Xitayning obamaning sözini özgertkenliki özining xudukini ashkarilighanliqi

Xitayning "Yer shari waqit géziti" prézidént obamadin uning 11‏-séntebir weqesining 10 yilliqi munasiwiti bilen yazghan maqalisini köchürüp bésishqa ijazet alghandin kéyinla, uni özgertip basti.
Muxbirimiz weli
2011-09-09
Share
obama-liwiye-nutuq-305.jpg Prézidént barak obama 2011-yili 29-mart liwiye mesilisi toghriliq soz qildi.
whitehouse.gov

Meshhur maqalilerni toplap élan qilidighan "Mejmu'e" zhurnili bügün bayan qilishiche, amérika prézidénti barak obamaning 11‏-séntebir weqesining 10 yilliqi munasiwiti bilen yazghan "Biz izdigen hemkarliq" dégen maqalisi, amérikining xitayda turushluq bash elchixanisining intérnét torida 9‏-ayning 9‏-küni élan qilin'ghan idi. Xitayning "Yer shari waqit géziti" bu maqalini "Biz 11-séntebir weqesini birlikte xatirileymiz" dep özgertip basti.

"Mejmu'e" zhurnilida bayan qilinishiche, prézidént obama maqalisini, buningdin 10 yil burun térrorchilar nyu-york shehiride qozghighan hujum amérikighila qarshi qozghighan hujum emes, belki pütün dunyadiki ortaq insanperwerlikke we büyük arzu-heweslerge qarshi qilin'ghan hujum idi dep bashlighan.

Obama maqalisini mundaq dep dawamlashturghan: shu küni bizning arimizdiki 3 mingdek bigunah insan, dunyadiki 90 nechche dölettin kelgen irqi we diniy étiqadi oxshimaydighan xelq biraqla hayatidin ayrildi. Biz ularni hergiz untumaymiz.

Shu küni pütün dunyadiki hemme sheherde ademler birlikke kélip, bir gewdige aylandi. Hemme adem özlirining ibadetxana, meschit, sangramlirigha kirip, hujumgha uchrighan kishilerge matem tutti. Amérikining her qaysi döletlerdiki elchixaniliri gül chembirekke pürkendi. Biz buni hergiz untumaymiz.

Shu bir hepte ichide, pütün dunya bir jama'etke aylinip, elqa'idichilerni afghanistandiki térrorchi terbiyileydighan bazisidin qoghlap chiqardi. Taliban hakimiyitini aghdurdi. Afghanistan xelqi térrorchilardin xali yashash pursitige érishti. Emma shuningdin kéyinki bir nechche yil ichide, bizning eyni waqittiki yer shari xaraktérlik hemkarliqimizda kütülmigen murekkep ehwallar körüldi. Biz bunimu hergiz untumaymiz.

-Men prézidént bolghandin kéyin,-deydu obama maqalisining axirqi abzisida, eyni waqitta pütün yer shari boyiche bashlan'ghan hemkarliqni dawamlashturushni, hemme dölet birlikte tereqqiy qilidighan yéngi dewrge kirishning tedbirlirini izlidim. Mana bu biz izchil izdigen hemkarliq idi. Emma bu jeryanda biz bir qatar jiddiy riqabetlerge duch kelduq.

"Mejmu'e" zhurnilida bayan qilinishiche, amérika prézidénti obama 11‏-séntebir weqesining 10 yilliqi munasiwiti bilen yazghan bu maqaliside, gerche xitayning dölet namini bir qétimmu tilgha almighan, hetta amérika bilen xitayni bir orun'gha qoyup "Biz" dégen söznimu hergiz qollanmighan, peqet amérika eyni waqitta we shuningdin kéyin izchil halda bashqa döletler bilen bolidighan hemkarliq qandaq hemkarliq bolushi kéreklikini, emma efsuslinidighan ehwallarning yüz bergenlikini éniq bayan qilghan bolsimu, lékin xitayning "Xelq géziti"ning shöbisi bolghan "Yer shari waqit géziti" prézidént obamadin bu maqalini köchürüp bésishqa ijazet alghandin kéyinla, obamaning maqalisining mawzusini "Biz 11‏-séntebirni birlikte xatirileymiz" dégen'ge özgertipla qalmay, belki obamaning üch abzas sözidiki mezmunlarning hemmisini, amérika térrorchiliqqa qarshi turushta xitay bilen hemkarlashqan, 11‏-séntebir weqesini xitay bilen birlikte eslewatqan qilip özgertip basqan.

Xitayning "Yer shari waqit géziti" yéqinda yene, amérika mu'awin prézidénti jo baydinning xitayda yazghan 16 abzasliq maqalisining üch abzisini chiqiriwétip basqan idi. Xitay chiqiriwetken bu abzaslar del amérika mu'awin prézidénti baydin, xitayning bash kötürgenliki amérikining chökkenlikidin dérek bermeydighanliqini, buningdin kéyin amérika bilen xitay otturisida yüz bergüsi özgirishler, amérikini téximu köp pursetler bilen teminleydighanliqini, erkinlik bolmighan dölette jem'iyet hergiz muqim bolmaydighanliqini, amérika hazirqi waqitta özining küch-qudritini téximu östürmise bolmaydighan héchqandaq seweb yoqluqini delillep körsetken abzaslar idi.

Bügün intérnéttiki munazirilerde, xitay gézitliri amérika prézidénti barek obamaning 11‏-séntebir weqesining 10 yilliqi munasiwiti bilen yazghan maqalisini özgertip basqanliqi, del xitayning 11‏-séntebir weqesidin paydilinip bashqa milletlerge yürgüzgen qirghinchiliqini yoshurmaqchi bolghanliqi dep körsitildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet