Хитай хәлқ қурултийидики 70 нәпәр хәлқ вәкилиниң омумий мүлки америкидики барлиқ алий әмәлдарларниң мүлкидин көп

Дүшәнбә күни елан қилған санлиқ мәлуматларға қариғанда, хитай мәмликәтлик хәлқ қурултийидики 70 нәпәр хәлқ вәкилиниң омуми мүлки америкидики үч чоң тармақниң 660 нәпәр алий дәриҗилик әмәлдарниң омуми мүлкидинму көп.
Мухбиримиз вәли
2012.02.28
Share on WhatsApp
Share on WhatsApp
Yuan-amerika-Dollar-305.jpg Хитай банка хизмәтчиси пул санаватқан көрүнүш. 2010-Йили 20-март.
AFP

Хитайда һәр йили бир қетим ечилидиған икки чоң йиғин 3-айниң 5‏-күни башлиниш алдида турғанда, 1981-йили қурулғандин буян хәлқаралиқ иқтисадий учурларни ениқлап дуняға елан қилип туруватқан “блумберг” учур ширкити дүшәнбә күни, хитай мәмликәтлик хәлқ қурултийиниң 70 нәпәр хәлқ вәкили қандақ тез бейип, қанчилик мүлүккә игә болуп болғанлиқи һәққидики санлиқ мәлуматларни елан қилди.

“блумберг” учур ширкити елан қилған санлиқ мәлуматларға қариғанда, хитай мәмликәтлик хәлқ қурултийидики 70 нәпәр хәлқ вәкилиниң 2011-йилидики омумий мүлки 89милярд 800 йүз милйон америка доллири (юән һесабида 565 милярд 800 милйон юән).

Америкидики икки палатаниң әзалири, чоң сотчи, һөкүмәтниң президент, министирлиридин ибарәт бир-биригә беқинмайдиған үч чоң тармақтики алий дәриҗилик әмәлдарлар җәмий 660 нәпәр. Америкидики мушу әң алий дәриҗилик әмәлдарларниң омуми мүлки 7 милярд 500 милйон америка доллири. юқириқи санлиқ мәлуматтин мәлумки, хитайдики 70 нәпәр хәлқ вәкилиниң мүлкила америкидики һәммә әң алий дәриҗилик әмәлдарларниң омуми мүлкидин көп.

“блумберг” учур ширкитиниң қаришичә, хитайда хәлқ вәкиллириниң тез бейип кетиши деһқанларниң земин вә башқа байлиқлирини игиливелиш билән мунасивәтлик. Иқтисадий тәрәққияттики бундақ тәңпуңсизлиқ -хитайда күндин күнгә кәскинлишип, давалғуш пәйда қиливатқан һазирқи әң чоң иҗтимаий зиддийәт. Шундақла бу, йеқинда һоқуқ өткүзүвалидиған кишиләр дуч кәлгән чоң риқабәт.

Хитайда тез бейиған чоң байларниң әһвалини 1999-йилидин буян елан қилип келиватқан “хурун байлиқ тахтиси” ниң санлиқ мәлуматлириға қариғанда, 2011‏-йили хитайдики әң чоң байлар қатариға өткән 70 нәпәр хәлқ вәкилиниң омуми мүлки 2010‏-йилидикидин 11 милярд 500 милйон юән ашқан. Бу ширкәт хитайда һәр қетим бир чоң бай мәйданға чиқса, униң кәйнидә көзгә көрүнмәйдиған йәнә бир бай барлиқини сәзгән.

“блумберг” учур ширкитиниң қаришичә, 2010‏-йили хитайниң омум мәһсулат қиммити адәм бешиға 2 миң 425 америка доллиридин тоғра кәлгән, америкида болса адәм бешиға 37 миң 527 америка доллиридин тоғра кәлгән, демәк америка билән хитай оттурисида 15 һәссә пәрқ бар иди. Әмма хитайда иқтисадий тәрәққиятниң әмәлдарларға топлинип қелиши хитайдики бир алаһидилик, бу, “хитайчә сотсиялизм”, мана бу, хитайда иҗтимаий зиддийәт күндин күнгә кәскинлишип, чоң давалғуш пәйда қиливатқан түзүм.

“америка авази” бүгүн бу һәқтики мулаһизиләрни елан қилди. Сиясий көзәткүчи дәйчиңниң қаришичә, хитайниң һазирқи һакимийәт шәкли -һоқуқ билән капитал бирләштүрүлгән, байлиқларниң һәммисини һоқуқдарларниң қолиға топлинидиған һакимийәт. Америкидики җоһн хопкинс тәтқиқат орниниң хитай мәсилилири мутәхәссиси ликәйруниң қаришичә, хитайниң бу иқтисадий байлиқ үстидә болуватқан адаләтсизликкә көз юмуватқан қанун системиси, һазир пүтүн хәлқниң ғәзипини қозғимақта.

“америка авази” бүгүн “блумберг” учур ширкитиниң санлиқ мәлуматлири һәққидә хәвәр елан қилған сәһипигә, оқурмәнләр бир мунчә обзор әвәтти. Униң биридә мундақ дәп баян қилинған: хитайдики хәлқ қурултийиниң вәкиллирини хәлқ сайлап чиқмиған, уларға “вәкил” ликни партийә бәргән. Һазирқи әмәлдарларниң қолидики һоқуқни уларға хәлқ бәрмигән, уларниң дадилири бәргән. Шуңа улар хәлққә бир иш қилип бәрмәйду. Бу, хитайдики һазирқи қанунсиз система. Һазир хитайда әмәлдарлар билән содигәр болувалған наинсаб лалмилар бирлишивалди. Буниңға тақабил туруш керәк.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.