Dilshat réshit: Uyghurlar bu yilqi rozi héytini xitayning qattiq zerbisi we nazariti astida ötküzüwatidu

Sürette, 14 - iyul, döng köwrük bazirining yénida, qorallirigha ötkür tighlarni békitip, uyghurlargha qarshi postta turghan xitay qoralliq saqchiliridin biri.

Pütün dunyada musulmanlarning rozi héyti bashlandi. Bezi döletlerde bügün héyt boldi, mesilen, türkler bügün héyt qildi. Erebler ete héyt qilidiken. Türkiyide turushluq neshriyatchi abdujélil turanning chüshendürüshiche, dunyada héytni qaysi dölette qachan ötküzüshni diniy ölimalar belgileydu, ereb döletliride we pakistanda, héytni qachan ötküzüshni, diniy ölimalar ay chiqqan yaki chiqmighanliqigha qarap belgileydu. Türkiy xelqlerde bolsa, diniy ölimalar türk kaléndari (teqwim) buyiche belgileydu.

Xitayning 'shinjang xewer tori' bügünki xewiride éytishiche, rozi héytini Uyghurlar 10‏ - chésla ötküzüshi kéreklikini xitay hökümiti qarar qilghan.

Xitayning 'shinjang xewer tori' bügünki xewiride yene, ürümchi bazarlirida héytliq mal nahayiti mol, bahasi muqim dep teswirligen. Emma, ürümchidin melum bir Uyghurning éytishiche, bu héytta qoy göshining bahasi örlep ketken.

Uyghur aptonom rayonluq hökümetning tor bétidin melum bolushichimu, bügün 10 kilogramliq bir xalta unning bahasi bir yüen örligen.

Biz bügün, rozi héytning harpa künide, ürümchidiki héyt tentenisini dunyaning bashqa jayliridiki Uyghurlargha yetküzüsh üchün, adette héytning harpa künliride diniy pa'aliyet ötküzülüp turidighan jaylargha, mesilen, ürümchidiki xantengri meschitige we bashqa meschitlerge, shundaqla ürümchidin bashqa yurtlardiki héyt ötküzidighan ahalilerge téléfon qilduq.

Meschitlerning héchqaysisining téléfonliri ulanmidi. Bezi téléfonlar ulansimu, rawan emes. Héyt ötküzidighan ahaliler chet'ellerdin kelgen téléfonlargha jawab bérishtin qorqup turidu. Ularning keypiyatida tentenidin eser yoq.

Dunya Uyghur qurultiyining bayanatchisi dilshat rishitning bayan qilishiche, Uyghurlar bu yilqi rozi héytini xitayning qattiq zerbisi we qattiq nazariti astida ötküzüwatidu.

Dunya Uyghur qurultiyining bayanatchisi dilshat réshit xitayning Uyghurlargha qaratqan qattiq basturush herikitini derhal toxtitishi lazim dep körsetti, shundaqla xitayning qattiq basturushi, qattiq nazariti astida turuwatqan Uyghur wetendashlirining rozi héytini qizghin tebrikleydighanliqini, arzu - ümidlirining emelge éshishigha tilekdash ikenlikini bildürdi.

Yuqiridiki awaz ulinishidin, bu heqtiki melumatimizning tepsilatini anglaysiler.