Jungnenxey xelq gézitide tenqid qobul qilish sehipisi achqan

Mezkur tenqid qobul qilish sehipisige bir hepte ichide  10 mingdin artuq inkas chüshken. Inkaslarning köpinchisi, axbarat erkinliki, parixorluq we öy bahasining örlep kétishi  qatarliq mesililerge merkezleshken.  Inkaslardin biride mundaq déyilgen: "eger jungnenxeyning xelq turmushigha köngül bölimiz dégini rast bolsa, aldi bilen parixorlar  yoqitilsun, asasi qatlamlardiki zomigerler ujuqturulsun."

Yene bir inkasta chiriklik, guruhwazliq we qanunsizliq nöwettiki xitay jem'iyitining asasi mesilisi dep körsitilgen. Yene bir inkasta xu jintawning inaq jem'iyet berpa qilish sho'ari mesxire qilin'ghan.

Melum bolushiche,  hazirghiche bir qisim sezgür inkaslar öchürüwétilgen. Wén jyabaw ötken yilqi washin'gton ziyaritide, xelqning hökümetni nazaret qilishi kérekliki, edliye organlirining musteqil bolushi kéreklikini otturigha qoyghan. Wén jyabaw bu sözliri seweblik" yalghan wede bériwatidu artisliq qiliwatidu," dep tenqidlen'gen.
 
Mezkur inkaslarning ichide,   Uyghurlar teripidin yézilghan inkaslarning bar-yoqluqi hazirche melum emes.

Emma, Uyghur élidin  yéngi chiqqan bir Uyghur ziyaliysi  mezkur sehipe heqqidiki qarashlirini mundaq bayan qilidu: " oxshash bir tenqid qobul qilish sehipisi bu yil  7 ‏- ayda shinjang hökümet tor bétidimu échilghan. Emma uningdiki inkaslar ammigha ashkarilanmighan. Peqet hökümetning munasiwetlik organlirigha yetküzülgen. Shunga bu sehipige inkas chüshken yaki chüshmigenliki, chüshken bolsa qandaq bir terep qilghanliqi  sir halette turmaqta."

Nöwette amérikida oquwatqan bir Uyghur oqughuchi, 5 ‏- iyul weqesidin kéyinki weziyette, Uyghurlarning mesile otturigha qoyulushining mumkinsizlikini, buning xelq'ara  jama'et pikrini qaymuqturush üchünla qiliniwatqan bir shekilwazliq ikenlikini, shunga özining bu xil tedbirlerdin héchqandaq ümid kütmeydighanliqini otturigha qoydi.

Uning bildürüshiche, Uyghurlar könglidiki gépini déyelishi üchün, yalghuz metbu'at sorunila emes, belki hemmidin awwal Uyghur xelqining béshigha tenglinip turuwatqan qorallar yighishturulushi, erkin we bixeter muhit shekillinishi kérek iken.     

Yuqiridiki awaz ulinishidin, bu heqtiki melumatimizning tepsilatini anglaysiler.