'Хитай әқлий мүлүккә таҗавуз қилидиған сода сияситини өзгәртиш керәк'

Америка дөләт мәҗлисиниң сода комитети ачқан хитайниң сода вә мүлүк сиясти һәққидә пикир аңлаш йиғинида, америка - хитай сода җәмийитиниң башлиқи кристин мурк қатарлиқ кишиләр, хитайниң хәлқара әқлий мүлүк һоқуқиға таҗавуз қилидиған сода сиястини өзгәртиш керәкликини көрсәтти.
Мухбиримиз вәли
2010-06-17
Share
Xitaydiki-saxta-mal-saxta-CD-305.jpg Сүрәт, хитайда қолға чүшкән қанунсиз ишләнгән vcd, dvd вә cd пластинкилиридин бир көрүнүш.
AFP Photo

Америкида туруватқан иқтисатшунас хе чиңлйән хитайниң хәлқараниң мувапиқ пикирини аңлайдиған - яки аңлимайдиғанлиқи вә ахирқи нәтиҗә қандақ болидиғанлиқи һәққидә мулаһизә елан қилди.

Америка дөләт мәҗлиси сода комитети 6‏ - айниң 16 ‏- күни хитайниң һазирқи сода вә мүлүк сиясти һәққидә пикир аңлаш йиғини өткүзди. Йиғинда, америка - хитай сода җәмийитиниң башлиқи кристин мурк, америкиниң содидики җиддийликни бир тәрәп қилиш комитетиниң рәиси колман коһн, америкиниң хитай сода - тиҗарити мәслиһәтчиси коһн фресби қатарлиқ кишиләр, хитай һазир дөләт ичидә хәлқара әқлий мүлүк һоқуқиға таҗавуз қилидиған сиясәт қоллиниватқанлиқини көрсәтти вә хитайниң һазирқи хәлқара әқлий мүлүк һоқуқиға таҗавуз қилидиған сиястини өзгәртиш тәшәббусини оттуриға қойди.

'Хитай өзиниң ширкәтлиригә мәнпәәт берип, чәтәл ширкәтлирини чәткә қеқишқа башлиди'

Америка - хитай сода җәмийитиниң башлиқи кристин мурк бу йиғинда 'хитай 2009‏ - йилидин башлап ' өз алдиға йеңилиқ яритиш' дегән сода сияситини йолға қойди, бу сиясәтни иҗра қилиш үчүн 'һөкүмәт сетивалидиған өз алдиға йеңилиқ яратқан мәһсулатлар тезимлики' түзүш чиқип, хитай өзиниң ширкәтлиригә мәнпәәт берип, чәтәл ширкәтлирини чәткә қеқишқа башлиди' дәп көрсәтти.

Америкиниң содидики җиддийликни бир тәрәп қилиш комитетиниң рәиси колман коһн йиғинда 'хитайниң бундақ сода сиясити арқилиқ америка ширкәтлириниң хитай һөкүмитиниң сетивелиш тезимликигә киришигә тосалғу пәйда қилипла қалмай, бәлки өзиниң хәлқара әқлий мүлүк һоқуқиға таҗавуз қилишини техиму илгириләтмәктә' дәп көрсәтти.

'Хитайда юмшақ деталларниң 79%и сетивелинмай, оғрилиқчә копи қилинған'

Сода юмшақ деталлири бирләшмисиниң башлиқи роберт холейман йиғинда 'хитайда бултур қоллиниған юмшақ деталларниң 79%и пул төләп сетивелинмай, оғрилиқчә копи қилинған. Хитайниң хәлқара әқлий мүлүк һоқуқиға таҗавуз қилиш сәвийиси бурун русийидә вә һиндистанда бундақ һадисни садир қилған иқитисадий гәвдиниң сәвийисидин көп юқири вә қолланған усули қәбиһ' дәп көрсәтти.

Истратегийә вә хәлқара тәтқиқат мәркизиниң тәтқиқатчиси чарлис фриманму йиғинда бу пикирләрни дәлилләп көрсәтти.

'Әгәр обама һөкүмити бу тәшәббусқа аваз қошмиса, америка дөләт мәҗлиси өзи һәрикәт қоллиниду'

Америка дөләт мәҗлии авам палата әзаси сандер левин ' хитайниң һазирқи бундақ сода сияситини өзгәртиш үчүн һәрикәт қоллинидиған бир пурсәт бар, у болсиму йеқинда ечилидиған 20 дөләт башлиқлириниң алий дәриҗилик учришиши, әгәр обама һөкүмити бу тәшәббусқа аваз қошмиса, америка дөләт мәҗлиси өзи һәрикәт қоллиниду' дәп көрсәтти.

Сандер левинниң хитайниң сода сиясити һәққидә оттуриға қойған пикриниң қаттиқлиқ дәриҗиси тәһдит муқамиға йәтти

Волт стерит язғучиси лан таллейниң 'дов җон' хәвәрлиридә елан қилған обзорида 'америка дөләт мәҗлиси әзаси сандер левинниң хитайниң һазирқи сода сиясити һәққидә оттуриға қойған пикриниң қаттиқлиқ дәриҗиси тәһдит муқамиға йәтти' дәп көрсәтти.

'Хитайниң хәлқара әқлий мүлүк һоқуқиға таҗавуз қилиш мәсилиси, йеқинқи йиллардила башланған мәсилә әмәс'

Америкида туруватқан иқтисадшунас хе чиңлйән ханимниң мулаһизә қилишичә, хитайниң хәлқара әқлий мүлүк һоқуқиға таҗавуз қилиш мәсилиси, йеқинқи йиллардила башланған мәсилә әмәс, бундақ һадисә хитайда, ишикни ечиветиш - ислаһат елип бериш дегән сиясәт йолға қоюлғандила башланған. 90‏ - Йиллардила, чәтәл мәбләғлири бу мәсилини сезип вә буниңдин хали болушни ойлиған.

Мәсилән, германийә учур вастилири шу вақиттила, филипс ширкитиниң техникилири оғрилиниш хәвпидә қалғанлиқини, әмма әрзан әмгәк күчидин меһрини үзәлмигәнликини хәвәр қилған иди. Һазир хитайда әрзан земин, әрзан әмгәк күчи дегән нәрсә мәвҗут әмәс. Бундақ вақитта америка, хитайдики хәлқара әқли мүлүк һоқуқиға таҗавуз қилиш мәсилисини һәл қилмақчи болуватиду. Әмма һазир бу мәсилини һәл қилиш асан әмәс.

'Америка бурун японийә, җәнубий корийиләрдә бундақ мәсилини 337 ‏- нумурлуқ незам асасда һәл қилған'

Иқтисадшунас хе чиңлйәнниң баян қилишичә, америка буниңдин бурун японийә, җәнубий корийиләрдә, әқлий мүлүк һоқуқиға таҗавуз қилидиған мәсилигә дуч кәлгәндә, мәсилини 337 - нумурлуқ незам асасда һәл қилған. Өз - ара келишкән қанун - незамларниң бу дөләтләрдә роли болған. Әмма америка 2006 ‏- йили хитайда хәлқара әқлий мүлүк һоқуқиға таҗавуз қилидиған мәсилиләрни бу незам буйичә һәл қилмақчи болғанда, бу незамниң роли болмиди.

'Башқа дөләтләр йеңи техника иҗат қилса, хитай уни оғрилашқа адәтлинип қалди'

Иқтисадшунас хе чиңлйәнниң баян қилишичә, хитай дуня буйичә хәлқара әқлий мүлүк һоқуқиға таҗавуз қилидиған әң чоң дөләт. Башқа дөләтләр наһайити көп мәбләғ селип йеңи техника иҗат қилса, хитай башқиларниңкини оғрилапла қоллинишқа адәтлинип қалди. Бу мәсилә, әмәлийәттә, хитайниң мәһсулат түрлирини йеңилап алға илгирилийәлмәй туруп қеливатқанлиқиниң муһим сәвәби.

'Һазир америкиниң алдида турған бу дөләт мәдәнийәтлик дөләт әмәс, бир лүкчәк дөләт'

Иқтисадшунас хе чиңлйәнниң баян қилишичә, һазир америкиниң алдида турған бу дөләт мәдәнийәтлик дөләт әмәс, японийә, җәнубий корийиләрдәк демократик дөләт әмәс, бу коммунист хитай бир лүкчәк дөләт. У, башқилар билән түзгән келишимләргә өзи әмәл қилидиған дөләт әмәс, хитай хәлқара мүлүк һоқуқи дегәнни тонимайду, у йиллардин буян 'техникини базарға тегишиш' йәни базарни мән саңа беримән, сениң техникилириң мениң болиду, бәрмисәң оғрилаймән, дегән истратегийә билән иш қиливатиду.

Хитай 2005‏ - йилидин бурун, башқа дөләтләрниң миң хилдин артуқ техникисини оғрилап болди. Һазир америка бу мәсилидә хитайға тәдбир қолланмақчи болуватиду. Худди америка 'хәлқ пули'ниң қиммитини өстүрүш һәққидә чирайлиқ гәп қиливатқили йәттә йил болди, әмма хитай йәнила өзиниң билгинини қиливатқандәк, буниңдин кейин бу лүкчәк дөләтниң бирдинла өзгирип, мәдәнийәтлик гәпни аңлиши натайин таки у өзи иқтисадий қанунийәт буйичә ич - ичидин йемирилип гумран болмиғичә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт