu arqiliq téximu köp pul tépishni oylatti. Emma zamanimizdiki saxtipezler undaq emes, ular bedniyetlikte chékidin ashti. Hetta hazirqi zaman pen - téxnikilirini qollinip saxta mal ishleydighan boldi. Yémeklerdiki aqsil terkiwini ashurush üchün mélamin qoshush aliy mekteplerning xémiye - sana'iti derislikliride yoq, emma bundaq qilishni bedniyetler organik xémiye buyiche özi xalighanche her xil sinaq élip bérish arqiliq tapqan.

Bezi bedniyetler adettiki aq haraqqa azraq 'didiwi' qoshqanda, uning temi mawtey hariqigha oxshap qalidighanliqini, buni ichken adem derhal ölmeydighanliqini biliwalghan. Jin shéngten dégen kishi qérip ölüm girdabigha yetkende 'tuzlan'ghan purchaqqa qaramuchni qoshup yése, uning temi yangaq méghizigha oxshaydu' dégen téxnikisini balilirigha éytip bérip andin jan üzgen. Bundaq sinaq netijiliri yaki sirlar neshriyat hoquqi oghrilan'ghan saxta kitablarda uchraydu.

Bezi saxtipezler déngiz haywanlirini téz bodash üchün tughut cheklesh dorisini qollan'ghan

Mezkur obzorda bayan qilinishiche, saxta yémek ishleydighan bedniyetler hetta déngiz haywanlirini téz bodash üchün tughut cheklesh dorisini, bezide sixu'ensu tablitlirini qollan'ghan. Ödeklerge 'sudenxong' dégen xitayche tibabet dorisi yégüzüp, tuxumining sériqini qizartip 'alahide mehsulat' dep satqan. Bundaq ödeklerni bolsa 'déngiz raki yégüzüp bodalghan ödek' dep satqan. Xitayda bedniyetler peqet özliri köp menpe'et qazinish üchünla, uning insaniyetke ziyanliq yaki ziyanliq emeslikini oylimaydu. Bundaq saxtipezler axir 'junggoda ishlendi' déyilgen 'senlu' markiliq yémekler pütün dunyaning nepritini qozghighanda andin mat boldi. Eger ularning niyiti toghra bolsa, mushundaq tinim tapmay sinaq qilish jeryanida xitaydin nechchiligen édson chiqmasmidi?

Saxtipezlik yuqiri qatlamlardimu bir xil siyasiy medeniyetke aylinip bolghan

Mezkur obzorda bayan qilinishiche, ochuq - yoruq bolup insaniyetke paydiliq nerse ijad qilishni oylimasliq xitaylarda bir xil adetke aylinip qalghan. Bundaq saxtipezlik bilen hökümetning kari yoq. Xelq zeher satqan saxtipezni saqchigha tutup berse, saqchi uni arqa ishiktin qoyup béridu. Chünki saxtipezlik yuqiri qatlamlardimu bir xil siyasiy medeniyetke aylinip bolghan. Hazir xitayda mezmuni xelqqe yaqidighan kitab chiqsila, uning neshriyat hoquqini oghrilap uning saxtisini neshr qilip, eslidiki kitabning bazirini kasat qilidu.

Aptorning qarishiche, eger xitayda adil qanun bolsa, hökümet qanun buyiche ish qilsa, xitay jem'iyitidiki en'eniwiy saxtipezlik xeterlik emes, eng xeterliki hazirqi zaman pen - téxnikisidin paydilinip saxta mal ishlesh.



Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.