Хитайдики йемәклик бихәтәрликигә болған наразилиқ, хитай һөкүмитини тәдбир қоллинишқа мәҗбур қилмақта

11 - янивар күни хитай мәркизи һөкүмити буйруқ чүшүрүп, 2012 - йилдин башлап, хитайда ишәнчсиз дәп қаралған йемәклик ширкәтлири һәм завутлирини қара тизимликкә киргүзүш түзүмини йолға қойидиғанлиқини уқтурди.
Мухбиримиз меһрибан
2012-01-13
Share
yunda-turubisi-zeherlik-may-305.jpg Бир қанунсиз завутниң көлчикигә йиғивелинған мәйнәт май. 2011-Йили 10-май чуңчиң.
Imaginechina

Хитай вәзийитини көзәткүчиләрниң билдүрүшичә, йеқинқи бирқанчә йилдин буян хитай хәлқиниң хитайда ишләпчиқирилған йемәкликләрниң бихәтәрликигә болған әндишилири күчийип, бу хил наразилиқниң омумий хәлқ қаршилиқ һәрикәтлиригә айлиниши, хитайда иҗтимаий муқимсизлиқ пәйда қилған. Бу әһвал хитай һөкүмитини җәмийәтниң муқимлиқини сақлап қелиш үчүн, йемәк - ичмәк саһәсидики сахта тавар ишләпчиқириватқан ширкәтләргә қарита бәзи тәдбирләрни қоллинишқа мәҗбур қилған.

Хитай мәтбуат хәвәрлиридин мәлум болушичә, хитай баш министири вен җябав чаршәнбә күни ечилған хитай мәркизи һөкүмити йиғинида, йемәклик ишләпчиқиришиниң бихәтәрликигә капаләтлик қилиш үчүн, хитайдики йемәклик ширкәтлириниң мәһсулат сүпәтлиригә қарита, архиплаштуруш түзүмини йолға қоюп, сүпәтсиз йемәклик ишләпчиқарған ширкәтләрниң қара тизимликини турғузуп, җәмийәткә ашкара елан қилиш түзүми йолға қоюлидиғанлиқини җакарлиған.

Әнглийә б б с агентлиқиниң түнүгүнки хәвиридә хитай мәркизи һөкүмитиниң сүпәтсиз йемәклик ишләпчиқарған ширкәтләрни қара тизимликкә киргүзүп, җәмийәткә ашкара елан қилиш қарарини елишиға сәвәб болған амиллар һәққидә мулаһизә йүргүзүлүп, хитайдики сахта йемәкликләрниң пуқраларниң саламәтликигә еғир зиян йәткүзүп, хитайда хәлқниң наразилиқ һәрикәтлириниң барғанчә күчийиши хитай һөкүмәт даирилирини хитайдики йемәкликләрниң сүпитигә қарита мәлум тәдбир қоллинишқа мәҗбур қилғанлиқи илгири сүрүлгән.

Хитайдики чиңхуа университетиниң 2011 - йилидики хитай йемәкликлириниң сүпәт өлчимини тәкшүрүш доклатидин мәлум болушичә, хитайда 94.5% Истемалчи хитай йемәкликлириниң бихәтәрлик өлчимидә мәсилә бар дәп қарайдикән. 80% Истемалчи хитайда ишләпчиқирилған йемәкликләрни истемал қилиштин хатирҗәм әмәсликини билдүргән; 55.2% Истемалчи хитайда һөкүмәт органлириниң йемәклик сүпитигә болған назаритиниң йетәрлик болмаслиқи, хитайдики йемәклик саһәсидә сахта начар, һәтта зәһәрлик йемәкликләрниң базарда сетилип, хәлқниң һаятиға тәһдит елип келишигә сәвәб болған дәп қарайдикән.

Болупму, 2009,2010 - йиллири хитайда йүз бәргән бовақларниң зәһәрлик сүт парашокидин зәһәрлиниш вәқәси, 2011 - йили паш қилинған әврәздин йемәклик мейи сүзүвелип, буларни базарға салған яғ ширкәтлириниң паш болуши, һормон берилип беқилған һайванат гөшлириниң хитай базарлирини игилиши һәмдә 2011 - йили сентәбир ейида хотәндә йүз бәргән аччиқсудин зәһәрлинип, адәм өлүш вәқәлири қатарлиқлар, хитай пуқралириниң қаттиқ наразилиқини қозғап қалмастин, хитайниң хәлқарадики образиғиму яман тәсир көрсәткән иди.

2011 - Йили уйғур елиниң хотән санҗу йезисида йүз бәргән аччиқсудин зәһәрлинип, 12 адәмниң өлүшини кәлтүрүп чиқарған вәқә һәққидә, радиомиз игилигән учурлардин, әйни чағда йемәклик үчүн ишлитилидиған аччиқсуниң өткүр характерлик зәһәрлик химийилик суюқлуқ қачиланған кона бакқа қачилиниши, бу аччиқсуни истемал қилған уйғурларниң зәһәрлинип өлүшигә сәвәб болғанлиқи мәлум болған иди. Радиомиз мухбириға әһвал инкас қилған пуқралар йәнә, хотәндики йемәклик сүпитини назарәт қилиш тәдбирлириниң бошлуқи, йемәклик бихәтәрликигә қарита системилиқ башқуруш қурулмисиниң йолға қоюлмиғанлиқи қатарлиқ амилларниң шунчә көп кишиниң өлүшигә сәвәб болғанлиқини билдүргән иди.

Нөвәттә хитайдики йемәклик сүпитиниң бихәтәрлик мәсилиси, йәнила хитайдики әң зор иҗтимаий мәсилиниң биригә айланған болуп, уйғур аптоном райони қатарлиқ чәт районлар хитайдики начар, сахта йемәкликләр һәм дорилар әң көп сетилидиған районлар дейишкә болидикән. Хитайниң қанунчилиқ гезитиниң 12 - янивардики санида үрүмчи йеңи шәһәр районлуқ сода санаәт идарисиниң йеңишәһәр районидики хитай көчмәнлири топлишип олтурақлашқан лехуа мәһәллисидин тазилиқи интайин начар болған дуфу завутини байқиғанлиқини, йәнә охшаш бир күндә йеңи шәһәр райониниң лийүшән мәһәллисидин һечқандақ қануний рәсмийәтлири өтәлмигән, йемәклик тазилиқ өлчимигә әмәл қилинмиған ислап пишурулған тоху, өрдәк гөшлири дукини байқалғанлиқи һәққидики хәвәр берилди.

Хитай вәзийитини көзәткүчиләрдин “шәпә” журнилиниң баш муһәррири җаң вейго әпәнди, хитайда йеқинқи йиллардин буян барғанчә әвҗ еливатқан, йемәкликтин зәһәрлиниш вәқәлириниң көпийиши хитайда омуми хәлқ наразилиқиға айланған зор иҗтимаий вәқәләрни кәлтүрүп чиқирип, хитай коммунист һөкүмитини әндишигә селиватқанлиқини, әмма бундақ қарар билән мәсилиниң һечқачан һәл болмайдиғанлиқини илгири сүрди.

“кесип ейтишқа болидуки, хитай мәркизи һөкүмитиниң бундақ бир қарарни елан қилиши, әмәлийәттә коммунист һөкүмәтниң хәлқниң барғанчә күчийиватқан наразилиқини пәсәйтиш үчүн елип бериватқан тактикиси. Мениңчә, бундақ қарарлар мәсилини түп йилтизидин һәл қилалмайму. Чүнки, коммунист партийиниң нөвәттики бир партийилик дөләт башқуруш түзүмидә һакимийәт үстидики партийини назарәт қилип туридиған өктичи партийә, гуруһлар мәвҗут әмәс. Хитай ширкәтлириниң мутләқ көп қисминиң игидарчилиқ һоқуқи коммунист әмәлдарлар яки уларниң уруқ - туғқан, йеқинлириниң қолида. Шундақ болғандин кейин коммунист һөкүмәт елан қилған бу хил қарарлар, хитай әмәлдарлириниң игидарчилиқидики ширкәтлиригә вә уларниң хоҗайинлириға өтмәйду. Бундақ қарарлар ахирқи һесабта йәнила пәқәт қәғәз йүзидики язма болупла қалиду. Бу худди хитайда түзүлгән қанун, низамларниң һечқачан иҗра қилинмайватқанлиқиға охшашла бир әһвал. Коммунист һөкүмәтниң бундақ бир қарарни елиши қандақтур хәлқниң һаятий бихәтәрликигә көңүл бөлүватқанлиқи әмәс, бәлки өз һөкүмранлиқини сақлап қелиш үчүн көрситиватқан тиришчанлиқи дейишкила болиду.”

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт