Хитай тарихидики әң чоң қара гуруһниң өзи хиянәтчиликкә қарши туруш шоарини көтүрүп чиқти

Бейҗиңда һәр йили бир қетим ечилидиған икки чоң йиғин келәр һәптидә ечилидикән. Коммунист хитай һөкүмити бүгүн бу қетимқи икки чоң йиғинда 'тибәт вә шинҗаң мәсилиси' дегән йеңи тема муһакимә қилинидиғанлиқини ашкарилиди вә бу йиғиндин бурун хиянәтчиликкә қарши туруш һәққидә кәң даирилик тәшвиқат башлиди.
Мухбиримиз вәли
2010.02.25
Xu-jintaw-Urumchide-305.jpg Сүрәт, ху җинтавниң үрүмчидики хитай қораллиқ күчлирини көздин көчүргәндә сөз қиливатқан көрүнүши.
news.sina.com.cn Дин елинди.

Мәркизи агентлиқиниң баян қилишичә, коммунист хитай һөкүмити бүгүн, бейҗиңда һәр йили бир қетим ечилидиған икки чоң йиғинниң келәр һәптидә ечилидиғанлиқини вә бу қетимқи икки чоң йиғинда музакирә қилидиған йеңи тема 'тибәт вә шинҗаң мәсилиси' болидиғанлиқини ашкарилиди.

-- Коммунист хитай һөкүмитиниң ички хәвәрлиридин мәлум болушичә, - дәп баян қилиду тәйвәндики мәркизи агентлиқи, - хитай мәркизи һөкүмити икки чоң йиғиндин бурун 'шинҗаң сөһбәт йиғини' дәп атилидиған бир йиғин ечип, уйғур аптоном районидин кәлгән кишиләргә алди билән хитай мәркизи һөкүмитиниң йеңи сияситини чүшәндүридикән вә башқа хитай өлкилириниң шинҗаңға тақилидиған мәсилилирини һәл қилиш тәдбирлирини оттуриға қойидикән.

Коммунист партийә икки чоң йиғиндин бурун хәлқниң һимайисигә игә болуш үчүн қиливатқан һелә

Хитай хәвәр агентлиқиниң баян қилишичә, хитай мәркизи һөкүмити түнүгүн 'коммунист әмәлдарлирниң пак болуш низами' ни елан қилди.

Хитай бу низамида, коммунист әмәлдарлириға пак әмәлдар болушни тәшәббус қилип, буниң үчүн уларға наһайити көп чәклимиләрни бәлгилигән иди, 'дагуңбав'ға охшаш гезитләр 'мәркизи һөкүмәт һазир хиянәтчиләрни қаттиқ муш билән әдәплимәкчи' дәп коммунист партийә үчүн чапан көтүрүшкә башлиди, әмма бу, әмәлийәттә, коммунист партийә бейҗиңда икки чоң йиғин ечилиштин бурун хәлқниң һимайисигә игә болуш үчүн қиливатқан һелә.

Һазир чиққан 'хиянәтчиликкә қарши туруш' дегән шоарлар дәл хитай тарихидики әң чоң қара гуруһ өзи оттуриға қойған қара шуар

Хоңкоңда чиқидиған 'миңпав гезити' ниң баян қилишичә, коммунист хитай бейҗиңда икки чоң йиғин ечилиш алдида турғанда, 'коммунист партийә әзалириниң өзини пак тутуш низами' ни елан қилди. Униңда коммунист партийә әзалириға рухсәт қилинмайдиған 52 хил чәклимә оттуриға қоюлған. Буниңда асасән, коммунист әмәлдарлири хиянәт қилмаслиқ - пара алмаслиқ, һоқуқини уруқ - туғқанлириниң мәнпәәт қазиниши үчүн қолланмаслиқ керәк дегәнни 52 хил тәрипләп көрсәткән.

'Миңпав гезити' дә чиққан бу обзорда ейтилишичә, коммунист хитай һөкүмити бундақ 'әллик иккини қилмаслиқ' дегәндәк бәлгилимиләрни 1997‏ - йилидин башлап дәп келиватиду, әмма бундақ дегәнсири, коммунист әмәлдарлири техиму бәк чириклишип кетиватиду. Бу, худди 'ечилиш журнили' ниң 2010‏ - йил 1‏ - санида ейтилғандәк, чоң қуруқлуқта оттуриға қоюлуватқан 'хиянәтчиликкә қарши турайли', 'қара гуруһларға қарши турайли' дегән хилму -хил шоарлар, дәл коммунист партийидин ибарәт хитай тарихидики әң чоң қара гуруһ хәлқни қаймуқтуруш үчүн оттуриға қойған шуар. Буниң өзила қара шуар.

Хитай һөкүмити йәнила шинҗаңға адәм байлиқи билән мәбләғ селиш сияситини өзгәртмәслики мумкин

Шинхуа агентлиқиниң баян қилишичә, чиңхуа университетиниң профессори ху әнгаң икки чоң йиғинда музакирә қилидиған мәсилиләр һәққидики тәтқиқат доклатида, 1990‏ - йилидин 2004‏ - йилиғичә, хитайда шәрқ тәрәпләрдики районлар билән ғәрб тәрәптики районлар оттурисидики иқтисадий пәрқ 75% гә йәткән иди, әмма 2008‏ - йили 60% ға чүшти, әмди бу қетимқи йиғинда, бу пәрқни кичиклитиш һәққидә йәнә тәңшәш болиду, дегән.

Уйғурлар коммунист хитай һөкүмитини, алди билән уйғурларниң тилини вә ениқ милләт аламәтлирини йоқитиш сиясити қолланди; хитай өлкилиридин қораллиқ сақчиларни уйғур юртлириға көчүрүп келиш, уйғур юртлиридин туғут йешидики қизларни хитай өлкирилиригә көчүрүп кетиш сияситини қолланди; бултур үрүмчидә йүз бәргән 5‏ - июл вәқәсидин кейин, уйғурларға қарита очуқ -ашкара һалда хитай милләтчилики билән муамилә қилишқа башлиди, дәп әйибләп келиватқан иди. Гәрчә хитай профессори доклатида, хитайниң тибәт вә шинҗаң сияситидә әмди өзгириш болиду, дәп ейтқан болсиму, лекин қандақ өзгириш болидиғанлиқини тәпсилий ейтмиған.
 
Әмма бу әрбаб мәбләғ селиш мәсилиси һәққидә тохталғанда 'хитайда ғәрбни ечиш - тәрәққи қилдуруш дегән мәсилидә юшурун әндишә һелиму наһайити чоң. Шуңлашқа хитай һөкүмити әмди уйғурларға вә тибәтләргә қарита иқтисадий җәһәттә бурунқидин ашуруп мәнпәәт бериш сияситини қоллиниши мумкин, лекин һөкүмәт ғәрбни ечиш үчүн мәбләғ селишта, буниңдин кейинму йәнила адәм байлиқи билән мәбләғ селишни асас қилишни өзгәртмәслики мумкин' дегән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.