Хитайниң 'америкиға җаза қоллинимиз' дәп җар салғанлиқи чоң қуруқлуқта хәлққә қарита терә тарақлатқанлиқ

Хитай бүгүн америкиниң тәйвәнгә 64 милярд америка доллирилиқ заманивий һәрбий қорал сатқанлиқиға қаттиқ ғәзәплирини ипадилиди. Бу, хитайниң терә тарақлатқанлиқиму яки хитайниң америкини җазалиғудәк иқтидари барму?
Мухбиримиз вәли
2010-02-01
Елхәт
Пикир
Share
Принт
Сүрәт, хитай мәтбуатлиридики, америкиниң тәйвәнгә 64 милйард америка доллирилиқ заманивий һәрбий қорал сатқанлиқиға қарида, хитайниң қаттиқ ғәзәплирини ипадилигән мақалилардин бири.
Сүрәт, хитай мәтбуатлиридики, америкиниң тәйвәнгә 64 милйард америка доллирилиқ заманивий һәрбий қорал сатқанлиқиға қарида, хитайниң қаттиқ ғәзәплирини ипадилигән мақалилардин бири.
AFP Photo

Бу һәқтә тәйвәндә туруватқан мустәқил тәтқиқатчи лин бавхуа вә хоңкоңда чиқидиған 'шәпә' журнилиниң баш муһәррири җаң вейго мулаһизә елан қилди.

Б б с ниң баян қилишичә, хитай бүгүн америкиниң тәйвәнниң өзини қоғдиши үчүн 64 милярд америка доллирилиқ вәтәнпәрвәр 3 бәлгилик башқурулидиған бомбиға қарши қалқан сестимиси, қаралачин бәлгилик тик учар, оспрай дәриҗилик мина тазилаш парахоти қатарлиқ заманивий һәрбий қоралларни сетип бәргәнликигә инкас қайтуруп, буниңға мунасивәтлик америка ширкәтлирини җазалаймиз, дәп тәһдит салған.  

Бирләшмә агентлиқиниң шаңхәйдин хәвәр қилишичә, шаңхәй фудән университетиниң америка тәтқиқатчиси ву шинбав 'пүтүнләй чәтәл техникисиға тайинип җан беқиватқан бейҗиң һөкүмити америкини җазалиғудәк қабилийәткә игә әмәс' дәп баян қилған.

Франсийә агентлиқиниң баян қилишичә, америка дөләт мудапиә миниситири ярдәмчиси валлас грегсон бүгүн токйода қилған сөзидә 'америкиниң тәйвәнниң өзини қоғдишиға ярдәмлишиш мәҗбурийити бар. Бу, америка - хитай мунасивитидики бир мурәккәп мәсилә, биз бу мәҗбурийитимизни давамлаштуруверимиз' дәп җакарлиған.

Ройтрс агентлиқиниң баян қилишичә, ақсарайниң баянатчииси робрт гиббс бүгүн кәчқурун, мухбирларниң хитайниң 'тәйвәнгә қорал сатқан америка ширкәтлиригә җаз қоллинимиз' дәп тәһдит салғанлиқи һәққидә сориған суаллириға җаваб бәргәндә 'мән шәхсән өзәм, хитайни бундақ қилмайду, дейәлмәймән' дегән.

Америкиниң тәйвәнгә қорал сатқанлиқидин хитайни хәвәрләндүргәнлики тоғра әмәс

Һазир тәйвәндә туруватқан мустәқил тәтқиқатчи лин бавхуаниң қаришичә, америкиниң бу қетим тәйвәнгә қорал сатқанлиқидин хитайни хәвәрләндүргәнлики тоғра әмәс. Америкиниң әслидила тәйвәнни қоғдайдиған қануни бар. Бу қанун буйичә иш қиливериш керәк. Хитай буниңға чат керивалалмайтти.

Әмма америка хитайниң 'шәйтан оюни' ни, қуруқ терә тарақлитип җан бақидиған миҗәзини техичә билип йәтмигән болса керәк. Обама хитайға бәк көп йол қоюп кәтти, шуңлашқа хитайниң хорики барғансери өсүп қалди.

Хитайниң тәйвәнгә қарита уруш қозғиши асанға чүшмәйду

Лин бавхуаниң қаришичә, тәйвән хәлқи һазир америкиниң тәйвәнниң өзини қоғдишиға ярдәм бериш қанунини бәк чоң билиду, әмма пәқәт қорал сетип бериш биләнла чәклинип, зорүр тепилғанда тәйвәнни қоғдашқа қатнашмай қелишидин әнсирәйду. Хитай бүгүн 'америкини җазалаймиз' дәп җар салди.

Тәйвән хәлқи хитайдин қорқуп кәтмәслики керәк. Хитайниң тәйвәнгә қарита уруш қозғиши асанға чүшмәйду. Чүнки хитайни арам тапқузмайватқан йәнә шәрқий түркистан мәсилиси бар, тибәт мәмсилиси бар. Тәйвән алди билән өзиниң күчини тез тәрәққи қилдуруши керәк.

Америкиниң тәйвәнгә қорал сатқанлиқи тәйвән боғузидики күч тәңлимисини тәңшәш, дуня тинчлиқини қоғдаш үчүн қоллинилған муһим тәдбир

Хоңкоңда чиқидиған 'шәпә' журнилиниң баш муһәррири җаң вейго әпәндиниң қаришичә, америкиниң бу қетим тәйвәнгә қорал сатқанлиқи, тәйвән боғузидики күч тәңлимисини тәңшәш үчүн вә дуня тинчлиқини қоғдаш үчүн қоллинилған муһим тәдбир. Әмма хитай бүгүн америкиниң бу тәдбиригә қарши чиқти, һәтта 'америкини җазлаймиз' дәп җар салди.

Хитай узундин буян ағзида 'җуңго тәрәққи қиливатқан дөләт', 'җуңгониң зомигәр болуш нийити йоқ' , 'җуңголуқ җуңголуқ билән уруш қилмайду' дәватсиму, әмәлийәттә тәйвәнни башқурулидиған бомбилири билән қариға елип келиватқан иди, мана әмди хитайниң әпти-бәшириси ашкара болди, хитай дегән гәпләрниң һәммиси ялғанчилиқ икәнлики ашкариланди.

Хитай америка ширкәтлирини җазалиялмайду

Җаң вейго әпәндиниң қаришичә, хитай америка ширкәтлирини җазалиялмайду. Чүнки хитай 'америкиниң тәйвәнгә қорал сатқан ширкәтлирини җазалаймиз' дәватқан ширкәтләрниң һечқайсиниң хитайда тиҗарити йоқ.

Бундақ ширкәткәр ниң һәммиси, хитай узундин буян мәхпийәтликини оғрилаш үчүн җасус әвәтиватқан, қорал сетивелиш үчүн индәккә кәлтүрмәкчи болған, әмма еришәлмигән шиеркәтләр. Хитайниң 'америкиға җаза қоллинимиз' , 'тәйвәнгә қорал сатқанлиқ бөлгүнчиликкә илһам бәргәнлик' дәп җар салғанлиқи, әмәлийәттә дөләт ичидә хәлққә қарита терә тарақлатқанлиқ.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт