Xitay sherqi déngizni yaponiye bilen ortaq échish pilanini tüzdi

Xitayning yardemchi tashqi ishlar ministiri wu dawéy, tünügün bayanat élan qilip, xitayning sherqi déngizni yaponiye bilen ortaq échish pilani heqqide melumat berdi. Wu dawéyning bildürüshiche, bu pilan her ikki terepning qobul qilishigha érishken.
Muxbirimiz shöhret hoshur xewiri
2008-06-19
Share

 Wudawéyning ashkarilishiche, mezkur pilan sherqi déngizni ténchliq, hemkarliq we dostluq déngizigha aylandurush؛ ikki terep mesile üstidiki qanuniy meydanini saqlap qalghan asasta, sherqi déngizning bir qismini ortaq échish we yaponiye shirketliri "jungxu'a xelq jumhuriyitining alaqidar qanunlirigha asasen " chünshyaw néfitlikini échishqa qatnishish qatarliq üch chong prinsipni asas qilghan.

" Mezkur pilan xitay - yaponiye munasiwitidiki bir burulush nuqtisi "

Xitay sherqi déngizdiki chünshyaw néfitlikini 2005 ‏ - yili bayqighan. Bu néfitlik xitayning déngiz tewelikide؛ emma u yaponiye qirghiqigha yéqin musapide. B d t ning alaqidar déngiz ishliri qanuni buyiche mezkur néfitlik yaponiye qirghiqidin 370 musape ariliqida bolghini üchün yaponiye mezkur néfitliktin paydilinish hoquqigha ige.

Xitayning sherqi déngizdiki chünshyaw néfitlikini ortaq échish pilani nöwette, bir qisim xitay puqralirining naraziliqini qozghimaqta. Narazi bolghuchilarning qarishiche, mezkur pilan, xitayning yaponiyige boyun égishi, sherqi déngizdiki igilik hoquqidin waz kéchishtur. Emma hökümet terep bu xil qarashni inkar qilidu.

Xitay tashqi ishlar bayanatchisi jyang yöning bügün etigende béyjingda bayan qilishiche, yapon shirketlirining xitay qanunigha asasen ortaq bolushi, xitayning sherqi déngizdiki igilik hoquqida tewrinish bolmighanliqini körsitidu. Yardemchi ministir wu dawéy bolsa, mezkur pilanni, yaponiye bilen munasiwetni buzmastin, weziyetni jiddiyleshtürmestin mesililerni qedem ‏ - basquchluq hel qilish dep chüshendüridu.

Wu dawéyning bildürüshiche, mezkur pilan xitay - yaponiye munasiwitidiki bir burulush nuqtisi shundaqla yene tarixiy bir özgirish. Wu dawéy bu sozliri arqiliq xitayning yaponiye bilen sherqi déngiz mesilisini hel qilish basquchigha kirgenlikidin isharet bergen. Wu dawéy yene, bu pilanni xu jintawning ötken aydiki yaponiye ziyaritining utuqi dep bildürgen. Emma xitay öktichiliri bu pilanni utuq dep emes, meghlubiyet dep qarimaqta. Bularning qarishiche, chünshyaw néfitliki mesilisi, xitay ‏ - yaponiye otturisidiki yéngi, ré'al we menpe'etlik bir mesile. Eger xitay bu ré'al mesilini toghra bir terep qilalmisa, sherqi déngizdiki dyawyu ariligha oxshash tarixiy mesilini hel qilalishi mumkin emes.

Dyawyu arili mesilisini ding shyawping kelgüsi ewlatlargha amanet qaldurghan

Tünügün bir türküm xitay milletchiliri, béyjingdiki yaponiye konsulxanisi aldida namayish qilghan. Sani 30gha yéqin bolghan bu namayishchilar, 100din artuq saqchining nazariti astida naraziliq bildürgen. Peqet bir bayraq, bir lozunka bilen namayish qilghan bu kishiler, " yaponiye dyawyü arilidin chiqip ketsun " dep shu'ar towlighan.

Dyawyü arili mesilisi ikki terep arisida esirlerdin béri hel bolmay kelgen mesilidur. 1972 ‏ - Yili xitay ‏ - yaponiye arisida diplomatik munasiwet ornitilghanda, sabiq bash ministir ju énley, dyawyu arili mesilisini pursiti piship yétilgende hel qilishni otturigha qoyghan. 1978 ‏ - Yili ikki terep arisida dostluq - hemkarliq munasiwiti ornitilghanda, ding shyawping mesilini kelgüsi ewlatlargha amanet qaldurghanliqini bildürgen.

" Xu jintawning chünshyaw néfitlikige yaponiyini shérik qilish pilani teslimchilik "

Xu jintawning chünshyaw néfitlikige yaponiyini shérik qilish pilanini xitay yazghuchisi xu ping teslimchilik dep eyiblimekte.

Terepsiz közetküchilerning qarishiche, ikki terepning chünshyaw néfitlikidin ortaq paydilinish pilanida pikir birlikige kélishi rastinla ikki terep munasiwitidiki tarixiy bir özgirish ؛ emma bu özgirishning rayonning ténichliqigha nisbeten ijabiy yaki selbiy özgirish ikenliki éniqsiz bir mesile.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet