'Xitay eqliy mülükke tajawuz qilidighan soda siyasitini özgertish kérek'

Süret, xitayda qolgha chüshken qanunsiz ishlengen vcd, dvd we cd plastinkiliridin bir körünüsh.

Amérikida turuwatqan iqtisatshunas xé chinglyen xitayning xelq'araning muwapiq pikirini anglaydighan - yaki anglimaydighanliqi we axirqi netije qandaq bolidighanliqi heqqide mulahize élan qildi.

Amérika dölet mejlisi soda komitéti 6‏ - ayning 16 ‏- küni xitayning hazirqi soda we mülük siyasti heqqide pikir anglash yighini ötküzdi. Yighinda, amérika - xitay soda jem'iyitining bashliqi kristin murk, amérikining sodidiki jiddiylikni bir terep qilish komitétining re'isi kolman kohn, amérikining xitay soda - tijariti meslihetchisi kohn frésbi qatarliq kishiler, xitay hazir dölet ichide xelq'ara eqliy mülük hoquqigha tajawuz qilidighan siyaset qolliniwatqanliqini körsetti we xitayning hazirqi xelq'ara eqliy mülük hoquqigha tajawuz qilidighan siyastini özgertish teshebbusini otturigha qoydi.

'Xitay özining shirketlirige menpe'et bérip, chet'el shirketlirini chetke qéqishqa bashlidi'

Amérika - xitay soda jem'iyitining bashliqi kristin murk bu yighinda 'xitay 2009‏ - yilidin bashlap ' öz aldigha yéngiliq yaritish' dégen soda siyasitini yolgha qoydi, bu siyasetni ijra qilish üchün 'hökümet sétiwalidighan öz aldigha yéngiliq yaratqan mehsulatlar tézimliki' tüzüsh chiqip, xitay özining shirketlirige menpe'et bérip, chet'el shirketlirini chetke qéqishqa bashlidi' dep körsetti.

Amérikining sodidiki jiddiylikni bir terep qilish komitétining re'isi kolman kohn yighinda 'xitayning bundaq soda siyasiti arqiliq amérika shirketlirining xitay hökümitining sétiwélish tézimlikige kirishige tosalghu peyda qilipla qalmay, belki özining xelq'ara eqliy mülük hoquqigha tajawuz qilishini téximu ilgiriletmekte' dep körsetti.

'Xitayda yumshaq détallarning 79%i sétiwélinmay, oghriliqche kopi qilin'ghan'

Soda yumshaq détalliri birleshmisining bashliqi robért xoléyman yighinda 'xitayda bultur qollinighan yumshaq détallarning 79%i pul tölep sétiwélinmay, oghriliqche kopi qilin'ghan. Xitayning xelq'ara eqliy mülük hoquqigha tajawuz qilish sewiyisi burun rusiyide we hindistanda bundaq hadisni sadir qilghan iqitisadiy gewdining sewiyisidin köp yuqiri we qollan'ghan usuli qebih' dep körsetti.

Istratégiye we xelq'ara tetqiqat merkizining tetqiqatchisi charlis frimanmu yighinda bu pikirlerni delillep körsetti.

'Eger obama hökümiti bu teshebbusqa awaz qoshmisa, amérika dölet mejlisi özi heriket qollinidu'

Amérika dölet mejli'i awam palata ezasi sandér léwin ' xitayning hazirqi bundaq soda siyasitini özgertish üchün heriket qollinidighan bir purset bar, u bolsimu yéqinda échilidighan 20 dölet bashliqlirining aliy derijilik uchrishishi, eger obama hökümiti bu teshebbusqa awaz qoshmisa, amérika dölet mejlisi özi heriket qollinidu' dep körsetti.

Sandér léwinning xitayning soda siyasiti heqqide otturigha qoyghan pikrining qattiqliq derijisi tehdit muqamigha yetti

Wolt stérit yazghuchisi lan talléyning 'dow jon' xewerliride élan qilghan obzorida 'amérika dölet mejlisi ezasi sandér léwinning xitayning hazirqi soda siyasiti heqqide otturigha qoyghan pikrining qattiqliq derijisi tehdit muqamigha yetti' dep körsetti.

'Xitayning xelq'ara eqliy mülük hoquqigha tajawuz qilish mesilisi, yéqinqi yillardila bashlan'ghan mesile emes'

Amérikida turuwatqan iqtisadshunas xé chinglyen xanimning mulahize qilishiche, xitayning xelq'ara eqliy mülük hoquqigha tajawuz qilish mesilisi, yéqinqi yillardila bashlan'ghan mesile emes, bundaq hadise xitayda, ishikni échiwétish - islahat élip bérish dégen siyaset yolgha qoyulghandila bashlan'ghan. 90‏ - Yillardila, chet'el mebleghliri bu mesilini sézip we buningdin xali bolushni oylighan.

Mesilen, gérmaniye uchur wastiliri shu waqittila, filips shirkitining téxnikiliri oghrilinish xewpide qalghanliqini, emma erzan emgek küchidin méhrini üzelmigenlikini xewer qilghan idi. Hazir xitayda erzan zémin, erzan emgek küchi dégen nerse mewjut emes. Bundaq waqitta amérika, xitaydiki xelq'ara eqli mülük hoquqigha tajawuz qilish mesilisini hel qilmaqchi boluwatidu. Emma hazir bu mesilini hel qilish asan emes.

'Amérika burun yaponiye, jenubiy koriyilerde bundaq mesilini 337 ‏- numurluq nézam asasda hel qilghan'

Iqtisadshunas xé chinglyenning bayan qilishiche, amérika buningdin burun yaponiye, jenubiy koriyilerde, eqliy mülük hoquqigha tajawuz qilidighan mesilige duch kelgende, mesilini 337 - numurluq nézam asasda hel qilghan. Öz - ara kélishken qanun - nézamlarning bu döletlerde roli bolghan. Emma amérika 2006 ‏- yili xitayda xelq'ara eqliy mülük hoquqigha tajawuz qilidighan mesililerni bu nézam buyiche hel qilmaqchi bolghanda, bu nézamning roli bolmidi.

'Bashqa döletler yéngi téxnika ijat qilsa, xitay uni oghrilashqa adetlinip qaldi'

Iqtisadshunas xé chinglyenning bayan qilishiche, xitay dunya buyiche xelq'ara eqliy mülük hoquqigha tajawuz qilidighan eng chong dölet. Bashqa döletler nahayiti köp meblegh sélip yéngi téxnika ijat qilsa, xitay bashqilarningkini oghrilapla qollinishqa adetlinip qaldi. Bu mesile, emeliyette, xitayning mehsulat türlirini yéngilap algha ilgiriliyelmey turup qéliwatqanliqining muhim sewebi.

'Hazir amérikining aldida turghan bu dölet medeniyetlik dölet emes, bir lükchek dölet'

Iqtisadshunas xé chinglyenning bayan qilishiche, hazir amérikining aldida turghan bu dölet medeniyetlik dölet emes, yaponiye, jenubiy koriyilerdek démokratik dölet emes, bu kommunist xitay bir lükchek dölet. U, bashqilar bilen tüzgen kélishimlerge özi emel qilidighan dölet emes, xitay xelq'ara mülük hoquqi dégenni tonimaydu, u yillardin buyan 'téxnikini bazargha tégishish' yeni bazarni men sanga bérimen, séning téxnikiliring méning bolidu, bermiseng oghrilaymen, dégen istratégiye bilen ish qiliwatidu.

Xitay 2005‏ - yilidin burun, bashqa döletlerning ming xildin artuq téxnikisini oghrilap boldi. Hazir amérika bu mesilide xitaygha tedbir qollanmaqchi boluwatidu. Xuddi amérika 'xelq puli'ning qimmitini östürüsh heqqide chirayliq gep qiliwatqili yette yil boldi, emma xitay yenila özining bilginini qiliwatqandek, buningdin kéyin bu lükchek döletning birdinla özgirip, medeniyetlik gepni anglishi natayin taki u özi iqtisadiy qanuniyet buyiche ich - ichidin yémirilip gumran bolmighiche.

Yuqiridiki awaz ulinishidin, bu heqtiki melumatimizning tepsilatini anglaysiler.