Хитай оттура асиядики уйғурларғиму һуҗум қилишни ойлаватамду?

Хитай билән русийиниң бирләшмә һәрби мәшқи давамлишиватиду. Бу һәрбий мәшқни көриватқан хитай армийисиниң баш штап башлиқи чен биңде бүгүн 'шәрқий түркстан террорчилири'ға зәрбә бериш үчүн оттура асияға әскәр чиқиришни ойлишидиғанлиқини ипадилигән.
Мухбиримиз вәли
2009-07-24
Share
Xitay-qoralliq-saqchi-urumqi-kocha-305 Бүгүн, 13 - ийул, үрүмчидә 2 уйғурни етип өлтүргән вә бирини йариландурған нәқ мәйданни сақлап турған 2 хитай сақчиси.
AFP Photo

Хитайниң шинхуа агентлиқи бүгүн үрүмчидики тор гезитлирида оттура асия дөләтлири бурун шәрқий түркстан мустәқиллиқ һәрикити наһайити әвҗ алған җайлар икәнликини гәвдиләндүрүп мақалилар елан қилди. 'Бошүн тор гезити' болса үрүмчи вәқәси арқилиқ ашкариланған мили мәсилә вә диний мәсилиләрниң йилтизи һәққидики мулаһизиләрни, шундақла ваң лечуәнниң хитайдики әң чоң хиянәтчиләрниң бири икәнлккигә даир пакитларни елан қилди.

'Террорчилиққа зәрбә бериш мәшқи'

Хитай билән русийә 7‏ - айниң 20 ‏ - күнидин башлап, русийиниң йерақ шәрқтики хабаровиски шәһиридә вә хитайниң җилин өлкисиниң җавнән районидики һәрбий тәлим базисида бирләшмә һәрбий мәшқ өткүзүшкә башлиған иди.

Хитай бу һәрбий мәшиқни 'террорчилиққа зәрбә бериш мәшқи' дәп җакарлиди. Б б с ниң баян қилишичә, бу һәрбий мәшқ 27 ‏ - числағичә давам қилидикән.

Хитай армийисиниң баш штап башлиқи оттура асияға әскәр чиқиришни ойлишидикән

Хоңкоңда чиқидиған 'миңпав' гезитиниң бүгүн баян қилишичә, бу һәрбий мәшқни көрүватқан хитай армийисиниң баш штап башлиқи чен биңде 'шәрқий түркстан террорчилири'ға зәрбә бериш үчүн, шаңхәй һәмкарлиқ тәшкилати нами билән оттура асияға әскәр чиқирип, шәрқий түркстан мустәқилчилиригә зәрбә беришни ойлишидиғанлиқини ипадилигән.

Шинхуа агентлиқи дуняниң һәр қайси җайлиридики уйғур тәшкилатлири һәққидә иғва тоқиди

Шинхуа агентлиқи бүгүн үрүмчидики тор гезитлирида елан қилған мақалилиридә, дуняниң һәр қайси җайлиридики уйғур тәшкилатлирини яманлап көрсәтти вә 'шәрқий түркстанчилар һазир дуняниң һәр қайси җайлирида, анчә - мунчә намайиш қилип қоюп туруватиду, улар буниңдин кейин, җуңгониң чәтәлләрдики әлчиханилириға һуҗум қилиши вә пүтүн дуняда уруш, чеқиш, булаш, юшурун өлтүрүш, зәһәр берип өлтүрүш һәрикитини йолға қоюши мумкин' дәп иғва тоқиған.

Тиғ учини бивастә түркийә, қазақстан, қирғизстан, үзбекстанлардики уйғур тәшкилатлириға қаратти

Хитайниң шинхуа агентлиқи бүгүн елан қилған хәвәрлиридә, оттура асия дөләтлирини, бурун шәрқий түркстан мустәқиллиқ һәрикити наһайити әвҗ алған җайлар иди, дәп тәсвирлигән. Тиғ учини бивастә түркийә, қазақстан, қирғизстан, үзбекстан қатарлиқ дөләтләрдики уйғур тәшкилатлириға қаратқан.

Бу мақалидә йәнә 'түркийидики шәрқий түркстанчилар 997‏1 - йили 3‏ - айдин башлап, җуңгониң түркийидә турушлуқ әлчиханилириға һуҗум қилишқа башлиған иди. Дәсләп җуңгониң байриқини көйдүрди, кейин йәнә қол бомбиси қоллинип һуҗум қилди;' 'қазақистанда шәрқий түркистанчилар вәзипә өтәватқан икки нәпәр қазақистан сақчисини өлтүргән вә қазақстан депломатлирини гөрүгә еливалидиғанлиқини җакарлиди;' 'қирғизстандиму бешкәктики җуңго базириға от қойди, шинҗаң вәкилләр өмикигә қарита пилимут атти; қирғизстан уйғур яшлири бирләшмиси дегән тәшкилатниң рәиси неғмәт босақуфни өлтүрди' дәп тәсвирләр бар.

Хитай һөкүмити шәрқи түркстанчилар билән узун муддәткичә уруш қилидикән

Шинхуа агентлиқи бүгүнки хәвиридә йәнә, шәрқи түркистан тәшкилатлири бу қетим 7‏ - айниң 5 ‏ - күни үрүмчидә йәнә уруш, чеқиш, булаш җинайити өткүзди. Шәрқи түркистан тәшкилатлири, йәни террорчилар, диний радикаллар вә бөлгүнчиләрдин ибарәт 'үч хил күчләр' шиинҗаңниң бихәтәрликигә несбәтән бир балай - қаза болупла қалмай, у асия - тинч окян райони, һәтта пүтүн дуня үчүнму чоң апәт.

У дуня тинчлиқи, бихәтәрлики вә тәртипигә несбәтән бир чоң тәһдит болғанлиқи үчүн, җуңго һөкүмити бу шәрқи түркистанчилар билән ахирқи ғәлибини қолға кәлтүргичә узун муддәтлик уруш қилиду' дәп җакарлиди.

Ваң лечуән хитайдики әң чоң хиянәтчиләрниң бири

Үрүмчи вәқәси йүз бәргәндин буян, 'бошүн тор гезити' бу вәқәдә ашкариланған милли вә диний мәсилиләрниң йилтизи һәққидики мулаһизиләрнила әмәс, бәлки ваң лечуәнниң хитайдики әң чоң хиянәтчиләрниң бири икәнлккигә даир пакитларниму елан қилип келиватиду.

Бу тор гезитидә елан қилинған 'ләй чаңшиң билән ваң лечуәнниң мәхпи алақиси' дегән мақалидә баян қилинишичә, хитайниң гуаңхуй өй - земин ширкити 1998‏ - йили уйғур аптоном райониниң өктәбир терактор завути, машинисазлиқ завути қаатарлиқ 40 ширкиитини өзигә қошувалғандин кейин, униң пай чекиниң 30%и ваң лечуәнниң шәхсий мүлкигә айланған. Ваң лечуәнниң мушу бир хиянитила, бир нәччә он милйон юән пара елип хитайдики әң чоң хиянәтчи дәп өлүм җазаси берилгәнләрниңкидин бир нәччә һәссә көп. Ваң лечуән игиливалған байлиқ мәнбәәлири вә униңдин сәндуңдики туғқанлириға, тонушлириға бериш арқилиқ пара алған пулниң сани адәмни чөчүтиду.

Бу мақалидә баян қилинишичә йәнә, үрүмчидә 2000‏ - йили 9‏ - айниң 8‏ - күни, биңтуәнниң аптомобиллири һәрбий районниң вақти өткән партлатқуч дора вә бомбилирини қачилап кочиға чиқип, аптомобил вәқәси пәйда қилип 73 адәм өлгән, 300 адәм яриланған иди. Пүтүн мәмликәткә 'хиянәтчиләргә җәсәт сандуқи яситип қойдум' дәп җакарлап, фуҗйәндики 'юәнхуа делоси'ни тәкшүрүшкә башлиған хитай баш министири җу руңҗи, бу вәқәдин кейин, хиянәтчиләрни җазлашни ваң лечуәнгичә кеңәйтишкә җурәт қилалмиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт